Tusing Ulian I Sepi

Olih Putu Nopi Suardani

Sumber Gagambaran

Muani-muani kayang seka trunané pada magaé di pawaregan, nektek tabia, ngaé basa-basa, ngelasin katik sate, ada masih ngendihang api kanti bekbekan di paon krana saangé ibi belus ujanan. Ané lianan ngorok siap anggona isin banten pejatiné.

I Sepi, kéto anaké ditu ngaukin, tusing karoan nyemak gaé, uli mara teka dadiané ané muani, ané lakar ngébat di Bukit Galah. I Sepi begbeg sliwar-sliwer di malun anaké ramé magarapan, ngaba kayu pangancukan nyambu mabedbed aji kain kasa ané tusing maanggon. Menék tuun sing leleh-leleh uli jaban purine ka jeroan.

Suba ada ping dasa Wayah Laga ngorahin I Sepia pang tusing ngancuk-ngancuk umah tabuan kuning di gedong palinggih Sri Galuhé. Tua-tua ané lianan, Mangku Rica, Pekak Brayut, lan Wa Surung masih ngorahin kvto. “Suud ngancuk-ngancuk umah tabuané,” kéto penikan panglisir-panglisiré masih tusing runguanga. Truna-truna lén solahné, pada ngedékin solahné I Sepi. Malah ada ané nulungin ngalihang lengis gas lakar morbor tabuanné. Ané nulungin I Sepi masih sing nawang unduk. Milu-milu tuung dogén.

Makelo-kelo krana I Sepi tusing ningeh munyi, dadiané ané lianan pangenanga magarapan apang énggal dadia luhé matanding banten. Saka besik anaké istri pada teka marérod nyuun sokasi misi pesuan nasi anggon magibung ngancan mabakti.

Galahé ngancan sanja. Dadia luhé suba suud matanding. Ané muani masih suba lakar suud magarapan. Ané enu magaé enu nulukang saang di paon apang énggal lebeng jukut arésé. Ané lianan pada nyicipin tuak ané mara belina di dagang ba daja di dagangé ba daja madan Bakri.

I Sepi using tuun-tuun uli jeroan. Ada anak cenik-cenik muani ajak dadua ninggalin apa ya gaéna anaké muani ento. Di malun palinggihé I Sepi enu masih ngancuk-ngancuk umah tabuané. Lantas pesu tabuan kuning ngeriung ngrebut I Sepi. Ada nyenget pipiné, limané, batisné, sirahné. Makejang awakné senget tabuan. Anaké cerik-cerik malaib, takut senget tabuan. I Sepi mula jlema kebal tabuané ané enu makeber tamploka, ané di natahé jekjeka kanti mati. Pangancukan nyambu ané suba mabedbed kain kasa di mncukné kabyosina lengis gas. Lantas ia ngenjit colok lakar morbor kainé ento. Kayuné ané jani misi api celepanga ka tengah gedongé, morbor umh tabuané. Tabuané ané gedé-gedé nyumingkinang liu ané pesu nyenget I Sepi. Ané di tengah liu mati kena api. Pedalem pesan tabuané tusing pelih apa-apa, mati tan paguna. Sedeng I Sepi rebut tabuan, pine sayan gedé. Raab duk palinggihé dilap api. Jani paling I Sepi ngalih yéh apang apiné mati. Énggalang tuun ia ka jaban purine malaib. Bin kesepné suba di jeroan ngaba ember cenik misi yéh. Raab duké kabyosina yéh.

Tengkejut tiang nepukin geriungan tabuan kuning gedé-gedé. Énggalang tiang nekep muan tiangé apang tusing senget tabuan. Mémék masih takut. Orahina tiang ngejohin palinggih Sri Galuhé. I Sepi masih enu nyidayang makenyem sambil nakonang kabar, krana suba makelo tusing taén tepuk ajak nyama dadiané ané masekolah joh di guminé.

Tusing makelo I Sepi ngajak ngorta. Tinggalin tiang limané barak-barak senget tabuan tapi tusing sinah ia marasa sakit lan pedih. Suba kéto énggal-énggal ia tuun ka jaba pura ngaba pangancukan nyambu. Tusing tawang apa ané lakar jemaka buin.

Dadia luhé suba pragat ngajang banten, soroh peras, bayuan, sayut, tipat kélan lan daksina. Anaké ané suba pragat magaé di pawaregan menék ka jeroan pada ngaba sampat lan panglandesan padang. Sekaa trunané mutbutin padang di palinggih lan natahé. Liu sajan palinggihé misi lumut. Ngenahang pesan anaké ditu kapah mabersihdi pura. Yan suba lakar maturan mara nyampat. Aget ya bhatarané tusing menggah. Sawai-wai luu di purine tusing ada ané ngrunguang. Jani mara ya ramé-ramé nuduk luu. Padangé masih kanti tegeh lan mokoh. Tusing ja tabuan dogén kanti maumah di pura, legu ramé-ramé neka.

Dadiané ané mabersih tusing bani mutbut padang di palinggih Sri Galuhé. Luh-luhé pada magedi ngutang kranjang misi luu. Ané muani-muani masih ngejohin.

