Puisi-puisi I Gusti Lanang Sutéja Naréndra; Sélfi

Sumber Potrekan Saking Facebook 

Sélfi

Di jaba purané teeb   

Ada anak bajang makakeb

Malingeb bantené tingkeb 

Deha seléh nuutin gaya selfi terkini

Apang nganutin trén cara jani 

Cekrak-cekrék pakrébék

Sagét I Luh ngaséksék  

Kadén anak selfi

Tau tau éfilépsi

Celekotokané! 

Ortané I Dadong

I Dadong ngorta tidong-tidong

Guminé génjong

Kadang wargi pada wirang

Réh i dadong ngaku kaplegéndang

Ada ané ngilonin

Wartawané kasobyahin

Ada mangelingin

Koné I Dadong buka Cut Nyak Dien

Ané wirang ngoték menékang

Pemerintahé kapelihang

Uyut miyut

Ilat ilut

Politik

Magitik

I Dadong ngeh

Bogbogné katakeh

Sedih kingking

Ia ngeling

"Tuara kapelegéndang, 

Dadong sedot lemak pang rengkiang"

Sepi

Sing ada munyi

Ané wirang engsek buka geplak

Muané katamplak kaingsak

Ané katuding kedék glalang-gliling

Tunggang-tungging jungklang jungkling

I Dadong mogbog

Maka gumi kabelog-belog

Majarah

Gejor lan tsunami

Tuah pakardin widhi

Idup lan mati

Ngantiang paganti

Sujati widhiné nguji

Saja ké déwéké puguh tui

Ngamel kamanusané jati

Tondén nyat yeh mata

Mangelingin nyama braya

Jani suba dadi duratmaka

Mabungsur sakita kita

Dadi ngelah keneh pongah

Majarah sekaya sing gelah

Di guminé latig benyah

Mara ibi ngamé widhi apang ngemit

Angkihané apang enu kepit

Jani suba lalis ngelambit

Gelah pisagané untit 

Dija kamanusané

Dadi laksanané buka ubuhané

Kélangan wiwika,  mameteng budiné

I Gusti Lanang Sutéja Naréndra 
magenah ring Karangasem.