Ngutang Kandik Nuduk Jaum
Olih: I Gusti Lanang Sutéja Naréndra
 |
| Gagambaran Olih I Gede Putra Ariawan |
"Mbéé... Nyai... Nyai...
belogé abanjar pedidi nyuwun. Dadi kalahin Lik Yan, ngojog I Soplo?" Kéto
raos Luh Luéng tekén kanténané, Dék Snowi ané mara palas makurenan. Ajaka dadua
negak di metén Dék Snowiné, di kursi tiingé. Béh semangat pesan Luh Luéng
mapitutur, buka ia nawang makejang, tatas tekén unduk.
"Sing tolih Nyai? Lik Yan ento
bagus, putih, tegeh, siteng, sada sugih ngelepud. Rasa maka gumi anaké luh
ngedotang. Nah yén I Soplo? Aselem kuku sing saménpada. Suba selem itek, tiwas
nékték, gobané kuala genep! Ish... ish... ish.... belog Nyainé. Buka senggaké
Nyai ngutang kandik nuduk jaum!" Béh jeg jeek pesan tuturné, misi awakné
gideg gideg cihna sing cumpu gatiné. Ané karaosin mendep, nuléngék, buka
mirengang tuturan satua, paliatné dangsah gatiné.
"Apa artiné?" Kéto ia
balik matakon.
"Arti
apané?"
"Ngutang kandik nuduk
jaum"
"Béh, Nyai buka sing tamat SD!
Artiné ngutang ané luungan, nuduk ané jelékan!" Saut Luh Luéng, jitné
matingtingan asibak laut ngentut. Cuiiiissss....
Dék Snowi nekep cunguh, metakon,"Ooo...luungan
kandiké tekén jaumé?"
Ané katakonin nengéng nyureng.
"Aiiih...apané usak né? Jelas luungan kandiké, gedénan, anggo ia ngempug
saang." Buin jitné matingtingan, cuiiissss.... mebo taluh berek.
"Nak icang sing lakar ngempug
saang. Icang perlu nyait kamené uék" saut Dék Snowiné mabelekuk. Wayah bon
entuté!
"Mbéé... madugal belog Nyainé.
Adep kandiké, beliang jaum. Aumah Nyai maan jaum!" Suud ngraos buin Luh
Luéng matingtingan, ciiis.... jani mebo bangkén dongkang. Ngejengit manglé, ia
nigtigin basang, "aduh, usak basangé!" Kéto raosné. Dék Snowi nekep
cunguh, yéh matané ngrébés nangges angkihan. Mbéé... krurakara boné! Mirib lek
kenehné Luh Luéng, matingtingan ia lakar ngampakang jendéla. Kruuééék..
Aduh lacur, ada besi paku nyangket
nguék celana légingné pas di siagan jitné. Béh, mampakan makejang juringan
jitné!
"Aduuuh... ndas bedag! Kujang
jani!" Kéto ia éwa. Peluhné pakritis. Dék Snowi ngejengit. "Kemu ka
paon, ditu ada kandik!" Kéto raosné mablekis kedék.
"Aiiih....bebéki Nyai! Celana
uék tanjénin kandik!" Luh Luéng brangti.
"Adep kandiké, beliang jaum
aumah!" Béh ewer Dek Snowi. "Araaah, suud mecanda! Ada jaum jak
benang?" Kéto Luh Luéng nyansan éwa, iteh nekep jit.
"Hmmm...kéto suba masalahé ané
jalanin icang. Kamen icangé uék, jaum ané saratang icang, boya kandik. Apang
tawang Nyai, kandikné Lik Yan suba pungak, patiné bancut. Anggo apa laut?
Jaumné Bli Soplo lanying sada kekeh. Ngerti Nyai?" Kéto raos Dék Snowiné
sada ngédéngang jeriji tujuhné ngecenggir undit-undit.
Beh, makesiab Luh Luéng ningeh
raosé ento. Sing karasa limané nekep bibihné enggang ban kesiabané. Adaaaah....
sapina nekep jitné!
Mbééé...cawetné telutuan, giling
buka selingkadé!
magenah ring Karangasem.
No comments