Bongkling (XXVI-XXX)

Sumber Gagambaran; commons.wikimedia.org

Kaketus saking manuskrip duwén

Ida I Déwa Gdé Catra Karangasem

/26/

Mené dingeh apang tatas,

resepang juwa di hati,

hento né madan kelod,

hento anggon bapa nyumwin,

gumi nto sing nongosin,

tekaning satanem tuwuh,

batu miwahing janma,

hento brahma manyusupin,

nggawé kebus,

nggawé etis masih iya.

/27/

Suryya to pawakan kaja,

hento ya manggawé paling,

manggawé pangrasa béngkot,

nggawé belog nggawé ririh,

nggawé dharma tan sipi,

nggawé bani nggawé takut,

tuwi tong dadi bales,

tuwi ya patuduh Widhi,

twah katuduh,

buka kéto katatwanya.

/28/

To buwin Bhatara Bulan,

ida mapawakan kangin,

twarada mapilih tongos,

kéné papadhanya cahi,

di juné ya hiwasin,

ada jun liyunya siyu,

padha ya misi bulan,

lamun sih iyéhé hening,

bulan luhung,

twara ada katawengan.

/29/

Yén puwek yéhé mangenah,

puwek bulané nongosin,

biyokang dadyang acepok,

katon bulané abesik,

hento ya tanggun langit,

tong bakat bana anak ngitung,

lantang yaning ucapang,

buwin tong kena jaganin,

néné kawuh,

bapa jani ucapanga.

/30/

To ya madan margga sangha,

atmané ngambahin sahi,

hengkén nto maadan kéto,

laksanané sahi-sahi,

yén beneh ban ngentasin,

swargga phalannya katepuk,

yén pelih baan mentas,

naraka bakat ceburin,

twara buhung,

di jambangané malablab.

(pacang kalanturang.....)