Puisi-Puisi Nyoman Agus Sudipta; Bali ka Beli

Sumber Gagambaran

Bali ka Beli

Sang raja rauh makta jinah 

Puniki raja sané dahating kaloktah

Raja saking jagat Mekah

Kanikaang ka gumi Bali nglimurang manah

Sané mangkin yukti jinah sané mamurti

Jinah ngawinang manusane lali

Lali jagi nyaga lan miara tanah pertiwi

Ngantos gumi Bali puniki jagi ka beli

Bali.... kadadosang genah invéstasi

Ngawit saking sué puniki katami

Élingang puniki sameton Bali

Raja Mekah lan raja Trump ngmargiang stratégi

Yéning nyama Bali sampun lali

Yukti puniki cihna rauh kali ring Bali

Puyung sané Katunas

Sembah kapertama punika puyung

Sembah panguntat taler puyung

Ring tengah puyung kapireng suaran kidung

Puyung aled bhakti sané agung

Puyung anggén genah paican suung

Saking puyung kapanggih sané luung

Kadi Tamtam sané katunas wantah puyung

Jadma Lelana

Apa sujatiné ané kauber

Apa sujatiné kaalih mai numadi

Pidan lakar tepuk tanggun pejalan idupé

Nyén lakar alih tatkala mulih

Suung, puyung lan malalung

Tatkala angkihan katagih makeber nambung

Ngapung.... kadi menékin jukung

Ngantiang ulung lan macelempung

Sujatiné iraga jadma lelana

Jadma ané tusing nawang apa

Jadma ané sujati tuara

Tusing tepuk tatujon numadi dadi manusa

Balung Tan Paisi

Apa kauyutang ento

Ngudi jeg beloganga kéto

Cara wayang dadi akropak

Iraga saling uyut lan pakpak

Ané mabalih kedék ngakak

Dalangé sibuk ngeték upah lan basangné wareg

I Wayang marengkah lan saling iyeg

Saling batbat kanti marebat

Saling pisuh kanti mamusuh

Satmaka anak buduh

Bibih ngrémon lan uyut kanti bujuh

Satuané caahcauh kangin kauh

Mrebutin balung tan paisi 

Dadiné tuah iraga rugi pedidi

Majalan Pedidi

Meled ngadungang keneh

Tusing karuan katrima beneh

Apa buin ngajak anak bawak papineh

Bisa ané bakatang tuah pakéweh

Celebingkah batan biu

Jelema ngéndah di guminé ajak liu

Bisa ané saja payu katrima guyu

Keneh macanda bisa ngaénang bendu

Luungan jani majalan pedidi

Da bes ruet nyalanin idup dini

Rwa bhinéda ento paduman sujati

Majalan pedidi ané penting lega di ati

I Nyoman Agus Sudipta
Embas ring Karangasem, 29 Séptémber 1984. Kakawianipuné kawedar ring Bali Post (Bali Orti) miwah Pos Bali (Médiaswari).