Puisi-puisi Ngakan Madé Kasub Sidan; Segara
 |
| Gagambaran Olih I Gede Putra Ariawan |
Titiang
Titiang boya ja tiang
Boya ida maraga dané
Boya dané mawasta jeroné
Boya jeroné mapamineh titiang
Taler boya ida dané lan tiang malima batis titiang
Titiang wantah titiang
Sané tan lémpas lumampah ring titi tunggil
Yadian ugal agil
Titiang wantah titiang
Sané ngungsi genahé tunggil
Napi malih tininggal tinggil
Titiang tan purun dados nadosang tiang
Yadiastun mangkin sampun kalugra
Titiang taler kakadosang dados tiang
Maraga ida mapakayun dané makarna jeroné
Mawasta dané mapanyingakan ida maulu tiang
Ida, dané, jeroné,lan tiang mawak titiang
:kadi tiang
Sampunang titiang owaha
Benggayang sampun kadi pawetuané
Lugrayang yaning panamaya panumadian malih ring galah bénjang pungkur
Titiang taler kantun dados titiang
;Benggayang sampun!
Segara
Ring segara
Ombaknyané bencah ngambekang awak
Lancut magulung-gulung saling tempung
Suarannyané nyandet: gdeblur…..gdeblur…..
Nanging stata sida nyanggra toyan tukad loloan
Yadiastun kaanyudin lulu nyanyad
Lulu leteh jagat
Tanpa laad
Nanging segara tan naén rumasa leteh
Ring segara
Yukti srana ngalebur mala
Pinaka angga campuhan sekancan tukad
Gumanti astiti bakti nempur ngalebur
Mala leteh terehing bhuwana agung-alit
Ngawi winih nirmala sakala niskala
Ring segara
Tan wénten lémpas kalebur
…. Yukti jati
Stata !
(Pantaraning Selat Badung, 1984)
embas ring désa Satra Klungkung nemonin Saraswati warsa 1959. Ngawit warsa 1982 ngunggahang reriptayan marupa: puisi, cerpén, artikel, sekar alit, lan éssai ring Bali Post, Nusa Tenggara, Karya Bhakti, Satwa, Canang Sari, tur nglimbak ring Anita Cemerlang lan Zaman (Jakarta), Mimbar Masyarakat (Samarinda). Ngamolihang makudang-kudang jayanti, lan penghargaan sekadi anugerah “Widya Kusuma” (Tokoh Pendidikan Bali ) saking Gubernur Bali warsa 2010. Sané mangkin, ngayah dados pengawas SD/MI Kecamatan Klungkung.
.jpg)
No comments