Lawat-lawat: Pondok Kurungan

Olih: IGA Darma Putra

Sumber Gagambaran: richo-docs.blogspot.com

 Pondok punika genah masayuban. Sabeh nénten belusan, kebus nénten kebusan. Ring pondok anaké nunas paneduh. Manawi wénten lelipi sané mengkeb ring selagan taru sukun, sinah nénten kaabi-abi jagi kacepolin. Minab wénten macan ring batan taru nangkané, sinah nénten jerih jagi kasagrep sadaweg leplep. Mawinan, patut ngaturang parama suksma ring pondoké sané sadina-dina sareng ajak ngentasin lemah kalawan peteng.

Saking tengah pondoké maraab somi, semeng-semeng kantenang aine nyentér ngalintangin somi sané matumpuk-tumpuk. Sunarnyané galang kantos ka tengah pondoké sané peteng dedet. Yéning petengé rauh, sinah pisan kenyitan bintangé saking selagan tumpukan sominé. Bilih-bilih sadaweg galang bulan nuju purnama sasih kadasa. Saking balé pasirepané intip bintangé sané nyénter punika. Langité peteng sakéwanten galang. Pondoké galang sakéwanten peteng. Becikan tunas sunar bintangé punika genahang ring langit-langit duéné.

Mategepan pisan sané kayun nyunarin pondok kurungané, wénten surya, candra miwah lintang teranggana. Sakéwanten patut taler tiaganin sunaran suryané. Santukan ring jagaté pecaknyané wénten sané mawasta surya kembar. Suryané asiki kéwanten, sampun ngawinang jagaté galang, ri sapunapiné panes bara. Napi malih yéning suryané kembar, sinah panes barané sayan-sayan panes kadi kalebu ring cambra goh muka manut pitutur panglingsiré riin.

Patut taler tiaga sareng sunaran candra sané kocap alus. Sunaran candrané sané ngawinang toyané ngalencok. Sagarané sayan-sayan osah, keni sunaran candra sané alus punika. Iwasin becik-becik, ri sapunapine sunaran candrané sané ngawinang embas rasa resres. Napi malih yéning sunaran candrané ri tatkala purnama madaging munyin asu ngongkong ngaung-ngaung. Asuné ngongkong nyapatin anaké sané mamargi alon-alon ka pura Dalem jagi ngaturang bakti ring Ida Bhatari. Nénten uning titiang, napi minab sané jagi katunas ring Ida sané kocap bares tan kadi-kadi. Manawi wantah ngetut pamargin ida sang Sutasoma sakadi sané kacaritayang ring kakawiné. Sang Sutasoma kocap ngaruruh galang ring petengé santukan kapetengan pikayunané sané sapatutnyané galang.

Saking pondok kurungané mangkin tekepin maka sami jelanané sané sarahina mungkaban, mangda nénten wénten angin sané ngaranjing utawi medal saking jelanané punika. Sakéwanten mangda tiaga taler ngungkabang jelanan tiosan sané sué nénten naenin kaungkabang, mangda becik pondoké. Mangda melah antuk nabdabang lawang sané sué pisan sampun empet. Saking irika mangda becik anginé ngaranjing miwah medal. Yening sampun becik antuk nabdabang sabang kekawané bresihin, punika taler buk sané neket ring pondoké.

Pondok kocap genah masayuban, sané nuenang pondoké leplep sirep. Lali ngupapira karang santukan kategul antuk kemelahan ipian. Lali nandur-nandurin karangé antuk bungan menuh sané miik ngalub. Utawi nandurin karangé antuk jepun miwah sedah. Sedahé sané sentér surya kuning pakrenyeb. Becik-becikin nandur sedah, sira uning benjang pungkuran embas pikayunan jagi nugtug pamargin panglingsiré nginang. Yadiastu barak makéraban cangkemé, nénten sapunapi. Santukan ri sampuné lingsir, napi kari wénten rasa elek madue gigi barak? Manawi nénten sangkaning giginé barak, wantah sangkaning iduhé barak ngerab kadi api ngabar-abar. Jerih kadalih ileh-ileh makta api ngendih ngawinang galang.

Saking tengah pondok kurungané mangkin kayun-kayunin. Napi sané negul ring tengah ukudané? Napi peteng, napi galang? Yéning petengé negul, ngiring mangkin kidemang panyingakané. Yéning galangé negul, ngiring mangkin kedatang panyingakané. Yéning tegulané wénten ring selagan galang miwah peteng, becikan ngicir. Nyaru-nyaru kedat, nyaru-nyaru ngidem, unteng paliaté nuluh muncuk gunung magoa. Yéning wénten anak sané nyapatin, sampunang wangdé ngicir. Sadawegé ngicir, élingang sampunang lali. Ukudané kantun rebut legu, wetengé kantun makréok. Manahé kantun ngumbara, kalapu-lapu nyujuh langit matumpuk pitu.

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.