Puisi-puisi I Gusti Lanang Sutéja Naréndra; Sanglah

Sumber Gagambaran; indonesiasketchers.blogspot.co.id

Ulu Suku

I né ulu
U né suku

Idepang nyunggi ulu
Undukang nindakang suku

Uluné mamunyi i
Sukuné mamunyi u

I munyiang I
U orahang U

Réh maulu masuku
Tegesné mati

Sanglah

Sang ngelah
Masolah élah

Sing ngelah
Osah malisah

(sanglah, nuléngék ai)

Télpon Umum

Ipidan....
Makelid kelidan
Nambunang récéhan
Anggo maroman
Ajak luh idaman

Ipidan...
Pis logamé tegulin benang
Apang makelo masayang sayang
Sing tawang
Di duri barisané lantang ngantiang
Mamisuh ngempahang isin basang

Ipidan...
Ulian gedeg basangé ngeruduk
Bikasé sing maunduk
Gagang télpuné uapin tai amuncuk
Ané nélpun kitak kituk
Bon tainé nyukjuk
Awaké kedék pingkel nguntuk

Dijaké Luih Luhé

Nyén kawit nuturang
Luih luhé di pikang
Mawanan sekep engkebang
Pelih ningkang, jaruh katandang

Pikang ngaé sayang
Pikang ngawinang kaplegéndang
Pikang ngaé kasumbungang
Pikang ngawinang makutang

Nyén ngawi uriga
Luih luhé di raga
Ukurané goba
Payasé baat aba

Nyonyo nyangkih masuntik
Mua tirus operasi plastik
Cunguh mancung bulu matané lentik
Makejang ulian kosmétik

Pikang layu kisut pasti
Goba daki tuané gati
Dija ké luih luhé jati
ané kadut bekel mati

Di keneh tongosé tui
Luih luhé jati
Sastra jnanané gumanti
Tresna satyané gisi

I Gusti Lanang Sutéja Naréndra magenah ring Karangasem.