I Wayan Piadnya; Ngambar Urip

Wayan Piadnya

Yadiastun embas ka jagaté puniki nénten ja sakadi jatma lianan sané sampurna, nanging I Wayan Piadnya setata mautsaha mangda prasida maduwé ‘dakin lima’ ring kauripannyané. Lan dané muktiang indiké punika antuk ngambar utawi makarya lukisan. Mamodal canvas, kertas, warna, cét, miwah kuas dané setata nguningayang napi sané kapanggih, sané kakenehang, wiadin sané katonton ring média canvas utawi kertas. Indiké punika pinaka bukti yéning sang sané nandang disabilitas mersidayang maduwé karya.

Dané embas 29 Oktober 1984 ring Kedéwatan, Ubud, Gianyar. Sarahina-rahina, dané wantah makarya lukisan ring paumahané lan dané nganggén wantuan kursi roda rikala nyalanin kauripan puniki. Sangkaning melukis punika, ngawinang dané prasida makapal terbangan. Yéning nénten melukis, minab dané nénten ja pacang naanin makapal terbangan.

Daweg punika warsa 2004 dané kaundang ka Jogjakarta pacang nglaksanayang study banding sareng Kartika Affandi pianak saking pelukis Affandi sané sampun kasub ring sajebag Indonésia. Ngawit melukis warsa 1997, rikala dané marasa yéning déwékné nénten ja pacang prasida idup ngandelang rerama wiadin anak lianan. Yadistun maduwé kakirangan, nanging dané maduwé semangat miwah papineh mangda prasida taler idup mandiri. 

Gagambaran wiadin lukisannyané akéhan nganggé bantang utawi téma Bhinéka Tunggal Ika, utawi keberagaman. Lianan ring punika taler wénten sané nyaritayang indik kahanané sané mangkin minakadi indik bencana alam, utawi jatmané sané sayan piwal ring Sang Hyang Widhi lali ring karma phala.

Sinalih tunggil lukisannyané sané mamurda ‘Bencana’ sané dados cover majalah Suara Saking Bali édisi XXVII nyaritayang indik i manusa sané momo miwah piwal ring dharma. Nénten ja med ngulurin indria, ngaruruh artha brana antuk pamargi sané iwang sakadi ngusak-asik gumi miwah lingkungan. Indiké punika ngawinang i manusa keni bencana.

Sané mapikayunan pacang uning utawi makenalan sareng I Wayan Piadnya dados kontak dané ring email piadnya@gmail.co.id utawi ring HP 081915613129. (*)