“Ah, yang takut senget tabuan,” ada anak bajang kisi-kisi jak timpalné.

“Depang suba padangé ditu. Tabuané anak ganas-ganas. Johin suba,” ané liana nada ngomong kéto. Tileh palinggih Sri Galuhé kondén bersih. Buin kesepné teka Pak Nyoman, dalangé ané pepes ngwayang sabilang ada usaba di pura, ngaba panglandesan padang. Banianga ibané maakin palinggihé ané kondén kedas. Tusing runguanga tabuanné ané makeber di sampingé. Tiang jeg nyeh ninggalin Pak Nyoman. Mémék lan misan tiangé mabalih dogén misan bapak tiangé ento.

Gedur-gedur tangkahé jejeh, dumadak ja Pak Nyoman tusing kenapa-kenapa. Ajaib pesan. Suba ada molas menit ngedasin padang, tusing ada tabuan bani nyenget. Telektekang tiang ada tabuan lakar nyenget limané kvwala buin kesepné tusing payu nyenget. Malah makeber gejohang.

“Mék, tinggaling ja Pak Nyoman. Adi kemak-kemik. Cara mamantra. Ngamantrain tabuanné,” tiang kisi-kisi di samping mémék tiangé.

“Encen?”

“Ento, sekenang ja ninggalin. Néh, néh, ento tinggalin. Tabuané jeg dengénga sambilanga mamantra,” enu tiang kisi-kisi sambil nujuang tabuan.

“Sajan Tu,” mémék tiangé mara percaya.

“Adi bisa kéto, Mék?” Buin tiang makisi-kisi kéwala tusing sautina patakon tiangé.

Kénkén kadén ngusiang kayu panglandesan ané gisina tekén Pak Nyoman lung dadi dadua. Besi panglandesanné kelés. Lantas mamunyi ia kakéné, “suba orahin anak tusing kicén dini mabersih.” Tiang ané uling tuni nlektekang Pak Nyoman tusing ngerti apa ané busan omonganga. Miribné ia gedeg krana tiang jeg mabalih dogén, tusing nulungin mabersih. Kayu panglandesan ané suba lung pantiganga. Nyumingkinang tiang takut krana Pak Nyoman mamunyi keras-keras, “Mi, Mi Déwa Ratun tiangé. Adi kakéné tepukin guminé. Makejang anaké teka ngaba gedeg basang.”

Tiang seken-seken tusing ngerti omongané. Tusing taén tepukin tiang ia mesuang gedeg di malun anaké ramé, apa buin di malun dadiané. Munyiné keras pesan madingehan tekén ané enu nongos di jaban purine. Ané di sisi pad aka jeroan ninggalin indik Pak Nyoman gedeg.

“Déwa Ratun tiangé. Ngudiang borbor palinggih tiangé. Yéh apa koné anggona nyiram raab raab palinggihé. Déwa ratun titiang…,” nyumingkin gedé pesu munyin Pak Nyoman, gedeg macampur ngeling. Suud munyiné ané busan, makejang anaké ditu inget tekén I Sepi krana tuni ia ngranayang raab duké dilap api. I Sepi ané uling semengan magutet lakar morbor tabuan di palinggihé. Kéwala jani ia tusing ngenah. Ilang.

“Déwa Ratun tiangé, jlema-jlema dini suba tusing inget ajak kawitan. Makejang pada magedegan. Makejang paliatné tegeh-tegeh dogén. Nalih pipis, ngalih kasugihan. Tusing inget tekén kawitan. Dini kawitanné. Déwa Ratun titiang, anak Sri Galuh menggah tekén anaké dini uli makelo.” Sujatiné Pak Nyoman karauhan.

Kondén pragat jero mangku mamantra, anaké karauhan ngliunang. Apa ané ngranayang Bhatarané di Bukit Galah menggah. Tiang masih tusing nawang. Ramé anaké ngomongan I Sepi krana ia ané ngaduk umah tabuan di palinggih ané ngranayang Pak Nyoman Karauhan. Tinggalin tiang I Sepi pesu uli paon. Liman ajak batisné putih misi abu apang gigisan rasa pedih senget tabuan. Apa mula sajan ané orahanga tekén Pak Nyoman. Anaké teka ka pura makejang ngaba gedeg basang. Sajan ja kéto? Kéwala tiang tusing ja taén ngaba gedeg basang ka pura. Apa mula sajan anaké engsap tekén kawitan? Yén tiang tusing ja taén engsap kaping tiang kapah tangkil. Apa mula saja anaké paliatné ané tegeh dogén, ngalih kasugihan? Yén tiang, mula ja demen magaé sambilan apang liu maan pipis. Apang nyidayang meli kebaya melah-melah anggon ka pura. Apang nyidayang meli mas ané maal cara ané anggona tekén anak lén. Di jalané lakar mulih suud maturan, tiang jeg takut ngenehang Bhatarané anv di Bukit Galah menggah tekén tiang.

NB: Satua cutet Putu Novi Suardani puniki kaambil saking cakepan dané sané mamurda “Bli Kadék” kaca kaping 8.