Puisi-puisi I Kadék Adhi Dwipayana; Pitutur Guru Sujati

Potrekan Olih Manik Sudra

Tambet Kalintang

Guru, titiang bimbang

Parilaksana napi sané sandang icalang

Napi sané patut titiang letebang

Indik mangruruh Shang Hyang Aji Wenang

Apang tusing kaon pajalan titiang sakayang-kayang

Guru, ampurayang titiang

Antuk tambet sané kalintang

Lugrayang titiang nunas titi pangancang

Apang polih sundih sané galang

Sida ngamargiang dharma kasandang

Guru, mangkin titiang manunasang

Mangda lédang

Asung nugraha menyundarang

Daging sastra agama ané terang galang

Mangda nénten titiang kasengguh pamialang

Pitutur Guru Sujati

Melid guru mapitutur

Ngawé ngelantur

Pitutur rapos jujur

Melahang jani mirengang

Sekenang

Telebang

Icepang

Waspadayang apang pasti

Simpen tuturé di hati

Antuk manah sujati

Wantah kerti lan bhakti

Kaping Shang Hyang Parama Aji Saraswati

Ida pastika ngicén sidhi sujati

Ento pinaka senjata pasupati

Nyundihin pamargi kala ngentasang titi

Anggén ngiket indria sami sané mamukti

Apang sida ilang sekancan irihati

Sinah hidup ngamanggihin bukti

Pinaka genah sané yukti

Sutrepti gumanti shanti

Jiwa lan hati

Sané sandang bekelang mati

Ngayah ring prajapati

  

Galah Katah

Peteng lemah Bapa pidan ngutang lampah

Di tengahé uma ngalih amah

Yadiastun kapah nawang umah gelah

Kenehé jengah

Ngarepang cening ngidang tegeh masekolah

Apang ngelah genah melah

Bisa masolah laksana melah di gumi wayah

Jani enu ada galah

Selah katah

Melajah hidup beneh melah

Manyama braya apang élah

Jani suud makeneh ngéndah

Makarya  tingkah  tawah

Magaya hidup méwah

Mamunyah

Miyegan ajak tugelan jumah

Ngadep tanah ka penadah

Tanah jani suba telah

Tuah nu ada natah lan sanggah

I Kadek Adhi Dwipayana
embas ring Br. Lungsiakan, 1 November 1989. Mangkin magenah ring Br. Lungsiakan, Kedewatan, Ubud, Gianyar. Email : adhidwipa88@gmail.com