Neraka di Longlongan Méjané
Olih:
Adé Ubaidil
![]() |
Sumber Gagambaran; www.saatchiart.com |
Tiang
sing bani mangunang Bli Dwi lan Aléssa ané pules di betén baléné. Mirib apa
kadén ané makada ia ajaka dadua matingkah buka kéto. Gegaén tiange tuah
melebengan lan mebersih. Paling sing, rikala majikan tiangé sedek pesu ngajak
kurenané ané baru, tiang nyidaang lebih aluh lan tenang. Bli Dwi suba ngerti.
Ia ngak ngajak ponakané ané mara matuwuh kutus tiban ento. Yadiastun ia sibuk
megaé, nanging ia nyidaang nyelaang galah teka ka umah bliné ené. Ento ané
ngaénang tiang sing kéweh lakar ngelaksanaang geginan tiangé.
Yén
sing pelih, Aléssa taé nyatua ngenénin indik betén baléné. Mara telu bulan
tiang megaé di umahé ené. Nanging ia énggal pesan akrab. Ada abesik ané ngaé
tiang sing demen, indik hayalané. Seinget tiangé, dugasé enu cerik ia tusing ja
kekéto. Iasin kenehné wajar dogén. Jani ia ngorahang, di betén baléné koné ada
istana ané méwah. Ditu ngoyong bonéka-bonéka raksasa. Ada bonéka kelinci ane
jerijin limané dadi sepsep lan daar cara naar coklat. Lantas bintangé
kelap-kelip cara kunang-kunang masi pesu uli ditu. Ah, isin keneh anake jani mula
samben. Tiang biasané sing pedili tekén apa ané orahanga tekén Aléssa. Nanging
Bli Dwi ngenahné aabar pesan. Ia nyak seleg ningehang, kekéto biasané ané
tepukin tiang.
Petengé
ene, jam 20.18, yén dadi té tiang ngorahang, mirib Bli Dwi lan Alessa leleh
disubané suud mengkeb-engkeban. Dadiné wajar yéning kanti pules di betén
baléné, wiadin di tongosé lén ané demenina. Justru ené melah. Bli Winarno kali
jani biasané suba suud megaé. Tiang nyobak nélpun, ah, nyén nawang ia nyak
melali mai akesep.
“Halo,
bli....”
“Marni?
Ada apa?” kadingehan munyiné Bli Winarno di télpuné ané ngaénang layahé caket.
“Halo,
Marni?” ia buin nyumunin matakon.
“Oh,
bli, Ampura.”
“Nah
sing kenapa. Ada apa kali jani nélpun?"
Tiang
keda-keda ngorahin ia melali mai ka umah majikané, nanging apa pelihné yén cobakin?
“Nyidaang
ketemu, jani? Akesep dogén, tiang kangen,” tiang mamunyi manja.
“Iang
nu meli yeh galon...”
“Sibuk,
né?” tiang memunyi.
“Tusing.
Suud ené suba dadi merérén. Dot ketemu dija?”
Yén
rasaang umpan tiangé totonan berhasil.
“Majikané
sing ada, ada keperluan uli aminggu ané suba liwat. Yén nyidaang mai, antianga
ya di pintu paoné nah....”
“Yakin
aman to?” Mas Winarno ngenahné ragu. Tiang nyekenin. Ia setuju. Ia ngorahang
lakar teka disubané suud ngisi yéh galon. Krana yén misi mulih ka umah majikané
pasti kéweh maan ijin pesu. Untung pesan déwék tiangé jani!
Tiang
masi suba ngorahang tekén ia indik Bli Dwi lan Alessa. Bli Winarno maan takut,
nanging tiang suba ngorahang yéning ia tusing ja lakar dadi penyantul. Lan
rikala di jumahné, Bli Dwi kapah nengokin tiang rikala melebengan di paon.
Yéning Aléssa bangun, aluh pesan nabdabang. Satuaang dogén indik ané fantastis
lan tusing masuk akal.
Tiang
ngojog ka kamar akesep. Nganti penganggo lan kuala mepayas. Maklum, tiang mara suud
melebengan lan ngumbah piring. Paling sing bon sipah tiangé saru baan semprotan
lengis miiké ané anu mesisa atenga.
