Sirep Ngajak Mémé

Olih: I Gedé Putra Ariawan

 

Sumber Gagambaran; id.pinterest.com

“Nyén demen sirep ngajak mémé?”

Tiang menékang lima. Makejang timpalé di kelas matolihan. Diastun liu anaké ngedékin, tiang tusing elek. Mula saja sabilang peteng tiang sirep ngajak mémé.

“Nyén demen mecel-mecel nyonyo mémé?”

Tiang buin menekang lima, kadéna elek. Ngudiang elek? Ulian yéh nyonyo tiang bisa idup. Tiang boya pianak ané elek ngakuin mémé. Apa buin lakar takonang? Nah, énggalang pesuang apanga lega keneh cainé makejang.

“Nyén tusing ngelah bapa?”

Tiang tusing nyak menékang lima. Prajani panes kupingé lamun ada nakonang bapa. Timpal tiangé di kelas buin matolihan, kadéna nyak tiang menekang lima. Makejang siep, sing ada bani mamunyi.

Tiang lantas majujuk, majalan adéng-adéng ka malun kelasé. Di duur méja guruné tepukin tiang ada pot cerik misi bunga malakar aji keramik. Jemak tiang pot bungané ento. Prajani nerugtug tangkahé, awaké kebus, sarasa Sang Bayu sampun ngincegin awak tiangé.

“Aaaaah…!” kéto tiang makraik duur méjané. Liman tiangé suba magembelan ngisi pot bungané. Ngénggalang tiang makecos tur malaib ka dori nyagjagin anaké ané itunian matakon ento.

“Priaaaaak!” Pot bungané matinggah di sirah timpal tiangé.  Sagétan ada getih ngecir uli durin sirahné. Cara ada pancoran cerik mawarna barak, awakné aukud maliah uyak getih.

“Priaaaaak!” Buin cepok pot bungané matinggah di muanné. Uli cunguhné jani ngecir pesu getih. Timpal tiangé ento lantas bah di tehélé. Sirahné lantas kaantepang tiang ping telu kanti ngalemet. Makejang timpal tiangé di kelas makraik tur ngeling jerit-jerit.

***

Tiang tusing tamat SD. Timpal-timpalé di sekolah ngejohin tiang. Sasukat kejadianné ento, i mémé sasai ngajak tiang ka dokter. Demen san dokteré ngajakin tiang nutur. Tiang tusing baanga ubad apa buin suntika ditu. Baanga vitamin mawarna-warni dogén, ané inem ping pindo, semengan mara bangun lan petengné makire sirep. Lengut san satua Pak Dokteré ngaé keneh tiangé dayuh. Malénan san ngajak i bapa jumah ané bangras, kenyat, tur demen ngaé i mémé ngeling. Tiang gedeg tekén bapa.

I mémé sasai nutur, tiang sing baanga nyakitin anak, apa buin kanti mamati-mati. Sing baanga masih tiang nyakitin anak luh, wiréh anak luh maraga suci, maraga ibu pertiwi ané patut kanjunjung lan kasungsung. Lamun nepukin anak luh sedih, patuh asané cara nepukin i mémé ngeling. Ento makada tiang sayang anak luh, sayang tekén mémé.

Uli cerik tiang demen ngajak mémé. Dija-dija ngajak mémé, maplainan ngajak mémé, medaar ngajak mémé, manjus ngajak mémé, macanda ngajak mémé, kanti sirep ngajak mémé. Tiang kelih ulian mémé.

Makiré sirep, mémé sasai nyatua i siap selem. Satuané kaingetan neked jani. Satondén satuané pragat, tiang cucud matakon. Lamun suba wadih, ngenggalang tiang ngelut awak i mémé. Sing nyak leplep sirepé lamun sing maan ngusud nyonyo. Nyaru-nyaru lantas liman tiangé pati grépé apanga maan ngusud nyonyo mémé. Tiang mula nak muani manying, manying tekén mémé.

I mémé jani suba tua. Malénan san cara pidan, parasné ayu, siteng, tur becat nyemak gaé. I mémé taén macerita, uli bajang ia biasa idup padidi, ngelah kios cerik di peken tongos madagang buah lan kabasa. Ulian ento miribang i bapa kacantol tur ngantén ngajak mémé,  kanti ngelah pianak cara tiang.

