I Dewa Gedé Windhu Sancaya

DG Windu Sancaya

I Dewa Gedé Windhu Sancaya embas ring Tabanan, 27 Oktober 1960, tur sampun magenah ring Dénpasar warsa 1960. Saking kantun masekolah ring SMPN 1 Dénpasar sampun seneng masesuratan. Sasuratandané marupa karya sastra sané kaunggahang ring majalah dinding sekolah. Kasenengan nyurat sastra miwah main drama modéren nglantur kantos masekolah ring SMAN 1 Dénpasar miwah rikala dados mahasiswa Fakultas Sastra Unud Jurusan Basa lan Sastra Bali warsa 1980-an. Polih taler masikian sareng Téater Poliklinik pimpinan Abu Bakar, Téater Kampus Unud miwah ngaryanin Club Studi Téater Fakultas Sastra Unud sané ngwentenang pementasan drama Di Bawah Bulan keliling Bali lan Lombok warsa 1983. Siosan ring nyurat sastra Bali anyar, Windhu Sancaya taler nyurat sastra Indonésia modérn, marupa puisi, cerpén lan drama, miwah esai.

Kakawian-kakawian dane naanin kawedar ring surat kabar Bali Post, Nusa Tenggara (Nusa Bali), Simponi, Kompas, Cintamani, Warta Hindu Dharma, Orti Bali, miwah sané tiosan. Naenin polih juara ngaryanin satua cutet, drama, lan puisi, sané keselenggaraang olih Pémda Bali, Listibiya Bali lan Univérsitas Udayana. Ring warsa 1980-an dané sering nagingin acara drama ring TVRI Dénpasar. Taler naenin polih juara penulisan artikel Pésta Kesenian Bali warsa 2000. Naenin taler dados aktor lan sutradara drama terbaik Porseni Mahasiswa Unud warsa 1981. Silih sinunggil satua cutet dane sané mamurda Dark Sky over the Village sareng kapupulang ring pupulan satua bawak mabasa Inggris: Bali Behin the Seen. Kakawiandané sane mabasa Bali kapupulang ring kembang rampé sastra Bali, sekadi Puyung (1981), Ngayah (1982), AI (1983), Gending Pangapti (1984), Crakian (1996). Warsa 2004 ngamolihang Hadiah Sastra Rancagé, saking Ajip Rosidi Foundation, antuk pupulan puisi lan satua cutet Bali modérn sané mamurda Coffee Shop. Saking warsa 1986 dané dados dosén ring Jurusan Sastra Bali Fakultas Sastra Univérsitas Udayana rauh mangkin.

Niki wantah silih sinunggil kakawian dané marupa puisi sané mamurda Prof. Bagus sané kaambil saking cakepan Dénpasar lan Don Pasar kaca kaping 88.

Prof. Bagus

(IDG Windhu Sancaya)

Wénten sané maosang

Yukti manawi sangkaning embasé dumunan

mawinan prasida akéh maparilaksana Nanging akéh sané dumunan embas kéwanten tan wénten cihna katinggalin

Pemarginé gancang kadi suluk toyané ring masan sabeh sapasira purun mialangin janten keni kalabuk

pakayuné sebet tan wénten né sida nangkis

akéh sané kawilangin riantukan tan wénten né ngayunin akéh né nyumbungang naler akéh né moyanin

Pamarginé gancang kadi angin baret sasih kaulu pakayuné gelisan rauh ring sané lianan

tegeh ngalik becat kadi lelipi awan gelisan kasép antuk minehin

Sesampuné galahé rauh

panumayané tan sida antuk mialangin duaning karsan Sang Hyang Tuduh