Tuturin Tiang

Olih: I Putu Supartika

"my island of gods" Gagambaran Made Bayak

Éh warsa anyar

diolas tuturin tiang

tuturin indik carik

ané suba dadi témbok panyengker

ané suba dadi pedeman anget

tuturin tiang

tuturin tiang indik padi

padi ané suba dadi beton

indik import baas uli dura negara

indik jagung ané tuh

indik yéh tlabah ané nyat

Éh warsa anyar

tuturin tiang

diolas tuturin tiang

indik gunung ané tusing mabulu

indik alas ané asah

indik tukad ané tuh

indik udang lan ketistis ané suba mati di slepitan batuné

diolas tuturin tiang

tuturin tiang indik hotél

indik villa

indik pasisi ané kilangan goba

indik manusa ané ngajengit ngamah pipis

diolas tuturin

Éh warsa anyar

diolas tuturin tiang

tuturin tiang indik kota ané mapupur menor

indik bikul medasi 

indik ajin BBM ané nanjak lebihan tekén tanjakan di Gunung Agung

tuturin tiang

da iba nengil

nengsil mabalih kembang api

da empeta koping ibané baan munyin mercon

munyin cedar-cedaran, munyin somprét

diolas tuturin tiang

apang mani puan ada tuturang tiang tekén pianak cucuné

apang pianak cucuné nawang kija cariké ilang

kija punyan kayuné ané nyujuh langit malecat

kija oyagan padiné ané maganti dadi beton lan garasa mobil