Puisi-Puisi I Putu Wahya Santosa; Pondok Pitutur
 |
| Gagambaran olih Supartika |
Pondok
Pitutur
Lampah titiang
Kadi kalangen
Ngalap sekar lango
Ring taman kawi
Ngaruruh lawat
Kruna-kruna metalang
Sane ngendih dumilah
Saksat samar masunar
Dados damar manah peteng
Yadiastun pongah
Lampah titiang
Kabaos mapi-mapi
Réhning mula tan uning napi-napi
Tan weruh ring basa sepi
Nanging yukti
Titiang wantah madasar ajerih
Doning basa sang sunari
Sané setata ngicen pitutur
Ne mangkin tan bina kadi kulkul kubu
Tulus nrungtung kéwala puyung
Tan wénten rungu
Lampah titiang kalangen
Majalan nyujur pondok pitutur
Réhning ajerih
Méhméhan lawat titiang
Pacang kauluh i kalantaka
Ampura,
Minabang niki nenten kadi mapi-mapi
2016
Piteket Polos ané Lekad di Pondok Pariselsel
Kenyir tiang
Kelem
Di kenyem purnamané
pawah
Sakakatih
Akah pangacep idupé
Kauluh tatu
Kauyak api yéh mata
Lemah peteng tiang
masarin tanah
Kakepung lampah i
kalantaka
Ané ngemit tindakan
batisé
Sebilang bucu
Ring dija malih
Ngruruh genah
Anggén matembang
liang
Duh, diolas jani
tiang ngidih tulung
Baang tiang ngidih
rurung
Apang nyidayang
tiang ngembahang sakancan tatu alpaka
Ané lekad uli tukad
angkara
Dumadak makejang
lakar anyud
Nanging, kénkén
abeté apang gangsar matindak
Yén napet déwék
suba nyalempoh apit batu?
Katusuk kruna di
awak padidi
Ané mangan kaliwat
sidi
Dija ada unduk
lakar nepuk langit galang
Yén langit kenehé
suba tangkeb gulem raja
Sebilang wai
Duh jero,
Sesai tiang buduh
Ngumik-ngumik
panumadian
Ngeragrag raos ané
tuara ja nyatuayang unduk
Ulian di petengé
ngipi gulgul sarwa aéng
Mamunyi tiang cara
sedeng
Nanging yukti
Niki wantah tatu
Tatu yéh mata
Nglekas dadi api
Api yéh mata
Morbor raga
patelasan
Durus piragi
Tangis ring taru
aksara
sewai-wai ngicen
tiang tutur polos
ané sanget
mapinunas
apang tiang liang
apang tiang polos
nuutin kenehé
bajang
nanging kénkénang
tiang nyuudang
selselé ané kutang-kutang?
2017
Piteket 1 *
Cening sané embas
Saking ketélan toyan panon Ida Hyang Baskara
Matiti pamargi pawana
Medal makta satua
Nganggén busana sarwa aksara
Akasa-pertiwi
Telebang cening makérti
Maguyang di sastrané
Makolem di lontaré tan patulis
Mangda sida anggane galang macaya
Kalinggihin sang hyang taksu aksara
Sabdané sida dados sasuluh
Lawat ring raga
Pagehang lampahé
Nugtug ombak gumi
Apang ada buin mani
ané lakar bekelang mulih
bareng-bareng mapunduh ngajak bapa
di pondok embangé
2016
*) Puisi puniki molihang juara I pacentokan nyurat puisi
sané kalaksanayang olih Suara Saking Bali rikala peringatan Hari Pendidikan
Nasional
Piteket 2
Cening, yéning pradé cening lakar majalan
Eda pesan cening engsap tekén lawat
Sawiréh lawaté ané ngicén cening rurung
Apang sida nugtugang pajalan tuuh
Cening, yéning pradé cening matindakan
Eda pesan engsap masuluh tekén lawat raga
Sawiréh lawaté ané pedas ngicén piteket
Unduk bekel karma panumadian
Yadiastun pajalan ceningé suba joh
Sakéwala lawaté tuara lakar sida ical
Matanem di sebilang enjek-enjekan pajalan ceningé
2016
alumnus Jurusan Pendidikan Bahasa Bali sering nyurat puisi Bali modérn lan ésai basa Bali sasuratané sampun kawedar ring Bali Orti lan Médiaswari.
No comments