Workshop Ngripta Puisi Bali lan Macapat KKG PAH

Made Suar-Timuhun, Aryawan Kenceng, lan Ngakan Kasub Sidan rikala workshop KKG PAH

Pinakan jalaran nincapang kaweruhan guru-guru Pendidikan Agama Hindu Kabupaten  Klungkung, KKG PAH Kab.Klungkung ngawéntenang “Workshop Peningkatan Kompeténsi Guru, melalui Karya Tulis Berbahasa Bali” ring Aula Kantor Kementerian Agama Kabupatén Klungkung.

 Yadian kalaksanayang rikala Redité, 23 April 2017, Kepala Kantor  Kementerian Agama Kabupatén Klungkung taler prasida rauh kasarengin Kasi PAH, Korwas PAH, lan pengawas Agama Hindu siosan. Ring galah punika, Kepala Kantor Kementerian Agama Kabupatén Klungkung sios ring ngicénin pawarah-warah mangda guru Agama Hindu setata sida dados dipa pamargi manut swadarma Guru Pendidikan Agama Hindu, taler mangda setata nincapang parilaksana nyurat pinaka sinalih tunggil ngawerdiang sastra Bali.

Putu Budiarta, pamuncuk KKG Agama Hindu Kabupatén Klungkung midartayang, workshop sané kamiletin olih 83 guru puniki  boya ja pacang mararian ring workshop manten, nanging pacang terus ngalimbakan indik nyurat puisi Bali anyar lan macapat selanturnyané. Napi malih Komunitas Penulis Klungkung sampun nyadiang déwék pacang setata  nyarengin pamargin KKG PAH rikala nyurat.

Ngakan Madé Kasub Sidan, kasarengin Ketut Aryawan Kenceng, lan Madé Suar Timuhun, pinaka narasumber saking Komunitas Penulis Klungkung, nyobyayang indik tata titi ngaripta  puisi Bali Anyar malarapan kriyapatra sané mamurda, “Mikukuhang Sastra Lan Basa Bali Masrana Nyurat Puisi Bali Anyar.”

Sesampuné ketilikin olih Ngakan Madé Kasub Sidan, Ketut Aryawan Kenceng, Madé Suar Timuhun,  sami rumasa bagia lan gargita pisan sahantukan sesamuné mamargi tigang jam kirang, pamilet sampun sida muputang puisi Bali anyar utawi wénten taler sané sida muputang sekar macapat. Rikala punika taler katembangan pupuh Ginada olih Putu Pastika lan kategesin olih Gusti Nyoman Siksa, pakaryan sinalih tunggil pamilet. Sedurungé workshop kapuputang, narasumber taler nguningang é-mail koran lan jurnal sané nyadia pacang ngunggahan reriptayan, minakadi Suara Saking Bali, Bali Pos, Pos Bali, Bali Tribun, Tribun Bali, muah sané siosan. Satria Jhony Nyoman, sinalih tunggil pamilet taler mapangapti mangda bénjangan kakawian guru-guruné sida kapupulang tur kacitak dados antologi. (Ngakan Madé Kasub Sidan)