Dénpasar Kota Budaya

Olih: IDG Windhu Sancaya

 

"Melasti Barung" Gagambaran I Ketut Soki

Dénpasar kota budaya

Ngedas lemah ngantos  ngedas wengi pasliwer anaké ring marginé tan surud-surud:

Ring jalan Gajahmada wénten pasar Badung,

ané setata kebekin olih dagang-dagang saking dura désa ngrereh pangupa jiwa

saking semeng ngantos  ka semeng saking peteng ngantos  ka peteng

anaké rauh matumbasan taler tan surud-surud

tukang suwuné éncol nyagjagin “bos-bos” sané tuwun saking mobilé

Bes raménné, ngantos  kakaryanin parkir betén tanahé

sakadi omang-omang karag-kirig ngrereh genahnyané sowang- sowang

Dénpasar kota budaya

Semeng-ngremeng ramé anaké mlaib ring margi-marginé  maolah raga. Wénten sané senam tai chi, wentén taler falun dafa miwah sané siosan, di sisin-sisin lapangan  Puputan Badung I Gusti Ngurah Madé Agung

Mategepan pisan: Wénten cina tua-tua, wénten arab anggut- anggut,

wénten jawi, wénten madura lan sané lianan, bajang cerik lanang istri gancang  majalan saling langkungin

wénten taler tentra nglintér mlaib nglindérin lapangan  puputan: tuk wak tuk wak tuk wak!

I kaki lan I dadong masih milu majalan adéng-adéng sambilanga kitak-kituk ngenehang Dénpasaré ané malu lan ané jani.

Tengainé,

pagérung montor lan mobilé saling langkungin

marginé démpet ngémpéd kadi punyan boni nedeng mabuah toko-toko lan swalayan tan pendah saling ngedéngang harga murah

lan diskon sing dadi tawah

pasliur raré lan truna-truniné “méjéng” ring mol-mol mitbit ayam goréng kentaki, burger makdi, lan pitza hat sambilanga haha hihi héhé hoho…

ring betén punyan celaginé miwah duwur trotoaré akéh anaké main catur ngolah otak sambilanga ngroko klepas-klepus makedékan

ané siosan mabalih sambilanga milu makeneh, ngenehang déwékné padidi

ring vila-vila sisin tukad ayungé para ékspatriaté maca buku, nginum kopi lan makpak roti sambil mligbagang budaya baliné aduuuh…aduuuh…!

Sorené,

Pasliah warga kota Dénpasar medal ngrereh angin, mlinggih ring tengah lapangané sambilanga melut kacang lan ngutgut jagung bakar.

Wénten sané ngajak pianak lan somah, wénten ngajak cucu lan dadongnyané.

“Es krim kak, és krim kak,” cucunné matagihan.  Dagang lumpia éncol manyagjagin.

Wénten taler alit-alit sané mlayangan, nendang bola sareng timpal- timpalné,

sané siosan ngebérang kembungan lan ngupin emprét-emprétan.

Di sisi kangin, kelod, kauh lan kalér lapangané tukang parkir lan dagangé saling seluk.

Dagang bakso tréng téng tréng téng, tukang parkir keprit-keprit sambil nudukin pipis.

Kacang rébusé nglepus mesuang andus katumpukin jagung rebus. Dagangnyané kuangan galah ngayahin sang numbas

Banjar-banjaré suwung mangmung suwud kapayasin

Klian lan prajuruné uyut nepukin cerik-ceriké maplalyanan ngawé luwu

“Banjar kedas dadi ményi, mulih mulih!!”.

Cerik-ceriké mlaib ngalih tongos gim-onlain, plé-stésion lan internét

Ha ha ha…

Dénpasar Kota Budaya

Patung catur mukané kangen manggihin warga kotané sekadi nénten kenyel-kenyel

Majeljel

Saja mrasa kuangan awak lan kuangan tongos

Nanging sampunang ngantos  kuangan pamineh

I bapa negak di balé dangin sambilanga ningehang radio wiréh sing bani pesu ka jalanné

di radioné ada anak cenik matembang sinom

tembangé ngasirsir nempuh kupingné ané suba bongol: “…idep beliné mangkin, makinkin mayasa lacur,

tong ngelah karang sawah, karang awaké tandurin, guna dusun, né kanggo ring désa-désa ”.

Dénpasar, Anggara Wagé Matal, 6 Novembér 2012

NB: Puisi puniki kaambil saking cakepan “Dénpasar lan Don Pasar” kaca kaping 89-91.