“Marhaban Ya Ramadhan”, Rahajeng Mapuasa

Olih: Siti Hajariyah

Sumber Potrekan

Bulan Ramadhan wantah bulan kaping sia ring penanggalan hijriyah. Ring bulané puniki samian umat Islam ibuk nglaksanayang upacara keagamaan, krana bulan puniki wantah bulan sané setata kajantosang olih umat Islam. Majeng ring umat muslim, sampun janten bulan Ramadhan pacang kasambut meriah antuk nguncarang rasa angayubagia krana bulan ramadhan wantah bulan penuh berkah.

Akéh acara sané kalaksanayang rikala bulan Ramadhan minakadi mapuasa, sholat tarawih, nglaksanayang pakéling tedunnyané Al-Qur’an, ngruruh malam Lailatul Qadar, nyansan teleb ngwacén Al-Qur’an lan pinaka panguntat wantah zakat fitrah tur nglaksanayang hari kemenangan Idul Fitri.

Bulan puasa Ramadhan warsa1438 H kaprédiksi ngawit dina Saniscara, pinanggal kaping 27 Méi 2017 M, nanging pinih becik malih yéning i raga sareng sami ngantosang sidang isbat anggén nentuang pangawit puasa sané pacang kalaksanayang sinarengan ring Indonésia. Akéh sané patut kasiagayang mangda puasa warsané niki mamargi antar, silih sinunggilné wantah nincapang spiritualitas antuk ngelatih lan sering nglaksanayang ibadah miwah tetep nyaga pola makan.

Kewajiban mapuasa puniki kalaksanayang olih umat muslim ngawai, ngawit saking adzan subuh kantos maghrib. Puasa puniki kalaksanayang a bulan kantos Idul Fitri. Rikala wengi 1 syawal kalaksanayang takbir sinarengan, sané dados penanda kemenangan kaum muslimin ngalawan hawa nafsu a bulan. Dumogi samian umat Islam mersidayang ngalaksanayang ibadah puasa lan polih kalancaran rikala nglaksanayang puasa. Ngiring pada-pada ngampurayang yéning wénten kaiwangan. Marhaban Ya Ramadhan. (*)

Siti Hajariyah
Guru IPS ring SMK Kesehatan Karya Usadha Seririt.