Mamitra

Olih: I Wayan Putu

 

"Wanita dan Kalung" Gagambaran Pranoto

Mula saja paundukan kauripan I Nyoman Kocongé lacur, nanging kurenanné ané madan Ni Latri sing pesan nyak ajak idup lacur. Geginanné tuah mapayas dogenan, ia tuah ngadokang kamomohan, yén ada anak sugih, prajani dotanga dadi kurenanné. Nanging ia tusing majodoh anak sugih, wantah I Nyoman Kocong ané lacur ané dadi kurenanné. I Nyoman Kocong tusing taen ngelah keneh lakar maiyegan ajak kurenanné, yadiapin ia nawang solah somahné buka kéto.

Seduk basangné I Nyoman Kocong teka uli ngarit, suba maan akranjang ia ngarit. Kéwala dapetanga tusing ada nasi di paonné, mara ia matakon tekén kurenanné saget ngambrés kurenanné, ngorahang tusing kuat buin idup lacur. Mara lantas I Nyoman Kocong nyakan, kurenannné macelep ka kamarné tur masaré masaput.

Makaengan I Nyoman Kocong nepukin unduké buka kéto. Lacur mula idupné, nanging lebih lacur yén ngelah somah tusing bisa ngalanang geginan.

“Uduh, ngudiang kéné lacur titiangé, somah tiangé sing nyak idup lacur,” kéto pakaeng I Nyoman Kocongé.

Disubanné nasi lebeng lantas dunduna kurenanné, nanging buin ngambrés pasautné, ngorahang sing kuat idup lacur, sing bisa naar nasi dogen. I Nyoman Kocong payu madaar padidi, sambilanga makuah yéh mata. Disubanné suud madaar saget Mén Cublek pisaganné kauk-kauk ngidih tulung, ngorahang kurenanné gelem. I Nyoman Kocong laut nulungin ngajak Pan Cublek ka Puskesmas.

Mara dingeha I Nyoman Kocong ka Puskesmas, lantas ngéncolang Ni Latri bangun, mapayas lakar pesu ajak mitranné. Ni Latri mamitra ngajak Pan Kalér, ané malianan désa ajak I Nyoman Kocong. Pan Kalér mula kasub tekén kasugihannyané, sapasira ané dotanga pastika bakatanga tekén Pan Kaler, apabuin anak lacur buin jegég buka Ni Latri pasti aluh baan Pan Kalér makatang. Ulian kasugihanné ia ngelah kurenan suba papat liunné. Kéwala Ni latri tusing nawang Pan Kalér suba papat ngelah kurenan. Ni latri tuah dot tekén kasugihan lantas demen pisan mamitra ajak Pan Kalér.

Mula mangkin yéning sampun wénten pipis pasti ja sané pikenehnga pasti bakatanga, kantos buduh paling Ni Latri yéning tusing matemu ngajak mitranné Pan Kalér, sawiréh Pan Kaler mrasidayang nuutin pikeneh Ni Latriné, sakadi numbas sajroning papayasan Pan Kalér sané mayahin. Malianan tekén I Nyoman Kocong ané tusing nyidayang meliang apa-apa.

Risampun engseb suryané, mara koné teka Ni Latri, nakonina ia tekén I Nyoman Kocong.

“Latri uli dija sujatiné kadi mara kali kéné teka?”

Prajani muanné Ni Latri barak, kéwala tetep ia masaut bangras.

“Bli, nak ngudiang matakon kéto, né tolih apa aba tiang né? Bli taén meliang kakéné?”

“Men, dija unduk Nyainé maan barang-barang buka kéné?”

Ni Latri tusing masaut laut magedi ka kamarné. I Nyoman Kocong mapangenan padidi. Idup lacur buka kéné, kurenan sing dadi ajak lacur, buina tusing ngelah pianak. Pragat suba lacur idupné I Nyoman Kocong.

Buin maniné ri kala I Nyoman Kocong majalan meli baas, diti mara karasayang idupné seken-seken lacur. Tusing ada buin toko ané nyak ngemaang I Nyoman Kocong matanggeh, sawiréh I Nyoman Kocong suba liu ngelah utang kanti sing ngidayang mayah. Aget, ada tuah abesik dagang ané nu madalem I Nyoman Kocong lantas ngemaang I Nyoman Kocong matanggeh meli baas.

Ri sagét di jalanné tepukina lantas kurenanné Ni Latri menék montor, sambilanga ngaba tas wadah bajunné. Lantas I Nyoman Kocong ngaukin kurenanné, kéwala Ni Latri nyaru-nyaru sing ningeh. Mapan sing masaut, I Nyoman Kocong mapineh-pineh malih, apa seken to kurenanné apa sing. Risedek neked jumah, I Nyoman Kocong ngejang baasné lantas ngénggalang macelep ka umahné, nyingakin paukudan kurenanné. Nanging kurenanné tusing ada, saja mula ané menék montor busan to tuah kurenanné. Cingakina makejang bajuné Ni Latri masih sing ada.

Telung wai suba pagedina Ni Latri, masih tusing ada kabar. Sagét pisagané kauk-kauk sambilanga ngejer.

“Man, Maaan Kocong,” kéto anaké gelur-gelur.

“Nak ngudiang gelar-gelur?”

“Kéné Man, ditu anak matabrakan ngaba motor.”

“Men, apa hubunganné ajak tiang?”

“Ané matabrakan ento kurenan Nyomanné, Ni Latri.”

Tan pasaut Nyoman Kocong lantas kema ka arep bale banjaré. Dapetanga Ni Latri jak mitrané suba sing nyidayang nulungin.

NB: Satua cutet puniki naanin kamuat ring Mediaswari, 24 Januari 2014