Puisi-puisi Érkaja Pamungsu; Batur 1820

Istimewa

Batur 1820

Linggih méru ring gegering agra kembar

Masahsah malumbaran

Kagelut réjéng anyar

Kori agung tumpang solas

Makodi sarwa satwa tantri

Atep menyuksuk

Saking suku ka mudra ulu

Ramayana carita

Munggah ring lawangan

Masunar prada mas

Agung pangadegan

Ring madyaning utama jero agung

Bingin ngrempyak ngungkulin

Akah tegteg mangatut paras

Nyakra dilahing surya

Kori manyujuh

Candi kurung makereban

Candi bentar

Prasada bebaturan

Nyihnayang wibawa

Stana Rudrapati Mahadéwi

Dénpasar, Désémber 2018

Batur 1820 #2

Jaba jero agung

Odah manyuwun bakti

Nampa sarining aci

Makamben tenun

Makinyah

Negak masila nyongkok

Katimpalin kurungan

Di kalangan desané

Di samping wantilan genteng tiying

Matumpuk kalih

Marawat

Saking potrékan Walandakrama

Dénpasar, Désémber 2018

Batur 1849

Silih tunggil panglingsir

Jegjeg nyeleg modeng capil

Kapotrék Walanda usil

Di tengah réjéng selem mapilpil

Masayuban bagas tuh mabunga kantil

Nyledét manlektekang

Mangarepin aor gumi

Di duri

Dresta kuna jegjeg madeg

Tetaman Bhatara Hyang

Linggih Hyang Ayu Luwih

Méru tumpang solas mawastra putih

Mawates pagehan batu

Rumaket sutindih

Maka unteng jiwaning bembengan agung sajlijih

Hredaya krama lingga kembar masih

Dénpasar, Désémber 2018

Batur 1900

Padang batu

Masambeh ngias natah désa

Adung masapuh bias

Punggawa Hindia Walanda

Ngawilangin krama désa

Nudukin sén gulden

Mangisinin catu-catu kau

Neltelang baas jinah

Katurang ka balé agung

Ngenjek titi gonggang

Ngengkebang awak ka angkul-angkul

Dénpasar, Désémber 2018

Batur 1917

Gejer gumi

Maoyodan tan pagisi

Koyeg makocok

Sendi pageh mangraksa saka

Mangukuhang raeb duk lumutan

Linuh! Linuh! Linuh!

Tatanduran mel matikasang urip

Buk makupuk ngaliput muncuk gelung kori agung

Lantas…

Mudra lung kapunggel

Nunceb manyumbah pratiwi

Kairing sampih-sampihé embad

Linuh! Linuh! Linuh!

Gunung Tuluk Biyu runtuh

Buwahan Abang Érawang kelem nyungklem

Salikur krama Érawang malaibang jiwa mwang pralingga

Purana wedalan Ratu Aji Arkajacihna

Mategtegan masayuban

Sagilik-saguluk adung

Nekeh manampingin Sinaratakrama

Ring purwaning Bukit Sampian Wani

Ngawangun ngrajegang pahyangan

Kasengguh Batur Kanginan

Dénpasar, Désémber 2018

Batur 1926 #01

Ri kala Badrawadamasa

Basuki Nadi Taksaka Raja

Peteng libut magejeran lindu

Hyang kodal malonan

Medal saking madyaning lingga

Makeplug solas lubang

Toya api barak ngakak medal

Maliah….

Ngisinin bembengan catu Hyang Mami

Ngingsah ngeseng sarwa né entasin

Mangan candi linggih Hyang Siddhi

Panjak alit kocap karauhan

Ucap-mangucap toya mwang api

Tan pagugu!

Panjak agung pada guyu

Lantas ipun macebur

Ngalangi ring klebutan api

Kebus bang tan parasa

Nénten mapas ngeninin pati

Cihna siddhi manik cintamani

Dénpasar, Désémber 2018

Batur 1926 #02

Rarud…!

Rarud…!

Tikeh tedung kapondong

Palawah gendér katanggung

Maninggalin tanah palekadan

Nyujuh muncuk pundukan jaran

Pati kaplug

Ngentasin geger Bubung

Panjak ngelidin pati

Ngalahin natah réjéng anyar

Ngalahin gelung kori paras

Ngalahin kroya Batur wayah

Mangantungang urip

Nyliksik ketélan prani

Dénpasar, Désémber 2018

Batur 1926 #03

Batun sendi bhatari tedun

Kasarengin bogolan Welandapraja

Ngingsir ngiring pratima pralingga

Bhatara Kawitan

Bendé pusaka

Ngélingang Hyang Aji Purana

Kasungsung mangiring genahé degdeg

Madunungan

Ka natah sendi aji

Matitipang urip

Ring genah landuh Bayu (ng) Gedé

Dénpasar, Désémber 2018

Batur 1926 #04

Mencar tan pajaring

Krama manyatur désa tan pairing

Agni api sampun manadah telah

Ilang umah ilang pahyangan

Asah mangisinin catu agung

Ngalekah makedus

Badeng sumawur

Tan pacingak desané wayah

Maurug!

Ilang!

Katundung!

Ngalahin kung

Dénpasar, Désémber 2018

Batur 1926  #5

Dina kalawan dina kentasin

Bayu (ng) Gedé

Pralingga pratima kalinggihang

Krama tan putus ring hyang

Mangelarang usaba

Cihna bakti

Mataki-taki

Jagat landuh

Geni agung tan malih runtuh

Dayuh, dayuh, dayuh…

Dénpasar, Désémber 2018

Batur 1926 #6

Kéngkénang madaya?

Mel pondok suba telah

Kija ngalih pangupajiwa?

Kasuna bawang maurug benyah

(Tan pasaut

Dunungan sepi tan pasuara

Wantah andus gunung sané kantun madusdus mampehan

Mangiket sayong-sayong putih dingin

Nimpalin awu mwah bias ngingsah maulehan

Welérang medal agung ring madya danu

Danu gadang, danu kuning ngawarna yoni)

Ngalu!

Danuh Tanaya madolan tan pajaran

Danawakrama mencar ka dura désa

Utara daksina

Purwa pascima

Tan pawates

Dénpasar, Désémber 2018