 “Ngudiang mémé sayang tekén bapa?”

I mémé sasai engsek tangkahné lamun tiang matakon kéto. Awak i mémé jani dingin, kulitné ngetuh, layu, tur kisut. I mémé sasai mabesan, pidan ja ia luas ka gumi ngayah, ingetang san masambat ngajak i bapa. Sing baanga tiang engsap tekén bapa padidi.

“Tiang gedeg tekén bapa!” Kéto tiang masaut.

Dot asané jani tiang ngalih i bapa lantas nyekuk baongné, nanjung sirahné, nyagur basangné, ngantepang muanné ka tembok, nyangklik limanné di metén. Lamun suba macangkling, tekep bibihné, da baanga uyut, da baanga nasi, da baanga ngeling. Lamun bani ngeling, buin antepang sirahné ping telu kanti ilang elingné.

“Ngudiang mémé tusing ngalawan?”

I mémé tusing nyak masaut. Yéh paningalané i mémé membah sakadi bulakan cenik, nyrékcék di pipiné.

 “Ampura mé…” Dugasé ento tiang enu cerik, tiang tusing nawang apa, tiang tusing unduk.

 Sasai tiang matakon tekén iba padidi, apa sujatiné pelih mémé? Ngudiang i bapa nyekuk baongné i mémé? Nanjung sirahné? Nyagur basangné? Nyangklik limanné?  Lamun suba macangkling, tekepina bibihné, sing baanga uyut, sing baanga medaar, sing baanga ngeling. Lamun bani ngeling, sirahné i mémé antepanga ping telu ka temboké. Ngudiang mémé sing ngalawan?

Tiang taén matakon ngajak i bapa “Nguda bapa nyakitin mémé?”

I Bapa tusing masaut, mabalik pedih tur nyemakang tiang sampat. Tigtiga awak tiangé kanti beseh tur telah pesu enceh.  Tiang tusing bani ngeling. Paida liman tiangé, pejanga di ampiké. Yéh paningalanné kanti tuh ulian kaliwat jejeh.

Tiang inget, uli tengah ampiké nolih i mémé enu macangkling. Buin kesepné i bapa mamaksa ngajak mémé ka tengah kamaré. Mémé tusing nulak, tusing pedih, tusing ngeling, tusing bani mamunyi. Buin kesepné mémé tekén bapa ngematiang suluh. Tanglus san madingehang uli sisi, angkihan i mémé makepung-kepungan ngajak i bapa, cara anaké negakin jaran. Buin kesepné mémé pesu uli tengah kamaré, ngalih tiang ka tengah ampiké tur ngajakin tiang sirep.

Prajani tis sirepé ulian mémé teka. Nyaruang  liman tiangé ngrépé apanga maan ngusud nyoyo. I mémé tusing pesu munyi, paningalanné puyung,  jantungné nerugtug, peluhné nyrékcék tusing mabo cara biasané. Tiang nawang, né boya peluh mémé nanging peluh i bapa. Ngudiang peluh bapa bisa neket di awak mémé?

Buin maniné masi kéto, i bapa teka mulih ngajak timpal-timpalné. I bapa buin nyemakang tiang sampat, tigtiga awak tiangé kanti sebuh tur pejanga tiang di tengah ampiké. Tiang tusing bani ngeling. Tiang nolih uli di tengah ampiké, mémé ngayahin bapa lan timpal-timpalné sedeng matuakan.

Sakabesik liman anaké ento nyokot awak i mémé. I Bapa tusing pedih. Buin kesepné anaké ento mamaksa ngajakin mémé ka tengah kamaré. Mémé tusing nulak, tusing pedih, tusing ngeling, tusing bani mamunyi. I bapa makenyem dogén nepukin mémé macelep ka tengah kamaré ngematiang suluh. Tanglus san madingehang uli sisi, angkihan i mémé makepung-kepungan, cara anaké negakin jaran. Magiliran sakabesik anak muani ento ka tengah kamaré.

