Puisi-Puisi I Gusti Bagus Wéda Sanjaya; Candikuning

Gagambaran I Nyoman Buda Arimbawa

Beratan

Yéning demdem punika druwén titiang

Minab jaga setata kagelut

Nyandingin bukit-bukit teeb

Lan tegeh méru ulun danu

Ngengkebang manah iseng

Ring kenyung manis strobéri….

            Pedungan,

            Soma Wagé Perangbakat

            3 Oktober 2011

Candikuning

Dingin angkihan I Déwa

Ring selag taru cemara

Ngusap sayong ring tapak telapak

Ngeberang manah sulit-ibuk makilit

Saking Kuta nuju Dénbukit….

             Pedungan,

            Soma Wagé Perangbakat

            3 Oktober 2011

Pamegat Manah 

: Candikuning, Ngiring Druénang

Angin dibi nylisik

Ring selagan wengi

Makta gatra saking selat bukit

Masuara kerug

Masunar tatit

Sang miragi lipia ring wengi,

Utawi tulak ngulayang manahipun,

mawali ring wengi sané ilu

Sakéwanten, malianan..

Wengi punika, wengi sang kabutan semara

Anyud ring blabur kaulu kama

Ngulati nistaning tél, salah ulah

Sang istri, angin makisi aran Ida

Wenginé sampun apadang

Galang maglimuran

Medal saking lawaté samar

Saking wenginé ilu, sané tan paipian

Sang miragi mawali ring angin

Kenyung punika,

kenyung tepining danu Beratan,

Dosa sirna jelenging arsa,

Sang istri manggih pamargi.

Candi Kuning, ngiring saling druénang.

Wasananing karma titiang nampedang.

Iwang patuté, wantah legawa nyinebang.

Sinampura.

Rahajeng.

Sunar punika druwén I Ratu.

I Gst Bagus Wéda Sanjaya
guru ring SMA Negeri Bali Mandara.