Puisi-Puisi Nyoman Tusthi Eddy; Bintang Filem

Raisa Andriana

Koperasi 

Pipisé kaingkup, kapaut
Kenehé rarem magunem
Munyin krama dasar patut
Metu landuh ngawé legem

Salon Kecantikan

Daha ayu ngawé ayu
sarining ayu ané kaapti
Ayu nerus terus kaati
ayu dudu énggal layu


Taksi

Uli désa kakota, uli kota kadésa
tis aris ngalanglang marga
Tegakan utama anut wibawa
nyentokang tandang maserana arta

Ruko

Umah kotak matumpang dasa
besi beton lan kaca
Tongos ngingkupang raja brana
tatikas arta kramaning kota


Rumah Sakit

Dini bongkol amerta tanggun wisia
natak paica Sang Aswin Déwa
Katiwak amerta lanus lega
katiwak mertyu dadi antaka


Bintang Filem

Abah serdah tangkep wirya
motah pangan raja brana
Namtamin semara sara kita
di lawat di sekala mukti suka

NB: Puisi puniki kaambil saking cakepan “Somah” kakawian Nyoman Tusthi Eddy

Nyoman Tusthi Eddy
embas ring Dusun Pidpid Kecamatan Abang, Kabupaten Karangasem, Bali, duk tanggal 12 Desember 1945. Tamat Fakultas Ilmu Kguruan dan Pendidikan (FKIP) Singaraja Jurusan Bahasa dan Sastra Indonesia tahun 1969. Lianan ring daos guru taler masesuratan luir ipun: puisi, cerita péndék, ésai, kritik, nganggé basa Bali lan basa Indonesia. Pakaryanné sané sampun sida molihang miwah sane sampun dados buku luir ipun: Mengenal Sastra Bali Modern, Rerasan Sajeroning Désa, Duh, Ratnayu: Tembang Kawi Mendamba Cinta, Somah, miwah sané lianan.Taler molihang piagam kawisayan ring wewidangan sastra Bali, luir ipun: Piagam Memajukan Sastra Bali Anyar (Sabha Sastra Bali, 1999), Piagam Penatar Sastra Bali Modern (Dinas Pendidikan Karangasem, 2002), miwah Hadiah sastra Rancage (Yayasan Rancage, 2004).