Pulo Bali Pulo Kesenian

Olih: IDG Trinandita

 

Potrekan I Putu Supartika, kaolah nganggen aplikasi Vinci

Ritepengan ngewedar indik Pulo Bali sekadi judul reriptan puniki ngiring wacén utawi tembangan gending keroncong "Pulau Bali" puniki.  Lirik nyané sekadi puniki : "Pulau Bali Pulau Kesenian. Tempat menghibur hati. Di sana banyak kebudayaan. Indinesia yang asli. Pulau Bali dengan tariannya. Yang disertai nyanyian. Sudah termasyur di seluruh dunia. Sangatlah digemari. Banyak kaum pelancong yang datang. Mengunjungi pulau Bali. Untuk menyaksikan keindahan. Pemandangan yang murni. Pulau Bali. Pulau mahajaya. Kebanggaan Indonesia. Berkat peninggalan purbakala. Termasyur selama-lamanya"

Asapunika syair gending yéning kapirengan pastika ngulangunin pisan. Ngulangunin lan ngawetuang rasa bangga dados jatma sané jumenek ring pulau Bali, punika taler wargi Indonésia tiosan. Gending sané mabasa Indonésia puniki kagendingan antuk irama keroncong sané suarannyané sida ngawinan rena, nudut rasa, merasa angayubagia, lan bangga ring kayun. Yéning artos ring Basa Bali sekadi puniki : "Pulau Bali Pulau kesenian. Genah nyelimurang ati. Irika akéh wénten kebudayaan. Indonésia sané asli. Pulau Bali wénten igel-igelan. kairingan gendingan. Sampun kaloktah ring dura negara. Jakti-jakti ngulangunin. Akéh torisé sané rauh. Manyumbungan Pulau Bali. Jagi nyingakin kaasrian pemandangan. Sané kantun lestari. Pulo Bali. Pulau maha jaya. Kekasuban Indonésia. Ulian peninggalan saking nguni . Kasumbungan  selami-laminé.

Daging utawi tetuek tembang puniki minaban samian wantah patut. Sami punika karasa sampun majanten kawéntenané. Sakéwanten sami punika dados tanggung jawab nyaga sumangdané napi daging gending punika prasida ngelantur ripungkur wekas. Sumangdané prasida dados warisang ring pretisentana sami. Sané dados pikobet ring  kayun. Napiké Pulo Bali presida jagi ngawerdiang makesami pidadab sekadi tembang punika? Ring aab jagaté sekadi mangkin sané dados pikobet ring Bali sekadi luu plastik. Luu plastik lan luu tiosan yéning nénten prasida katepasin sida ngawetuang pikobet sané nyansan abot.  Sami patut urati ring kahanan luu plastik puniki. Sumangdané ngirangin ngawigunayang piranti plastik ritatkala  ngemargiang parikrama. Saking parikrama sané saderana dados kakawitin saking kulawarga soang-soang. Minabang yéning matumbasan mangda makta tas saking paumahan. Niki wantah parikrama becik sané patut katulad punika taler pidadab becik tiosan. Sakadi misahang luu plastik lan luu don, kertas lan botol. Mapan sami luu punika dados kawigunayang dados jinah.

Tios ring punika ring Pulau Bali patut kedadbdabin indik adat lan budaya sané patut kalestariang. Adat lan budaya sumangdané prasida kalestariang lan katincapang. Punika taler pidadab ring panglimbak pariwisata mangda prasida ngawerdiang pariwisata budaya lan pariwisata réligius. Bali sampun kaloktah pinaka Pulau Déwata lan Pulau Seribu Pura. Ring aab jagaté sekadi mangkin minaban pitakén sané sering kapireng duk nguni sekadi “Bali sebelah mananya Indonesia?” Yéning artos Basa Bali sekadi “Bali punika magenah ring dijané Indonésia?” Pitakén puniki minaban kantun katakénang menados cihna Pulo Bali kasub lan kaloktah ring dura negara. Pulo Bali wantah sinalih tunggil pulau ring Panegara Indonésia. Dumogi tetep ajeg Pulo Bali, Pulo Kesenian.

Saniscara, 18 Agustus 2018

I Déwa Gedé Trinandita
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.