Mapatung

Olih: I Gusti Lanang Sutéja Naréndra

Sumber Gagambaran: fevimage.info

Semengan neruput gadangé suba dunduna.

"Bangun Bli. Megaé malu!"

Sambil ngelier bakat sautin,

"Bin jep. Enu kiap. Kalud kalah ibi maceki pas siwaratriné!"
I Luh nyansan nyényé,

"Siwaratri apa maceki? Ada satua Lubdakané luas maceki? Iiissss.... Bangun malu megaé! Patungan dugas galungané tondén mabayah!"

Bakat wélang kurenané, "Piiiih Nyai nyényé magenyé! Tawang Nyai? nak kéweh jani ngalih gaé. Perlu tenaga, butuh perjuangan! Nyai pragat bisa nagih dogén. Tegarang Nyai megaé muh! Bli nongos jumah!"

Kéné pasautné, "Nah, cenik gaéné ento. Yén Icang baang Bli megaé, mani bisa sugih."

Biiiih... Mrekak pesaja poloné.

"Apa lakar jemak gaéné?"

I Luh ngadésem,

"Ngadep bé, ji 80 juta!"

Béh korban infotainment I Luh. Bakat sautin campah, "Méméééh... Nyén koné lakar nyidayang meli bén Nyainé aji kéto?"

"Béh belog kadén Icang medaya? Lamun mael, lakar patungang. Cara nampah dugas galungané!" kéto sautné élah pesaja.

Celekotokané....

Mbééé....nyén réla gelahé patunganga?? Teka seka patungé, Ada ngisi kikilné, ada negakin, ada mrekes koping, ada nyamok bungut, ada nyelegukin, ada... Adaaahhhh...
Ngénggalang tiang masaut, "Sing... Sing... Bli dogén suba magaé. Nyai bobok aying dogén jumah. Muach..." ngadébas tiang bangun, nyaluk pakaian dinas : celana kolor, capil, udud.
Asikut dingeh pireng tiang I Luh ngerémon,

"Suba baang barang ji 80 juta, enu misi ajum. Misi ngaku males magaé. Kadéna élah merawat barang ji 80 juta. Dasar lelaki!"

(Macang Rumah Cinta Seribu Jendela)