Prosa Liris Kingkingakung; Sangu Singid
 |
| Sumber Potrekan |
Sangu Singid
Adi, Bli nunas kenyung manis sané ngawinang maduné
kimud. Rarasé ayu, lek ratun sekaré masanding sareng adi. Apa buin krédépan
untuné, jerih rumasa slakané masangling. Cingakin bulané nedeng purnaning
kartika, mengkeb di durin ambuné. Apa ané makada? Sajawaning ragan adi. Tunas
Bli sami, anggén Bli sangu, nuju genahé singid.
Bangli, 22/11/2016
Sawah-Natah
Sekar jepuné mabulisahan ring natahé. Ngrerengih
ngajap tawang. I Angin ngeberang ambunnyané, jenek ring tungtung twas. Lumuté
mlekor carang taru jepunné, tekek keret nakes. I Jepun tuara ibuk, mawali
ngasih-asih I Lumut. Sedahé sareng matempung, kuning gading warniné. Nanjénang
ukudan, rum apanginang. Ring langité, kedis kokokan makeber kelod kauh. Tuun
matinggah ring carang binginné. Ring pundukanné, toyané ening. Ngricik mapadu
munyin enggungé ngatengkung. I Klipes nyaru-nyaru ngintip, ring batan pantuné
wawu tandur nyelag. Jubelé ngidem tengah pundukané, kadi anak matapa ring goané.
Natah, sawah, sané tuara gelah. Dija natah, dija sawah?
2016
Uning?
Sané pingit ring tengah tanuné. Sapunika kocap
kasujatian jatiné. Rerehang margi mawali. Waliang ring wité numadi. Krura kara
sukilné. Kocap kénten, kénten kocap. Becik-becikang ngraksa sané pingit punika,
masadhana tiaga. Mesehé, durgama sripit. Wénten sané maosang, meneng miwah
karyané anggén merangin. Sakéwanten, napi sané rereh? Uningin?
2016
Magenah ring Bangli. Mangkin kantun ngumbara ngaruruh cantelan idup
No comments