Anak Bapak Di Culik

Olih: I Gusti Lanang Sutéja Naréndra 

Sumber Gagambaran; id.pinterest.com

Kurenan tiangé gupuh malaib uli kamaré.  Jelanané magablég,  selimputan batisné nyagjagin tiang di balé saka paté.  Angkihané ngangsur,  paningalané nagih makeplos.  

“Pianaké di culik koné Bli!” kéto ia lolo kadroponan.  

Buka macedar tangkahé mireng raosné ento.  

“Ka... Ka... Kadén ia ta... ta... tamasya ajak sekolahné? Kén.. kén... kén... Kénkén bisa kéto? A... A... Apa do.. do.. dogén gaén guruné?  Dadi bisa di culik muridné? Kawah incuk!” Buka pita kasété samben raos tiangé. Ngetor awaké makukud, pesu peluhé matah-matah. I Luh sing masaut. Ngalemet ia nyelémpoh di natahé. Béh, prajani tiang milu éwa, paling raosé lan tindakané. Tondén sempat makeneh, kurenan tiangé ngenjuhang hapé.  

“Né...tuni guruné nélpun maang kabar. Tegarang sautin malu,” kéto ia sambilanga magruéng nyebak.  

“Ha... Ha... Ha... Lo...” pegat-pegat raos tiangé nyautin anaké ané nelpun.  

“Halo...anak Bapak sudah di culik!”

Mbééé....déwa ratu,  ngatébtab tiang milu nyebak.  

“Dé Agus Dananjaya Wisnutama Putra Perkasa Ananta Wikrama Tungga Déwaaaaaaaa.....” Nyerit tiang ngamé-amé pianaké, buka cicingé panteg.  Nepukin tiang nyerit,  I Luh sayan keras nyebak misi ngasén di natahé buka kerauhan.  

“Gedé Agus Dananjaya Wisnutama Putra Perkasa Ananta Wikrama Tungga Déwaaaaa...” milu ia ngamé-amé adan pianakné, sambilanga malisah.  

Pisagané biur. Apakpakan basé,  bek suba natahé tekaina tekén nyama brayané.  Kulkulé madongdang.... 

Di tengah biuré ento,  sagét hapéné buin mamunyi. Tit... Tit... Tulalit... tulalit...

“Halo....,” kéto raos guruné.  Kena ban ngingetin.  Pak Gusti,  guruné ané moglong.  

“Bagaimana kénkén Dé Agus Pak?! Apakah masih enu ia di culik?!” patakon tiangé panik, sambilang nyebak mabélé-bélé. Guruné nyautin banban. 

“Ooo...sudah léwat jauh Pak.  Sekarang anak Bapak sudah di Tulamben.” 

I Gusti Lanang Sutéja Naréndra 
magenah ring Karangasem.