Puisi-puisi Mas Ruscitadéwi; Sembah

Potrekan Manik Sudra

Sembah

saking genah
katur sembah
wantah manah
yakti tan sinah

boya upah
boya sumpah
boya jinah
boya tanah
wantah lampah

tanah natah sembah
sumpah manah élah
lampah salah tampah
kalah kalalah-lalah

iriki tiang nyumbah
saking tambet maliah
dakin awaké katah
malih maguru akah

                                                                            

Mamaling

Ampura tiang nyelang galang
Medasin sasolahang wayang
Sané klingkup kelir ngandang
mamaling éling sang dalang

Yakti yukti kawantu galah
Makébék ngrereh selah
Ngéréd tur nudut manah
Pét rauh ida sané kasinah

Ampura titiang mamaling corah
Engges nyimpen masoca mirah
Mengkeb pinaka tatu ring sirah
Ngemasin maluah, ngutah-utah

Wengi

Wenginé nglangi
Mitehin sunari
Ngeberang daki
Dayané i tuni

Mrika mriki nindihang munyi
Matata basa jati nguber kanti
Malampan bulan macara seni
Masaud munyi tresna matangi

Duh, wengi mula saja jati
Lelakuté masawang dedari

  

Gadang Lumlum

Gadang lumlum madestar putih
Mamasa arum matitian akatih

Maguét gucek manah jengah
Ngentasin lawat ambu kakah
Matulis carita aksara ngahngah
Maguru giri gung geng lampah

Gadang lumlum mauap getih
Di pasih nguber sasih, kampih

Mas Ruscitadewi
malajah Arkelogi, Filsafat, lan Keagamaan ring Institut Hindu Dharma Negeri Dénpasar. Sajabaning nyurat puisi, lagu, miwah satua cutet, dané taler dados guru filsafat majeng ring narapidana sané pacang kaukum mati. Dané taler ngajain alit-alite sané keni virus HIV/AIDS ring Yayasan Kerti Praja, miwah dados Kurator ring Gelar Seni Bali Mandara Nawanatya.