Kuang Kejokan

Olih: I Madé Sugianto

Gagambaran Olih Supartika

Pan Satria tangkejut ningalin solah pianak-pianakné. Uling aminggu, ia nlektekang pianak-pianakné matingkah soléh. Setata mayegan lan saling gésin. Rikala macadeng, mesuang munyin baburon. Ané kelihan ngaum cara macan, ané cerikan sing nyak kalah. Munyinné cara serigala maimbuh jurus ngegés, duurné ngigel, percis cara baburon nedeng galak.

Mara tlektek-tlektekanga, sagétan cerik-ceriké ané lénan masé matingkah patuh. Timpal-timpal pianakné di TK, kéto masi anak SD ané sekolahanné mapunduh, patuh matingkah buka baburon nedeng galak. Cerik-ceriké matingkah buka kéto baan nepukin lan mabalih sinétron di tiviné. Pan Satria minehang pasti sinétroné ento ané makada cerik-ceriké buka kéto. Pan Satria ané kapah mabalih tivi – nuju-nuju mabalih rikala nimpalin pianakné mabalih kartun, orti, dikénkénné mabalih sépak bola Barcélona lan Réal Madrid – sinah sing rungu tekén sinétron buka kéto.

Pan Satria marasa jejeh tekén sinétron-sinétron ané kaputer di tiviné kerana tusing ngrunguang kualitas. Yéning pianakné ané mara matuuh lima muang petang tiban ento jani nempa solah baburon, menék ngancan sinah bisa kena yusan hédonisme artis di tiviné. Mapan di sinétron lumrah ngédéngang kasugihan marupa umah méwah, mobil, muang ané lénan. Sujatiné di panegaran iragané, Indonésia, liu anak nengil tur maumah di betén kreteg utawi jembatan muang liu dadi gagéndong. Kéwala sinétron di tiviné langah nyeritayang anak lacur, anak tuara tur papa.

Jani sinétronné sarasa tusing ngajahin pamiletné, sekadi disiplin. Dong tingalin, panganggon artis lan aktor di tiviné setata kuang kejokan. Agemné tusing cara anak sekolahan, pantesné baju macelepan, malah kelésanga. Kéto masé muanin-muaninné di sekolah mabok gondrong, baju masé tusing rapi. Di tengah kelasé sing taén ngenahang anak malajah, malah ngédéngang anak matunangan. Dijané ngajahin disiplin anak masekolah?

Ngomongang baju kuang kejokan, jani mula tadi trend. Sing ja anak bajang ané nyaluk rok gantut, celana bawak, jani kayang ané tua milu magaya bajang. Maimbuh bajang-bajangé jani liu matato. Ané sedihang, jani murid luh milu matato. Ngrajah awak jani boya anak muani dogén, ané luh masé girang. Sing bajang sing tua patuh. Ngelap di margané nyaluk baju lan celana kuang kejokan, ngenah nganti buah tangkahné. Kéto masé ngenah témpol jitné. Dikénkénné demen ati ningalin yén ané mabusana buka kéto anak bajang jegég. Ané sing demenin, ada anak bajang makulit selem kakah, mabusana kuang kejokan maimbuh misi tato. Jeg saru, dong tato kadén lumut. Yén bajang jegég makulit putih misi tato jeg nengéng mata ningalin. Nganti lén-lén negakin montor, payu nabrak dagang canang di sisin margané.

Jani, mirib apa ja tepukina di tiviné, katempa olih kramané. Ané makada Pan Satria makrebetan di kénéhné unduk sinétron ané sing ngemaang tuntunan. Pantesné tontonan misi tuntunan apang ada tulada tekén pamiarsané. Dija ada sinétron cara ‘Si Doel Anak Sekolahan’ kabintangin olih Rano Karno. Ento mara luung, adung cara aab jagaté, sarjana singjaminan maan pagaén melah. Sing maan gaé di kantoran kanggoang dadi sopir bémo, ba seken ngasilang, yadiastun tunaan.

Pidan ada masé film majudul ‘Nyoman’, anak cerik di Bali ané ngipiang sida matemu Présidén Soeharto. Filmé ento kaputer sibarengan warsa 1990-an. Pan Satria inget pesan, dugas ento ia mara kelas lima SD, masekolah di SDN 2 Kukuh. Dugas ento, SD 1, SD 2, SD 3 lan SD 4 sibarengan mabalih di bioskop di Désa Marga. Jani bioskopé suba sing enu, suba dadi wantilan di tengah peken Marga. Inget pesen ia dugas ento makenalan ajak Luh Putu Déwi Sumaryati lan Luh Putu Mirah Torisia Déwi, murid SDN 3 Kukuh. Kéto masé makenalan ajak murid SDN 1 Kukuh ané dengél makulit putih mabok sosoh mapeséngan Gék Agung. Maketelu bajang cerik ento wantah siswa teladan, dugas ento Pan Satria masé siswa teladan, langganan maan juara 2 di kelas.

Film ‘Nyoman’ becik pisan. Patut tulad, baan seleg malajah, ia nyidang matemu Presidén Soeharto. Saihang tekén Sang Arjuna, Nyoman patuh seleg, ikun, pageh tekén raga malajah apang wisésa. Yén sing seleg malajah, sinah Nyoman sing matemu Présidén Soeharto. Yén tan pageh nangun tapa, sinah Sang Arjuna tan polih pica panah Cadu Sakti saking Ida Bhatara Siwa. Jani sing ada film ‘Nyoman’, ‘Si Doel Anak Sekolahan’ ané sedeng tempa laksanané. Yén pidan, artis lan aktor nutur manis nganutin sor singgih. Jani sing ada kéto, malah sinétron nguwugang tata basa Indonésia.

Yéning Komisi Penyiaran Indonesia (KPI) sida galak lan mrédél ‘Litle Krisna’, ‘Bima Sakti’ lan ‘Mahabaharata’, nguda sing mabayu nyuudang sinétron-sinétron berek ané ngraméang kelir tiviné. Yén setata melihang lembaga sinah sing patut, paling melah da mabalih tivi. Yéning pineh-pinehang, KPI pinaka tukang turéksa masé kuang kejokan galahné. Pasti ada ané liwat katuréksain, ento makada sing beneh raga melihang KPI. Iraga dadi anak tua pantesné nimpalin pianaké rikala mabalih tivi. Kéwala galahé kuang kejokan. Yén setata nimpalin pianaké mabalih tivi, sinah sing beneh. Iraga patut magaé ngalih pangupa jiwa anggon kulawarga. Nyén patut pelihang, tivi, KPI apa iraga?

Kukuh, Sanicara Kliwon Wayang, Tumpek Wayang, 11 April 2014

Galah 09.40 WITA.