Puisi-Puisi Ni Komang Ayu Lestari; Tabuh Rah
 |
| Gagambaran Putra Ariawan |
Pralina
Sang surya sampun makaon
Ngaséng kauh sada alon
Angin peteng ngesirin raga
Rasa nusuk manah kaliput duka
Urip matilar ninggalin raga
Nyujuh jagat niskala
Sang atma mabur ring ambara
Wantah mabekel karma
Tungtung tangis marasa kalaran
manah
Kaingetan antuk dosa-dosa
Sané kawacén olih sang suratma lan
jogor manik
Mangda puput
Tur mawali kasamsara
Anggara Kliwon, 21 Maret 2017
Jagat
Bara
Sang Hyang Surya kroda
Medal matéja
Kebus marahpah
Panes tan panyanding
Akéh jatma puun matambus
Puun tan pageni karasayang
Tanah engkag
Jatma pejah, pajelémpah
Sakancan tetanduran padem tan
maurip
Tukad pegat
Toya nyat
Tan pasepat
Tan wénten sané ngetisin
Tan wénten sané nréstésin
Ring jagat bara
Wraspati Wagé, 30 Maret 2017
Karma
Phala
Kéweh yén tuara ngelah
Setata pelih tur kacampah
Jengah kaliwat jengah
Sasai katemah
Buka batun buluané
Nglintik tuah abesik
Tan wénten sané ngarunguang
Minab lacuré kaliwat
Belogé magantung
Nanging...
Élingang karma phalané
Dumadak ida nyuécanin
Ningtingang déwék lacur
Apang tusing setata katutur
Buka slokané, apa ané kapula
Kéto ané kapuponin
Anggara Kliwon, 21 Maret 2017
Tresna
Rerama
Rerama...
I mémé kalawan i bapa
Ané ngrupaka, ngardi i raga
Tresnannyané majeng i pianak
Sakadi toyané membah
Nénten purun surud
Imbangang kantos mati
Tan prasida ngwales
Magantung aidupan majeng i rerama
Nanging mangkin...
Di duur pertiwi
Di betén ambara
Pedidi ngrasaang manah ring ati
Sakadi i bongkok ngidamang bulan
Anggara Kliwon, 21 Maret 2017
Tabuh
Rah
Tungtung tangis kalaran manah
Nusuk kulit nembus tulang
Marari raga tan hana
Sangkaning...
Dharma kaliput adharma
Widya kaliput awidya
Raksasa ngalahang déwa
Masiat paturu nyama
Majuluk kadi ayam maadu
Saling tempal, saling tusuk
Telah, pejah, majajah
Masegara rah
Matanah jatma
Ring jagat puniki
Sakadi ngebug yéh di panéné mangkin
karasayang
Wraspati Wagé, 30 Maret 2017
wantah sisia SMA Negeri 2 Amlapura
No comments