Puisi-puisi Madé Suwéta Aryawan; Bojog

Sumber Potrekan; pixabay.com

Bojog

Nyeledét

Ngejengit

Gasgas-gésgés makecog

Suba beduur makejang ogar

Nuléngék makejang cukcuk

Asal paak sagrep pakpak

Peteng lemah sing rérénan

Katuju ujan.........!!!

Nungkuk ngilgilang

Melalung

Rejeng rejeng

di rejengé bingung

Paling ngalih alingan

Makejang sabsab ungkab

Dikenkene magending

Kroak..............

Kroék..........

Suba sanja

Matan ai séndéh kauh

Tekep gulem selem

Enu kejengat kejengit

Sandi kala ujan aon

Makejang saru

Nyaru..........

Ngaku-ngaku

Suba saru

Nyaru ngaku

Singaraja, 17-1-2009.

Gendingang Keneh Sungsang

Yan layu don kayuné

Maka ciri tiang sedih nyakit hati

Magaleng sebet masaput inguh

Ngejuk munyi tresna rengas

di segara batu lanying

Pidan ada angin nau ulap-ulap

Ngajak tiang ngedum liang

Gulem selem matinggah duur sirah

Nguyak manah tiang jengah

Sat ketekung amah sumangah

Kija tiang ngalih rurung élah

Malaibin keneh brusah dapluk jengah

Sebet pesan manah tiang

Elung ngedungklung

Gendingang katak dongkang

Ngoncang,.... ngandang ngandang

Sambil ngetis ngidem aris

Ngentungang keneh sungsang

Dija alih keneh liang tiang

Bekbekan ........... ..

Anyudang puruh dongkang.

Singaraja, 30-1-2010.

Gook Indria

Yan majalan sing karoan keneh

Nepukin alas wayah

Telaga linggah lumutan

di sisinné tumbuh paku liking

Ento koné danu

Lantas madayung negakin pedau

Kanti lima képék neenang suit

Siat......., siut!

Aduh bayuné lempah

Terus ngejohang madayung

Nepukin gook pirata

Éh, raksasa

Bengong lantas ditu

Wireé goa madurgama

di tengahné ada telaga

Yéhné meliah nyabran sanja

Liu anak nau sing nawang nau

Selid sanja makipu nganteg ka bucu

Kelingas keIingus

Bangun nyeruyung masebeng angus

Aduh, sakit luludé

Sakit bangkiangé .......... !!!

Lantas pesu kusap-kusap

Pemelin sampi ledis

Pemelin padi amah memedi

Lantas mulih tolah-tolih

Macelana karung

Gasgas-gésgés genit bingung

Kuluk melalung bakat kepung

Kadén anak luh tulung-tulung.

Singaraja, 30-10-09

Ngepung Lawat Uyang

Yan apa kadén kepunga

Semengan rengas sing masugi

Kanti sépanan nganti celana dalem

Ngepung lawat rengas ngindang

Nuléngék pati caplug

Makuug gradag grudug

Ngagen lakar ngepik bunga

Miyik ngalub ngebek ambara

Liu pada maboya

Wiréh guminé remuk uwug

Makejang masebeng kenyir saja

Nyeledét ngentungin nau

Ulian tendas puruh saru

Matan ainé saja ngentér

Nanging tebelan gulemé selem

Mabrarakan ngebekin langit

Kanti ilid entéran bintangé

Sing pesan ada angin nulung

Nyampatang ebet sebet ati

Malali makisi-kisi

Nyaruang kenehé mati

Dija kepung punyan nauné

Makejang késkés régés kaput ngenges

Dija bitbit tongos girangé

Makejang nyelangkang magaang

Aruh ......... !!!.

Bareng buduh aduh-aduh.

Cicing jaruh ngamah bubuh

Ento kepung kanti labuh

Jalan ja suud inguh

Negak matimpuh mitbit pupuh

Apang tepuk ané ruruh

Nuluh munduk unduk

Nuncap gunung pengung

Ditu mara suud

Ngipi malali malali

Jalan gantasang

Suud uyang maguyang.

Singaraja, 11-2-2010