I Bracuk Nabrak Tiang

Olih: Désak Madé Yunda Ariésta

Sumber Potrekan; wartapriangan.com

I Bracuk semengan suba gerang-gereng. Ngajanang ngelodang nyikut rurung ngédéngang motor baru. Suba a minggu Ia tusing nyak masekolah ulian ngambul nagih meli motor. Nanging, jani disubani misi kenehné, ngelantas tusing nyak masekolah, sawai-wai pragat kaja kelod. Pan Bracuk tusing rungu ngajak panak. Inceg kemu mai, wiréh gagaéné dadi pengacara. Jani di Badung buin ajam sagét suba di Klungkung. Kapah lakar nepuk panak jumah. Mén Bracuk masi patuh sibuk. Gagaéné arisan kemu mai. Wiréh ia lakar nyaleg. Uling jani suba lakar ngalih suara. Kacrita petengé jani I Bracuk lakar luas ka taman kota. Suba mejanji ia ditu ajak timpalné. Gereng-gereng nyetél gas, lakar majalan. Kletak-kleték lantas ia ngidupang lampu motorné.

"Yéh.. Mati sagét lampu sorot motoré, nah majalan dogén suba masi galang di jalané," kéto ia ngerenggeng.

Kondén joh ia majalan sagét makebyet peteng guminé, mati listrik. Grapa-grépé pajalan motorné wiréh tusing tepuk apa. Neked pempatané, makesyab bayuné Bracuk, ada sundih maklenyit tepukina baduur. Ngetor bayuné, srandang-sréndéng motorné laut maglebug ulung.

(Di duur tiang listriké) Apa to maglebug Yan?”

"I cang tabraka né, tulungin awaké malu mai tuun. Pasti suba, anaké né ulung ulian nepukin sénter ané anggon cai menain listrik baduur. Kadéna endihan."

Wiréh makesiab bayuné nepukin sénter pegawai PLN ané kadéna endihan, I Bracuk limuh laut nomplok pegawé PLN ané nyongkok di samping tiang listriké. Lantas I pegawé PLN nyemak HPné Bracuk nélpun bapané I Bracuk.

"Halo, éngkén tumbén cai nélpun bapak, suba telah pipisé ae?"

"Halo pak, tiang pegawai PLN niki, pianak bapak labuh niki di pempatan kelod kangin, makta sepéda motor."

"Labuh? Mimih déwa ratu, kenapi panak tiangé bisa labuh?"

"Nabrak Tiang pak...," kondén suud nélpun suba mati HPné Bracuk, telah baterainé.

Jani kasatuaang Bapané I Bracuk bincuh. Lantas nélpun nomor aduan PLN.

"Halo PLN, saya minta pertanggung jawabannya ini, penempatan tiang listrik yang diperempatan kaja kelod tidak memperhatikan keselamatan pengendara. Akibatnya anak saya kecelakaan disana," kéto suba bapanné I Bracuk nguél. Laut ngaukin supir, lakar ka tongos I Bracuk labuh. Di jalané inceg ia ngaé status facebook.

"Tiang listrik memakan korban lagi, anak saya kecelakaan," statusé ento liu anak koméntar. Sépanan nolih, sagét suba ada berita onliné "Seorang Anak Kecelakaan, Akibat Menabrak Tiang". Liu anaké magiang beritané ento. Magenepan koméntar anaké. Ada ngorahang "tiang listrik oh tiang listrik". Ada masi maang koméntar "PLN perlu memperhatikan keselamatan pengguna jalan dalam menempatkan tiang listrik."

Ramé saja ramé gumi "maya" né ulian I Bracuk. Di tongos I Bracuk ulung, wartawané teka amobil, tuun lantas mabriug, motrék I Bracuk ajak tiang listriké ento. Pegawé PLN-né klingang-klingeng.

"Bro, nak ngujang anaké ramé-ramé nah."

"Sing nawang bro, panak pejabat nenga ené o?" Lantas i wartawan, ngojog pegawé PLN-né.

"Ragané sareng kalih saksi mata nggih, dados wawancara?”

"Oh nggih dados-dados."

Mabriug makejang, ada mesuang catétan, ada mesuang tape perekam, ada mesuang kamera. Disubané makejang suba siap, lantas ada anak metakon.

"Pak, dados satuaang kronologi kejadian, kanti korban nabrak tiang, limuh, tiangé tusing kénkén?"

I pegawé PLN laut masaut.

"Nabrak tiang? Tusing ja tiang listrik, anak tiang tabraka."

Désak Madé Yunda Ariésta
magenah ring Karangasem.