Bli
Winarno ngorahang lakar neked buin dasa menit. Uli kamaré tiang ngojog ka paon.
Nanging setondén ento, tiang nengokin kamarné Aléssa. Mastiang apaké ia bangun
apa tusing? Tiang mekeneh yén petengé ené tuah galah tiangé. Tepuk tiang ia enu
pules di betén baléné. Yén saja beneh apa ané orahanga tekén Alessa, tiang
tetep enu penasaran tekén unduké totonan. Uli munyiné dogé jelas ento sing
mungkin.
Tiang
nganggep, unduké ené ulian Aléssa ané tusing ngelah timpal--apaké di jumah
wiadin di sekolahné.
Sambil
ngantiang Bli Winarno, tiang ngelah pengalaman ané ngelek-elekin déwék tiangé. Apabuin
tepukina tekén Aléssa.
Dugasé
totonan, majikané sedek ada di jumah. Tiang sing nawang apa gegaéné, ané pasti,
ia setata megedi rikala semengan, jemput anak muani makumis lan muané mirip Bli
Winarno lan teka suba peteng. Dugasé totonan ia tusing megaé.
Lantas
ia dot milu ngatehin Aléssa ka sekolah. Tiang suba biasa negakin mobil jemputan
krana majikan tiangé tusing ngelah mobil lan mobilné suba adepa dugasé tiang
terimana magaé ditu. Ia nyéwa anak ané ngatoang wiadin nyemput Aléssa ka
sekolahan--nanging mobil ané anggona nyemput melénan ngajak mobil biasané.
Tiang
ajak mekejang neked di sekolah. Rikala ento, kepala sekolahné Aléssa sedek
majujuk di obag-obag sekolahé. Mula tusing cara biasané. Majikan tiangé
mapengidih apang tuunanga di paak obag-obag sekolahé--pas di tongos kepala
sekolahé majujuk. Tiang lantas nawang uli asistén pembantuné ané lénan,
ternyata majikan tiangé kenal melah ajak kepala sekolahé. Pantesan dugasé ento
ia langsung maakin lan ngorta. Yén tingalin uli porem muan Pak Kepala Sekolahé,
ngenahne tusing sreg, apabuin ento di lingkungan sekolahé.
“Atoang
Aléssa ka kelas nah Marni,” kéto ia mamunyi.
“Nggih,
bu...”
“Mémé
lakar kija?” pianakné matakon polos. Méméné tusing masaut. Tuah nelik dogén
apang Aléssa nyak ka kelas. Nyaru-nyaru tiang ngintip. Majikan tiangé ajaka ka
ruang kepala sekolah. Kuang lebih limang méter johné uli déwék tiangé, majikan
tiangé mesenin, “malunan suba mulih, baang ia malipetan nyemput mai,”--ia ané
orahanga totonan tuah sopir ané séwana, lan ngantiang di obag-obag sekolahé.
Majikan tiangé terus majalan ajak kepala sekolahé.
Buin
maniné, rikala tiang ngatoang Aléssa ka sekolah, ibu-ibu lan asistén rumah
tanggané ngorta. Orahanga, ibi, dugas majikané mulih, kurenan kepala sekolahé
maan nepukin majikan tiangé mamanying-manyingan di ruang kepala sekolah.
Kurenané
kebenengan singgah ngabaang ané muani bekel. Ia medalem Aléssa, krana ia
mamunyi, “di kelas Aléssa orahanga panak pelakor, apa maksudné ento mbok?”
tiang nyobak ngaénang ia tenang, apabuin rikala ia ngorahang, “pokokné Aléssa
sing nyak buin masuk. Sing ada ané nyak metimpal ngajak Aléssa!” Tiang ngerayu.
I mémé bisa gedeg yén Aléssa bolos, kéto tiang mamunyi.
Pergaulané
jaman jani mula suba melénan ngajak ipidan, uli dija ia nawang istilah pelakor
utawi perebut laki orang ané jani sedek ramé. Bahkan anak ané enu cerik masi
milu ngaé gosip.
