Bok, Kumis, Jenggot, Bulu

Olih: Sutéja Naréndra

Yén kénkén unduké, yén kénkén kawitné, teka uli peken, Mén Doglér saget jeg ngerémon ngajak kurenané, Pan Doglér "Bli, ngujang liu gati anaké Hindu Bali ngelah Widhi? Buin magenep adané, betara, déwa. Malénan ento?"

Mimih, jeg makesiab Pan Doglér maan patakon wayah buka kéto. Kalingké nawang Widhi, masekolah dogén ia tusing taén. Sastra Bali masé sing keduman bana mamaca. Béh, katos ia magelekan, kipak kipek, klingas klingus. Mén Doglér masi bengong, ngantiang mirib apa ya lakar pesaut kurenané.

Suba apakpakan basé, saget Pan Doglér ngedeng kurenané macelup ka jumahan umah, saha ngancing jelanan. Mén Doglér bingung, sawiréh kurenané ngelés baju muah celana. Pan Doglér melalung lujug!

"Nak kénkén né? Wééé nu lemah né Bli, eda nyemak gaé kakéto. Angus nyen nasin dedariné!" Kéto Mén Doglér sada masemu éwér. Pan Doglér masaut kisi kisi," wéé...nyén nagih kakéto? Bli tuah lakar nuturang satua pingit. Satua unduk Widhi, buka petakon I Luhé. Aja wéra! Ento awanan bli makancing jelanan" jeg anteb pesan Pan Doglér ngaraos, sing misi kenyem nang abedik. Laut ia ngelanturang ngaraos, "né adané bok. Saluiring ané kakéné, mentik di sirah, adanina bok," abuta bokné akatih, janga di telapakan liman kurenané.

"Ané mentik di betén cunguh, adanina kumis," abuta kumisné akatih janga di telapakan liman kurenané.

"Ané mentik di jaguté, adanina jénggot" abuta jenggotné akatih janga di telapakan liman kurenané.

Saget Pan Doglér ngogo bok ané mentik beten siksikané. Abuta akatih, aruuuh..., kanti ngeritis pesu peluhné, pesu yéh matané ngabut boké ento, sada ia ngaraos, "naaah...yén ané mentik di betén siksikané ené, adanina bulu. Tegarang jani tingalin, malénan bok, kumis, jénggot, tekén buluné ento, Luh?"

Béh jeg seken pesan Mén Doglér nelektek bok, kumis, jénggot, muah bulu ané di telapakan limané.

"Patuh bli, bantas ada sohsoh ada lingker!" Kéto pesautné Mén Doglér sambil kenyem kenyem jail. Pan Doglér ngaraos banban, "masalah sohsoh tekén lingker, ento tuah goba, tuah paawakan dogén. Kéto masi adan muah kagunané manut tongosné ia mentik. Sakéwala untengné, isiné muah lakarné patuh, pada pada bok. Ulihan bli belog sing nawang lud, miribang bli Widhiné buka kéto masi. Ida maparab liu, manut tekén guna miwah swabawan Idané. Sakéwala sujatiné Ida tuah abesik. Nyak kéto asané Luh? Legaang pesan, bli sing bisa nelatarang aji raos buka anaké ané suba pascat ring daging wéda."

Mén Doglér buin matakon, "Men, yén betarané patuh, ngudiang ada anak ané nyak, ada sing nyak maktinin. Contoné betara kawitan? Kénkén ento bli? "

Pan Doglér mesaut sambil mekenyem, "kawitan ento kan an" nglekadang iraga? Yén kéto, indayang bli buka buluné ané mentik di betén siksikan. Ngujang paksa anaké apang nyak nyemak bulun gelahé? Kéto masi iraga, nyak melah rasané yén ada anak maksa nyemak gelahé ané pingit ento? Jeg depang kéto, kénkén ja keneh anaké. Sing dadi maksa-maksa!"

"Men yén bli ngudiang nyak nyemak bulun tiangé? Di kénkéné bli bisa memaksa nyemak." Kéto Mén Doglér protes, sakéwala misi makenyem. Pan Doglér mesaut sada mekenyem, "ah, ento kan ulihan bli ané ngelahang. Mula wajib bli nyemak ento. Tegarang bli sing nyemak ento, bisa masé I Luh ngambul. "

Kéto masé betara kawitan iraga, yén mula gelah patut baktinin. Buina yén sing baktinin bisa kepongor, bisa sepékang nyama. Sakéwala eda pesan maksa anak apang bareng maktinin. Buka iraga maksa pisaga nyemak bulun iragané, singké ia seneb? Apa buin mangsit buka gelah bliné!"

Maka dadua kedék pingkel-pingkel.

Saget ada munyi magrudugan buka témboké bah. Béh, tau-tau pisagané makejang ngintip, kadéna ada branangan di jumahan umah.