Puisi-puisi I Wayan Jatiyasa; Dharmaning Negara
 |
| Gagambaran Olih Supartika |
Dharmaning Negara
Pitung Dasa Dua Indonésia mahardika
akéh wigna tunabudi masraya mitra
nyengkalénin pamikukuh wangsa
ngrogragang padéwékan negara
nganistayang pawijilan ngraga
kakasorang momo angkara
sayan sué ageng ngrugada
sayan abot kaupapira
sajeroning manah
rakyaté duhkita
ring
angga
sungkawa
kuciwa
nanging…
bhakti sujati
tresna tan sipi
yadin madasar pati
kukuh mabéla pretiwi
ngardi karahayon krami
mapetitis panglimbak gumi
nelebang saluir geguat pangapti
sungkem ring panglingsiré nguni
Pancasila anggén pangancaning margi
Bhinnéka Tunggal Ika manggeh sasanti
UUD 1945 uger-uger laksana tekek kagisi
manah masikian nagingin kamahardikan NKRI
dharmaning negara rakyat Indonésia sané utami
Pahlawan
Ragané aking
kuaca sétsét pasuranting
kulité selem madumel daki
manahé ngastiti Widhi
Madasar
tresna sujati
Metantang
urip mabéla pati
Ngamel
tiing lanying ngajerihin ati
Ngasorang
penjajah sané mamurti
Pianak rabi wiadin artha brana
katohang antuk angga sarira
rah membah nyurat pretiwi
layon pajlempang maketi-keti
Kérti
yasa para pahlawan
ngutsahayang
kamahardikan
ngardi
karahayuan negara
patut
kasuksmayang ring warga
Irika ring Margarana
pahlawan negara amor ring acintya
anta karana sarira lan Brahman masikian
muponin karma wesananipun ring mrecepada
ketua jurusan Prodi Bahasa Bali ring STKIP Agama Hindu Amlapura lan dados penyuluh Bahasa Bali kabupaten Karangasem. Kakawiannyané naanin kawedar ring Bali Orti miwah Médiaswari.
.jpg)
No comments