Buin kesepné mémé pesu uli tengah kamaré, ngalih tiang tur ngajakin sirep. I mémé tusing mabayu. Prajani tis sirepé ulian mémé teka. Nyaruang  liman tiangé buin ngrépé ngusud nyoyo. Peluh mémé mabo tuak, tusing cara biasané. Tiang jani nawang, né boya peluh mémé apa buin peluh i bapa, né peluh anak lén. Ngudiang peluh anak lén bisa neket di awak i mémé?

Satondén siapé makruyuk mémé suba bangun. Ngénggalang mémé nyangkol awak tiangé ané enu leplep sirep ngusud nyonyo. Mémé ngajakin tiang malaib ka tongos ané galang. Buin kesepné, tiang ajaka i mémé atehina mulih ngaba mobil roda patpat misi lampu kebiah-kebiah  ba duurné. Anaké ramé teka mulih.

“Ngudiang i bapa macangkling mé?” kéto tiang matakon.

Mémé tusing masaut. Sasukat ento, tiang tusing taén nepukin bapa.

***

Tiang jani suba kelih. Suba nawang selem putihé dugasé ento. Dija ja mémé jani, ingetang san jelék melah idupé pidan. Tiang tusing taén maseselan, wiréh mémé suba ngebang tiang pajalan. Tiang sing ngidang ngwales tresnané pidan. Mémé ané bisa nerima jelék melah tiangé dadi pianak.

Diastun tiang tusing tamat SD, mémé tusing pedih, tusing elek ngakuin tiang pianak. Sing pegat-pegat tresnané kanti iraga mapisah ulian mémé suba magedi luas ka guminé wayah.

Mémé, tiang jani suba kelih, suba bisa ngalih pipis. Ento makejang ulian mémé.

Sasukat mémé ngalahin. Tiang satata padidi, sabilang peteng setata dingin, kenehé paling, bayuné inguh. Prajani inget dugasé cerik, leplep sirepé ulian mémé. Ngelut awak mémé, ngebonin peluh mémé, ngusud nyonyo mémé. Diastun timpal-timpalé ngedékin, tiang tusing jejeh,  tiang tusing elek. Ulian mémé tiang idup, ulian mémé tiang nawang anak luh suci, maraga ibu pertiwi ané patut kasayangang.

Tiang suba masamaya, tiang lakar ngayahin mémé kanti angkihané pegat. Tiang sing bani nyakitin anak luh, ngaénang anak luh ngeling, pedih, apa buin kanti nyakit ati.

Mémé, tingalin uli ditu. Tiang jani suba ngayah lemeh peteng, ngayahin anak luh, anak luh patuh cara mémé. Tiang suba ajaka sirep, ajaka nyatua. Nuju dingin tiang baanga ngelut awakné, ngusud nyonyoné, nanging sing baanga uyut apanga pianak lan kurenanné tusing pedih.

Lamun sirep, tiang jani bani ngamatiang lampu. Patuh cara i pidan dugasé tiang nepukin mémé lan bapa macelep ka  tengah kamaré. Angkihan tiangé masi makepung-kepungan, cara anaké negakin jaran. Wiréh jani suba liu tiang ngelah mémé, makejang nagih ayahan, makejang nagih kepung-kepungan, makejang nagih negakin jaran.

Tiang bagia bisa ngayahin mémé lemah peteng. Ulian sirep ngajak mémé, tiang bisa ngalih pipis. Tiang baanga bekel, baanga umah, baanga mobil, baanga magenepan. Kanti pegat angkihanné, tiang lakar ngayahin mémé. Ngayah apanga mémé tusing sedih. Lamun sedih patuh asané cara nepukin mémé ngeling. Tiang sayang tekén mémé.

Singaraja, 7 Novémber 2016

I Gedé Putra Ariawan
Embas ring Désa Banjar Anyar Kediri, Tabanan, tanggal 16 Juni 1988. Kakawiannyané sané marupa satua cutet, opini bawak, artikel lan puisi kamuat ring Bali Orti (Bali Post), Média Swari (Pos Bali), Majalah Éksprési, lan Majalah Satua. Dané sampun ngamedalang cakepan marupa pupulan satua cutet sané mamurda “Ngurug Pasih” warsa 2014 lan ngamolihang hadiah Sastra Rancagé 2015.