Puisi-puisi Pandé Jati; Jaya

Gagambaran I Gede Putra Ariawan

Jaya

Wibuh gebuh

Maulad tuyuh

Gupuh nutuh

Ngulati dayuh

Magulung gelung

Galungan makalung

Jaya katundung

Ratu mapayung

Kulit

makilit

ngakit kulit

untat untit mripit

wangsa cupit pait

sakit

warna mawarni jit

katah ngetah apit bukit

rérad rérod ngamel sepit

  

Joh

  

Joh pajalané mangukir

Tindakané nguci saling silir

Wates shastra ketes

Paglantes toyané empes

Pangapti kirang langkung

Ulap nekepin pangkung

Cekung ucapé degdeg

Ngapung tingkahé ngadeg

Leteh 

Matutuh neteh leteh

Sagara ngidung pakeh

Gunung maseseleh leh

Keleh-keleh masekar sabeh

Maniti mantra manah ongseh

Mangawi puri mapuara jejeh

Letuh matutuh peluh

Egar bingar makecuh

Kampuh kampih maikuh

Uduh sang mapituduh

Surya entasin damuh

Wulan masunar lemuh

Bhisama

  

Mupuk rńa ngukuh swarga

Agama nyaput mrana tiga

Warna mawarni ngampih ilih

WANGSA mamangsa nuwut pedih

Matiti pati nangun utpeti

Teleng tiling ulung malalung

Ngapung matungtung prungpung

Nyungsung masarung linglung

Matulung bhakti ngulah suwung

Pandé Jati
magenah ring Bangli. Mangkin dados pangremba ring Komunitas Bangli Sastra Komala.