Puisi-puisi IDG Trinandita; Suung

Gagambaran Manik Sudra

1) Dauh

Endah kangin engseb kauh

Uling semeng ngantos peteng

Semeng megedi peteng rauh

Ngaruruh unteng lan isin weteng

2) Sujati

Wantah magenah ring ati

Malarapan ajah ajah suci

Saking manah sané sujati

Ngulati sané mawasta shanti

3) Sutrepti

Sakadi pengapti para jana sami

Ngamargiang sahananing pangubakti

Nunggalang pelaksana lan pangrastiti

Ngaryanang jagaté sami sutrepti

4) Bali

B ecik tur asri

A jeg miwah sutrepti

L uwih madasar adat budaya

I ndiké punika patut i raga jaga

5) Bakti

B ukti ngarastiti ring pekayunang

A nggén  serana sané nyihnayang

K atur ring Sang Hyang Embang

T ata titi mapinunas galang apadang

I ndayang sarengin muspayang

6) Keneh

Keneh cara panah melecat

Malecat cara keber pesawat

Makeber becat saling peliwat

Uberin terus tuara ja bakat

7) Lingsir

Lingsir pastika jagi teka

Idupe tuah sekadi asapunika

Sampunang melaksana

Merasa kuat sakti kabinawa

8) Lali

Lali maarti engsap

Engsap tekén geginan

Geginan idupe jani

Jani dini ingetang

9) Suung

Suung mangmung

Cara bungbung puyung

Yéning kenehé bingung

Tongos luung tuah suung

10) Guru Rupaka

G edé karasa

U tang iraga

R éh kapiara

U ling belingané

R ungu kén tutur

U li rerama

P abedikin piwal

A pang idupé rahayu

K antos kawekas

A ntuk subakti

  

Buda, 3 Januari 2017

I Déwa Gedé Trinandita
wantah guru ring SMPN 2 Banjarangkan. Dané ngajahin mata pelajaran matematika. Seneng nyurat saking SMA sané kaanggén ring mading miwah koléksi pribadi.