Puisi-puisi I Ketut Suwindu; Nyiksik Bulu

Gagambaran Wnar Ramelan

Éling

Nguni…

Guminé Lidek

Layah I Duratmaka Ngélél di Bali

Ngaba Keneh Ané Tawah

Kadi Nawah Kenehé Salah

Marikosa Saisin Keneh

Marikosa Saisin Basang

Ané Beneh Dadi Pelih

Ané Pelih Dadi Beneh

Élingké?

Daweg I Dadong, I Pekak Lan Nyamané

Mabéla Pati Nindihin Gimi

Ulian Wirang Lan Jengah Ka Nyah-nyah

Apang Sida Guminé Landuh

Jani…

Guminé Degdeg

Nagarané Kasurat Rajeg

Idupé Nyansan Jegjeg

Buletang Kancuté, Buletang Kenehé

Ngiring Masikian

Nyikiang Nagarané Mangda Rajeg

Tatwam Asi

  

Guminé Suba Nyangsan Wayah

Enu Cerik Suba Pawah

Ané Beneh Kadén Tawah

Ane Pelih Marasa Ẻlah

Ipidan Sekancan Kenehé Luih

Laksanané Adung Nganutin Linggih

Bina Agama Tan Bina Katolih

Stata Kadasarin Asah Asuh Asih

Né Jani Lan Jumunin Alih

Ané Melah Anggon Sundih

Ané Jelé kutang Kapasih

Nyapa Kadi Aku Baang Kampih

Apang Idupé Bagia Tan Pasedih

Nyiksik Bulu

Ipidan Peluh Ngetél Paketel-tel

Mabéla Pati Nindihin Gumi

Tios Adat Tan Ngranayang Pegat

Béda Agama Tan Kekeh Pabeneh

Jani, Malénan Cara Ipidan

Katah Pamatut Tan Kapatutang

Cara I Goak Ngadanin Iba

Goak-Goak Nyapa Kadi Aku

Jaman Kaliyuga Patut Yatnain

Apang Tusing Salah Lampah

Kadung Belus Kéweh Ngetuhang

Bhinéka Tunggal Ika Gisi Tekekang

Uli Jani Lan Tegul Momoné

Saputin Baan Sastra

Pancasila Anggon Dasar

Nyama Adung Guminé Luung

I Ketut Suwindu
embas ring Gianyar, 12 Oktober 1978. Magenah ring Banjar Penaka, Désa/Kec. Tampaksiring, Gianyar, tamat S1, Bahasa Daerah Bali, mangkin dados guru ring SMAN 1 Manggis.