Puisi-puisi Suplir; Janji
 |
| Sumber Gagambaran; jejakjambi.com |
Lingsir
Wengi
Kagiat suaran sayongé makilit
Sunar sang hyang wulan kakaput
Asuné tan pegatan nyalung magraung
I Kedis tuutuu mengkeb ngelingeb
I Sagsia jerih sambilanga mangintip
“duh pakulun, hanung maha suci,
sun abdhi rumaos, panga abdhi
dumogi kakesreg”
Tabuh pangundang kala bhuta
Tan sida maosang antuk rasa
Suarané nungal ring muncuk layahé
Saking bhuana alit
Anerus maring bhuana agung
Mih déwa ratu
Angrangsuk maring ragané si anu
Ngeling maguyang
Kedék ngangkak
Pinaka pangundang
Tan dados malegéndang
Napi malih nantang
Lan jani waliang
Sambilang ngrastitiang.
Janji
Masan jani masan majanji
Hidupé lakar luung koné buin mani
Yén suba milih caloné niki
Munyiné manis kéwala madui
Janji tinggal janji
Nak liunan munyi
Sakéwala tusing mabukti
Né alih
Sasai madasi kéwala tusing korupsi
Harus jujur kéwala tusing
penghancur
Tusing begbeg pules kéwala apang
luwes
Tusing ngelamun kéwala apang
membangun
Tusing kasar kéwala apang medasar
Tusing gengsi kéwala tepat ken
janji
Sing dadi majanji yén tusing
mabukti
Bisa- bisa johin widhi
Ngemasin mati.
Dharmaning
Adharma
Ulian iseng minehang
Anggén panginget lan lanturang
Dampalan kayuné ukirin
Inargamayang lan sukatin
Incepang tur uripin
Dharmané kasub ring gumi
Misaratang tuah ento di hati
Titi pamargi né patut katami
Minab adharmané tan kaurati
Lan jani seken pinehang
Rahwana satata kapelihang
Ulian nyalanang laksana sané iwang
Kasengguh kaon tan patut margiang
Ngamaling somah tusing kagelahang
Tusing ké bisa nyekenang
Laksanané né kaon ngawinang
kaajumang
Rahwana ngeling maguyang
Pelih acepok ngaranayang
Dharmané kayang jani tusing
kaingetang
Laksana luungé tuah kakutang
Né kaon jani satata kaingetang
Laksanan sang Rahwana sekenang
Rwa bhineda tan kapalasang
Anggén bekel malaksana sakayang-
kayang.
Semeng
Rikalaning endag sanghyang surya
Manuké maswara girang
Ipaksi maswara humung
Kecaskecos tan rérénan
Sami ngardi ngulangun
Napi malih sekar gadung
Taler sekar cempaka
Ruru tiba angin
Swaran brahmarané nyeliuk
mangimbang
Palemahan Baliné
Ngiring jaga sareng sami
Palemahan Baliné sané sutrepti
Dumogi setata santi.
Ia
Ragané tanpa
rasa
Sané nguripang
ia
Ngarasayang sané
tan marasa
Pabuat laksana
margiang
Anggén bekel
sekayang- kayang
Agamané patut
tekekang
Sastra luwih
pakardin sang wiku
Kukuh gamel iku
Wiadin tuah
aselem kuku
Tepuk kéwala
tusing ada
Dharma dogén
tusing sida
Yén jati lakar
kapaica
Nelebin sang
mraga atma
Marga nyujur
nirwanam
wastané sujati I Wayan Suparwita.
.jpg)
No comments