Léak Tahun Baru
Olih:
Désak Madé Yunda Ariésta
 |
| Sumber Gagambaran; www.amazon.com |
Tahun baruné jani,
tusing melénan ajak tahun baru né suba-suba. I Bracuk ajak truna banjaré lakar
ngélau petengé jani. Sanjé suba ngedum gaé. Ada ané meli lau tur amik-amikan,
ada ané masang sound sistem apang memunyi cedug-cedug ramé pos kamblingé.
I Bracuk maan duman gaé
meréntah, sawiréh ia ada ngebosin petengé jani. Nyaluk sandikala, truna-trunané
suba marérod negak di sisin rurung poskamblingé. Sawiréh I Bracuk ané mayahin
makejang, tusing ada bani malunan nyiup lau satondéné I Bracuk teka. Suba kanti
jam setengah 9 kondén masi I Bracuk nengok.
Teka lantas Yan Dogler.
Truna-trunané makejang pada kedék nolih I Doglér. Mabok kuning nyalang, mabaju
singlét goloh. Kadirasa uling joh awakné tusing ngenah, bokné dogén makenyah.
“Mimih, jeneng cainé Glér.
Aéng pesan semiran cainé,” Yan Adi ngenyék Doglér.
“Warsa anyar anak
makejang harus anyar. Kuting warna bok harus baru Yan. Suba peteng kéné adi kondén
ada nak nyiup lau?”
“Ni, nu ngantiang I
Bracuk. Mirib ia sing baanga pesu apa kénkén ajak bapané ento. Cai tegarang
ngalih ka umahné Glér. Cai kan wanén. Makejang orain sing ada bani ngalih I
Bracuk. Getap koné di malun gangné ada punyan poh gedé.”
“Oh, cenik gaé to. Nah
icang jani ngalih Bracuk.”
Suba ada limolas menit
I Doglér majalan, sagét teka I Bracuk laib labuh, angkih-angkih sambilanga
tulung-tulung. Makejang truna-trunané sambrag. Bangun nyagjagin I Bracuk. Sawiréh
sebengné suba dasdasan cara anak limuh, I Bracuk surunga tur tegakanga di pos
kambling. Yan Adi lantas nyemakang yéh.
“Néh, daarin yéh malu .
Yan suba luwungan bayuné tegarang satuayang nak éngkén unduk cainé.”
“Kéné Yan, ditu ,
ditu..”
“Ditu, ditu ditu dija?
Ada kénkén?
“Ditu di batan punyan
pohé, cang nepuk léak.”
“Apa léak?”
Makejang truna-trunane
pada kesyab.
“Mimih, ija ada léak bani
masliweran di tahun baru.”
“Kaden cai, icang
nguluk-nguluk kanti dasdasan mati angkiané buka kéné? Miribang ada ané lakar
ngeréh. Tepuk cang sirahné pesu api, nguntuk.”
“Yén kéto mai, ajaka delokin
kemu bareng-bareng. Ajaka juk, apang tusing ada pisaga ané nyeh-nyehina buin.”
Kondén pegat satwané
Yan Adi, teka lantas I Doglér.
“Péh, I Bracuk alih
cang kemu, sagét suba oranga mejalan. Adi bisa sing mepapasan cai jak cang nah.”
“Cai ka umah cang mara
Glér? Nepuk léak cai di batan pohé? Sirahné ngendih, nguntuk ia.”
“Badaah, pasti cang
orang cai léak né. Tusing pelut ban cang naanang, ngenceh cang di batan pohé.
Cai kondén nawang semir bok cangé, anak bisa ngendih ditongosé peteng.”
Makejang truna-trunané
mabriag kedék. Sakéwala, I Bracuk tileh bengong angkih-angkih. Nolih ento, I
Doglér laut matakon.
“Kenpa Cuk, adi nu jelék
sebeng cainé?”
“Kéné Glér, yén saja to
cai, disamping cainé icang nepuk ada nak cenik gundul.” (*)
magenah ring Karangasem.
.jpg)
No comments