Uli
sekat ento, Aléssa setata nagih mulih énggal-énggal. Geginané jani tuah
meplalian bonéka lan ngorta ngajak bonékané totonan. Bonékané totonan belianga
tekén bapané ané jani suba dija kadén. Disubané ngantén ngajak majikané, bapané
Aléssa kena PHK lan merantau kanti kayang jani ondén taén mulih. Rikala gedeg, majikané
setata nguyutin pianakné totonan. Mirib ulian ento ané ngaénang Bli Dwi
prihatin lan setata mélanin Aléssa. Tiang masi pepes uyutina tekén majikan
tiangé yadiastun apa ané gaén tiang suba beneh. Lan disubané ia ngantén, duang
minggu ané suba liwat, rasa gedegné sayan rered.
Tiang
suba di paon. Dingeh tiang ada anak ngetok pintu. Ento pasti Bli Winarno. Tiang
madengokan malu ka lantai dua, lan tepuk tiang Bli Dwi lan Aléssa ondén bangun.
Aman. Tiang mukak pintu.
“Adi
mekelo sajan mukak pintu,” Bli Winarno ngerémon.
“Ampura
bli, tiang nu nengokin…” ondén suud mamunyi, ia langsung maakang awakné ka awak
tiangé. Dinginé di paon dadi anget. Ondén siap, sagét ia suba maakang bibihné
ka bibih tiangé. Lantas limané ngrépé ka tangkah tiangé. Limané maka dua mejek
tundun tiangé. Kadirasa pintun paoné ondén tutup tiang. Angin petengé macelep
ka tengah. Bli Winarno tusing peduli. Ia nuludang awak tiangé lan maplisahan di
betén meja makané.
Ia
jani di duur tiangé. Ménggal-énggalan ia mukak celana lan bajuné. Angkihané
noos. Tiang marasa yéning jani aman, apabuin majikan tiangé ngorahang lakar
mulih buin mani semengan. Tiang sing kuat, lan tiang marasa ené tuah suargan
ané orahanga tekén Alésaa. Suargan ada di betén méjané, boyaja di betén baléné.
Tiang
nawang yéning Bli Winarno suba ngelah kurenan, nanging kurenané ngoyong di
désa. Artiné, yén ia suba merantau berarti ia buin dadi anak truna. Lan tiang
masi makeneh yéning Aléssa tusing perlu inguh yéning nyalanin idup cara kéné.
Sing perlu ngarepang guminé setata matingkah melah, termasuk méméné ané dadi
pelakor totonan. Krana dadi pelakor ento maang keuntungan ketimbang dadi
kurenan sah. Ia sing perlu tanggung jawab, krana tuah perlu rikala dot
ngrasaang demen, cara petengé jani.
Munyiné
Bli Winarno masi sing kalah keras ngajak munyin tiangé. Tiang mulai takut
yéning Bli Dwi ajak Aléssa ané ada di lantai 2 bangun.
“Suudang
bli, suudang…”
Peluhné
nyrékcék. Ia tusing rungu lan terus ngoyag awak tiange, “bin kesep dogén, suba
nagih pesu,” kéto ia mamunyi.
Ané
jani seken-seken di betén méja makané. Kursiné kakirigang abedik. I raga suba
nyansan liar. Lacur, dugaé totonan tiang ningeh anak majalan uli lantai dua.
Lan mebarengan ngajak ento, tiang ningeh munyin mobil magereng di natahé. Tepuk
tiang Bli Winarno takut. Bin kutus detikné ia suud ngoyag awak tiangé. Tiang
ajak dua leleh. Ondén maan bangun lan nyaluk penganggo, sagét ada anak makaik
di pintun paoné. Uli tengah, masi ada anak ajaka dua ané majalan ka paon lan
makaik sibarengan: “Marniii!!!”
Cilegon, 01 Maret 2018
—Satua puniki wantah walesan saking satua
cutet sane mamurda “Surga di Kolong Ranjang” kakawian Abdullah Salim Dalimunthe
sané kawedar ring Media Indonesia, 25 Fébruari 2018.
No comments