Geguat Sané Ngibur
Olih: IDG Trinandita
 |
| Sumber Gagambaran; lukisanku.id |
Ring aab jagaté sekadi mangkin geguat utawi tulisan sané serius utawi
sajan-sajan serius utawi seken sayuwakti saja, yéning saihang sareng geguat
sané iseng utawi gegonjakan sinah sané kaping kalih jagi kewacén dumunan.
Napi mawinan titiang matur sekadi asapunika, mapan yéning sané serius
wacén sinah ngamerluang pamineh tur pikayun sané nincap. Semaliha geguat sané
seken-seken serius nika ngawinang sang sané ngwacén mangda teleb tur sérius
midabdabin wacaané punika.
Boya ja nénten jagi kawacén geguat sané serius utawi seken sayuwakti saja
punika. Sakéwanten kawacén sesampuné wénten galah sané tiosan. Risampuné polih
mekedékan utawi polih ngibur angga. Minabang titiang ring pekibeh jagaté sekadi
mangkin geguat sané nénten terlalu serius utawi seken sayuwakti saja punika
nincap sané seneng ngwacén.
Sajeroning ngeruruh hiburan sané sanget kaperluang olih para janané
sekadi mangkin. Yéning uratiang tulisan utawi geguat bebanyolan, bebagrigan
sinah akéh sané nyenengin. Mapan irika iraga sareng sami polih ngibur. Napi
malih sang pengawi geguat punika presida ngawewehin geguat bebanyolan punika
antuk tetuek-tetuek utawi tutur-tutur sané mawiguna ring kahuripan
Yéning ring média cétak baosang wénten sané mawasta karikatur, gambar
sané baud presida ngawinang anaké nyingakin kedék tur terhibur. Punika taler
wénten humor utawi bebanyolan utawi cerita utawi satua lucu tiosan.
Yéning uratiang ring média cétak sekadi koran sinah ring dina Redité
wénten rubrik sané misuguhang antuk sastra sané medaging satua utawi cerpén,
puisi, punika taler sané mawasta obrolan santai lan bacaan humor utawi bebaudan
antuk kartun miwah tulisan tiosan.
Punika pinaka cihna risampuné sérius saking dina Senin ngantos Sabtu
mawinan ring dina Redité kedagingin antuk orti utawi geguat sané jagi presida
ngendurang urat syaraf pangwacén. Sané nyugjugin pangwacén mangda polih hiburan
sané prasida ngawinang pikayunané seneng tur raharja. Mapan ring sajeroning
kahuripan punika patut seimbang sané mawasta serius kapining sané mawasta
hiburan utawi malilacita.
Wénten anaké wikan nyantenang indik pentingnyané sané mawasta kedék utawi
tersenyum ulian hiburan utawi bebanyolan. Yéning prasida nyalanang sekadi
asapunika sinah jagi mapikolih umur utawi pajang yusa doh ring panyungkan.
Ulian sebeté sampun magentos dados liang.
Mangkin ngiring wacén conto puniki, sira uning iraga sareng sami prasida
kedék tur panjang yusa. Geguat puniki mamurda WISUDA, kaketus saking
pésbuk druwén Sutéja Narendra;
Wisuda ento, mula tenget. Sing
main-main! Wiréh wisuda maka cihna sisyané suba tamat, dadi sarjana sujana,
manut gelar akademik ané suba kapiolih. Ento mawanan dina wisuda ento
dahat kaapti, "Hari bahagia penuh haru yang menentukan masa depan" kéto
anaké ngorahang.
Buka dinané jani, I Agus lakar
mawisuda. Nuléngék mémé bapané ningalin pianakné menék ka panggungé. Ngembeng-ngembeng
paningalané, ningalin pianakné mabaju toga marérod ngantiang kuncir togané
kisidanga ka kanawan.
"Agus... akhirnya kamu berhasil
Nak" kéto méméné ngerenggeng, sambilanga ngusapin yéh paningalan aji
sapu tangan. Kurenané ngelut sada niman gidat, "Papa terharu,
Ma" kéto ia kisi-kisi.
Mbééé...boya ia dogénan ané masemu kéto.
Makejang rerama ané pianakné mawisuda dinané ento paliatné sedih. Saja masi,
bes pianaké nyidayang mragatang sekolah, anak tua kén ané tusing lega tur
bangga?
"Gedé Agus Dananjaya Surya Putra
Maha Bhirawa Kandanéka Rahadi Manuraya" mamunyi kalo kaloané ngaukin
pianakné.
"Pa... Giliran Agus Pa.
Ayo ambil gambar! Cepetan Pa!" patilangkeb méméné maekin
panggung. Tas kampékné ané gedé amun kisané ulung, sing
runguanga!
Cekrék... Cekrék... Cekrék.... Sénter
pamotrékané pakeblétblét buka tatité.
I Agus salamnina tekén anaké ané
ngawisuda.
"Selamat untuk Agus, kamu sudah
berhasil diwisuda. Setelah wisuda ini, kamu mau melanjutkan studi,
kan?" anaké ané ngawisuda matakon ramah pesaja. I Agus manggutan.
Buiiih... Hébat I Agus. Mara mawisuda, jani suba ia lakar melanjutkan
studi koné. Pasti melanjutkan ka És Dua!
"Agus mau melanjutkan ke
mana?" buin anaké ento matakon. Kenyemné manis ajér.
I Agus kejengat kejengit ngusapin ngéngés, laut
masaut.
"SD Negeri 5
Sibetan, Bu," saut I Agus anteb, seken pesaja!
Mimih.....déwa ratu agung... Sing
nyidang ngandet yéh paningalané. Tiang milu ngeling ningalin wisudané ento....
(Macang Rumah Cinta Seribu Jendela)
Asapunika sané prasida katur, majeng ring dané nruenang pésbuk titiang
ngaturang suksma riantuk sampun prasida ngibur ring wawidangan perpésbukan
druwéné. Ampura yéning wénten iwang. Dumogi prasida ngawinang bagia.
Anggara, 12 Juni 2018
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.
.jpeg)
.jpeg)
No comments