Puisi-puisi I Nyoman Pasek; Nyama Braya

Gagambaran I Nyoman Mahayasa

Mulih

Ipidan wayahé magetih getih

Mayuda  ajak i penjajah ané ririh

Wantah mabekel tiying lanying a katih

Mabéla pati tur sutindih

Mangda rahayu sang mérah putih

Bayu gedé sing ada saih

Nyagerang keris tusing mesangih

I penjajah malaib jerih

Tetujoné mapikolih

Nusantara jenek malinggih

Jani i raga suba kelih

Amerta suba pada polih

Nyangin keneh suba gampang alih

Nepukin gumi ané canggih

Sakéwala titiang sedih

Ngantenang Liu anak sugih ageng pamerih

Politisi masuara jangih ngaduang bibih mapengidih

Nata praja becik lingggih para jana liu kampih

Liu anak ririh mapilih kasih

Dija tongosné asah asuh asih?

Matur ring sami para warih

Yén marasa déwék  ririh

Ngiring mangkin mulih

Ngawaliang rasa satria maha patih

Rumaket tan mapilih pilih

Miara gumi nusantara sané jelih

Cingak aksi tegal uma matampih tampih

Ulamé ramé nagih alih di pasih

Nyiriang gumi dini yakti sugih

Sampunang dadi juru balih

Masemeton ampunang saling tihtih

Jalan mabagi amerta waluya pada matangkih

Pancasila boya wantah di bibih

Sakéwanten dados pangabih sané luwih

Bhineka Tunggal Ika punika malih

Ngaryanin paiketan jana mangda santih

Ngiring ajegang sang mérah putih

Dumogi sami rahayu kapanggih

Majeng NKRI ngiring sutindih

Yadiastun rambuté sampun putih

Nyama Braya

Yén makejang putih anggon gina warna ané lénan

Yén makejang selem apa gunanné warna ané lénan

Warna selem putih barak kuning miwah ané lénan makejang bagus

Déwata nawa sanga indayang cingakin

Sami warna pada sakti manut genah

Bianglala malengkung ngulangunin

Pakardin widhi ané ngangobin

Pitu luin warnan ipun nénten saling langkungin

Soang soang sampun makta taksu duké riin

Kunyit cekuh bawang kesuna

Isén mica jaé tabia

Bina rasa bina goba bina warna

Macepuk  dados basa

Makardi lawar sané jaen tan masisa

I raga manusa pada

Paican widhi sané mautama

Mabekel sabda bayu idep

Éling ring rwa binéda

Malarapan antuk Tat Twam Asi

Sareng sami maurip deriki

Nunas rejeki paican widhi

Dum pada makidik

Sing dadi loba lan iri hati

Napimalih mamati mati

Nyama braya ané puponin

Géntétang tangan dungkangang batis

Sinarengan ngawangun negeri

Manut swadarma soang soang

Sagilik saguluk sabayataka

Ngastiti bakti manut agama soang soang

Pancasila lan UUD 1945 langgeng satuuhan

NKRI siteng manguer nguer

Binéka Tunggal Ika sampunang lali

Pinaka sepat siku selantang margi

Nemu rahayu sareng sami

Kangin Kauh Utuh

Tolih ja badauh

Liu cara nak buduh

Luh muani mapunduh

Kenehné suba patuh

Minab engsap kangin kauh

Saling pisuh ngaé rusuh

Parilaksana sayan angkuh

Dini ditu saling tuduh

Mamunyi pati kacuh

Gumi endeh cara linuh

Niki titiang rauh sampunang katandruh

Makta pisusuh lan pangweruh

Idadané sampunang milu buduh

Élingang jasa pahlawan sané sampun tuyuh

Ngawangun Indonésia sané utuh

Uling kangin neked kauh

Indonésia masikian rumaket cara satuh

Indonésia gumi gemuh

Toya Amerta sing taén tuh

Mai luas maburuh mesuang peluh majemuh

Bedikin ngaé musuh yadiastun i raga tusing patuh

Pang sing melat menék makecuh

Pancasila anggén sasuluh

UUD 1945 sané patut duluh

Sang saka mérah putih tan dados latuh

Nusantara nénten runtuh

Bhinéka Tunggal Ika dados pamikukuh

Darma negara lan darma agama ané jujuh

Ngebug sakancan musuh sané rauh

Ngajegang Indonésia kukuh dan landuh

Budaya lan adat nutugang tuuh

Ngantos puuhé maikuh

Jengah

Peteng lemah

Sing telah-telah

Lan masolah melah

Apang sing énggalan wayah

Dini di duur tanah

Ipidan getih maliah

Masiat lawan penjajah

Nindihin gumi saling cahcah

Angkihan dadi panelah

Jengah

Jani dini suba dadi umah

Tongos i raga magenah

Da saling ulah

Mabinayan ento melah

Bhinéka Tunggal Ika sing dadi obah

Jengah

Swadarmané anggon ngayah

Momo angkara apang kalah

Pancasila utamaning manah

NKRI umah melah

Mérah putih sing dadi bah

Jengah

Penjajah suba pejah

Tegehang nunjuk mérah putih apang ngenah

Tusing dadi léngah

Teroris sayan ngelahlah

Ngiring makarya bungah

Ngawangun negeri aji manah lan tingkah

Sambilang ngaturang sembah

Apang sing kena raja pinulah

Sakondén ngungsi tanah wayah

Jengah

Titiang masumpah

Ngajegang pasikian pang sing benyah

Tresnan leluhur kondén mabayah

Alon alon ngontalang layah

Ngranayang saling temah

Da cara lintah

Ngalih amah

Ngisep rah

Nganti telah

Korupsi ento corah