Puisi-puisi I Wayan Supadma Kerta Buana; Smartphone

Sumber Potrekan; www.kaskus.co.id

Pendidikan

Nelebing sastra né mautama
gumanti kewajiban wargané sami
maka tetujoné negarané
ngawinang panelahné liunan
subé ké patuh sekadi arepang?
ento ané jani tegarang resepang
apa buin ulian gratis ngaenang kenehé tis
wajar sembilan tahun patut laksanayang
pendidikané ngewangun gumi.

Kadi Toya

Ngerincik ngalir pemarginé tan kawates
ening makenir ngetisin gumi
tanpa rupa, luwih guna
maka tirta ngehayu-hayu
nepasin kapiambeng manusané.

Rumasatang toya pengetahuané di guminé
pekardi Sang Hyang Widhi
maprabawa Ida Bhatara Sang Hyang Aji Saraswati
kadi pemarginé toyané
ngelimbak tan telas selantang tuwuh
musnah hilang awidyané.

Smartphone

Disubané smartphone dadi raja
smartphone sube dadi kebutuhan
ngeliwatin kebutuhan pokok
kanti engsap tekén déwék
ulian megantung tekén i smartphone.

Dija-dija pesu ngisiang smartphone
limané sibuk ngetik
ninggalane kanti tusing makijepan
sube kanti bongol ningeh tekén anak
ulian sayangé tekén smartphone kaliwat.

Mula liu kawigunan smartphone
anggon masawitra lan mabraya
kéwala tegarang da kanti engsap
apang tusing manemu ala
ulian pelih nganggo smartphone.

Smartphone anggon melajah
sekatah paplajahan mapunduh ditu
melahang-melahang nganggo
pilah-pilih né dadi duduk
apang ada anggon melajah.

I Wayan Supadma Kerta Buana
Magenah ring Karangasem