Béha

Olih: I Gusti Lanang Sutéja Naréndra

Sumber potrekan; www.pakutaso.com

Kurenan tiangé ngaba orta jeek pesaja.

“Bli, ada démo merebutin bendéra koné! Aruuuh.... Jani gantina uug guminé ulian bendéra!”

Béh tiang takut masé koméntar unduk kakéto. Nyanan ada mirengang, lapuranga pasal penistaan. Adaah... Kéweh bana!

Mawanan kedeng tiang I Luh mulihan umah. I Luh bingung. Nyansan bingung dugasé tiang gagésonan ngelés kancing bajuné, lantas ngelés tuara matari.

“Aiiiiihhhh... Nak kénkén nénénan??” kéto ia bingung sambilanga nekepin béhané buuk telutuan sada taliné giling.

“Bli ber kadroponan dogénan!”

I Luh bes keras ngaraos, ngawinang I Ketut enten. Tingalina tiang ngedeng béha méméné, prajani ia ngadébas bareng marebutin béhané. Ia ngedeng kangin, tiang ngedeng kauh. Kruééékkkk.... béhané sibak dadi dadua.

“Néh... Celekotokané.... Maka dadua sing dadi kalahang!” kéto I Luh nguél, lantas ngantrog nagih magedi pesuan umah. Nyonyoné lambih ngelayung.

Énggalang tiang ngisi limané, lek atiné ia pesu melalung.

“Éndén, Bli ngelah kejutan spésial untuk I Luh.”

I Luh mejadengan. Égar sebengné dugasé tiang mesuang béha baru uli lemariné. Suba atiban tengah, mirib nyandang suba I Luh maganti béha.

“Iiihhh...So Swiiitt...” kéto bibihné ngejengit.

Béha barak nguda. Manis pesaja. Pasangin tiang I Luh béha sambil ngeraos kisi-kisi.

“Ai lop yu Luh.”

Buiiiiihhhh.... I Luh ngidem, buka ngeresepang raos tiangé romantis gati gatiné!

“Luh, sujatiné anaké démo merebutin bendéra, buka Bli ngajak pianaké I Ketut. Macongkrah marebutin béha, sakéwala engsap tekén tatujoné,” jani serius raos tiangé, buka anaké madharma wacana di tiviné.

I Luh ngedat, buin ia jeek pesaja.

“Aiiih... Apa hubungané béha ajak bendéra? Soléh-soléh dogénan!”

“Kéné,” sautin tiang sambilang ngedeng limané ajak negak di waton dipané. “Sujatiné anaké marebut bendéra ento buka marebut béha. Makejang marebut kulit, sakéwala engsap, sujati isiné ané alih. Ngujang bendéra parebutin? Suksmané, isiné ané patut tohin, incepang di keneh. Ngujang marebutin béha? Nyonyoné ané lakar alih. Sing kéto?” manying raos tiangé sambilang nundikin gigis-gigis ané makaput aji béha barak nguda ento.

I Luh makenyem. Paningalané ngalier. Tondén tiang maan selah nyalanang kenehé, sagét I Ketut teka nyerogjog, sahasa ngambis béha lantas manyonyo kledot-kledot.

Adah.... Tiang nuléngék, katos magelekan buka selekakin tulang pindang di klénéngané! Celekotokané....

(Macang Rumah Cinta Seribu Jendela)