Chronicle of a Death Foretold: Indik Sédannyané Santiago Nazar

Chronicle of a Death Foretold

Murdan Cakepan     : Chronicle of a Death Foretold” (Kronik Kematian yang

Diramalkan)

Pangawi                     : Gabriel Garcí­a Márquez

Penerbit                      : Selasar, 2009

Tebel                           : 175 kaca

Santiago Nasar dibunuh secara brutal di suatu kota kecil oleh dua saudara. Seisi kota telah mengetahui tindak kejahatan ini akan terjadi –termasuk juga sang korban. Tapi tak ada seorang pun yang melakukan sesuatu untuk mencegah pembunuhan ini. Dua puluh tujuh tahun kemudian, seorang penduduk kota datang kembali ke kota ini untuk mengumpulkan kepingan kebenaran yang utuh dari berbagai kesaksian orang-orang yang saling bertolak belakang. Hingga mendapatkan pemahaman terakhir mengenai yang sebenarnya terjadi pada Santiago, dan mengapa itu sampai terjadi…

Nika wantah daging sinopsis ring cover belakang novel “Chronicle of a Death Foretold” (Kronik Kematian yang Diramalkan) kakawian Gabriel Garcí­a Márquez pangawi saking Kolombia. Cakepané puniki tumbas tiang ring silih sinunggil toko buku alit sané wénten ring kota Singaraja antuk pangarga 27.000 rupiah. Tiang wau numbas warsa 2016, lan terjemahan basa Indonésia cakepané puniki sampun kawedar warsa 2009, dadosné tiang latan kantos 7 tiban. Murdan asli novel puniki wantah “Chronicle of a Death Foretold” sané kawedar warsa 1978.

Pada hari ketika mereka hendak membunuhnya, Santiago Nazar bangun pukul lima tiga puluh pagi untuk menyambut kedatangan kapal uskup yang akan melintasi sungai setempat.

Nika wantah lengkara pemahbah ring novél punika. Antuk basa terjemahan sané becik lan lumayan méweh manut titiang pinaka pangwacén anom, novél puniki nyaritayang indik sédané Santiago Nasar ring kota Sucre, Kolombia warsa 1951. Santiaga Nasar kasédayang rikala uskup agung rauh pacang memberkati upacara pawiwahan Angela Vicario sareng Bayardo San Roman. Rikala punika Pedro lan Pablo, belinnyané Angela Vicario sané kembar marencana jagi nyédayang Santiaga risampuné Bayardo San Roman ngewaliang Angela duaning kaanggep sampun nénten suci lan rikala katakénin sira sané ngranayang unduké punika, ipun ngenikaang Santiago Nazar.

Raris Pedro miwah Pablo nguningayang majeng ring samian anaké sané katepukin, yéning ipun pacang nyédayang Santiago Nazar, nanging anaké samian nganggep indiké punika wantah geguyon kémanten utawi tutur anak punyah, lan panadosné Santiago Nazar kasédayang ring malun jelanan umahné lan nénten wénten sané prasida nyalametang.

Sausan kejadiané punika, Pedro lan Pablo kahukum, lan indik Bayardo, rikala peteng sesampuné ipun ngawaliang Angela, ring umahnyané ipun maubet jelanan lan nginem inem-ineman alkohol kantos pingsan limang rahina. Ring minggu kapertama, Angela nyurat séwalapatra majeng ring Bayardo, nanging nénten naanin kawales. Kantos 17 tiban Angela nyurat séwalapatra punika, nadaksara Bayardo rauh ka kotané Angela.

Sané dados tokoh utama ring novel puniki wantah Santiago Nasar, anak muani matuwuh 21 tiban keturunan Arab. Ipun wantah pianak adiri lan meneng sareng méménnyané lan pelayan risampuné bapané ngalahin. Lianan ring punika wénten taler tokoh aku, sané nyaritayang satuané puniki, Christo Bedoya mahasiswa ledokteran, Angela Vicario sané naanin dados kurenan Bayardo San Roman yadiastun ajebos, Bayardo San Roman anak muani matuwuh 30 tiban, miwah nyama kembar Angela inggih punika Pedro lan Pablo.

Novel saking pangawi sané ngamolihang Nobél ring widang sastra warsa 1982 puniki nganggén alur lumayan rumit lan ngawinang titiang bulak-balik ngwacén mangda prasida ngerti, yadiatun nénten ja jakti-jakti ngerti.  (I Putu Supartika)