Sinom-sinoman Wreda

Olih: IDG Palguna

"Iseh im Morgenlicht" Gagambaran Walter Spies

Puniki carita kalintang nista

indik wang lingsir

sinoman wreda dané kasengguh

apan nguni kocap kasudi

pinaka taméng papacek gumi

Mangkin

ipun i sinoman wreda

nandang idup kalara-lara

tan pasanak braya

nyabran rahina nyliksik bulu

saha ngapé-apé jagaté wayah

majalaran tembang mawarni pinunas:

déwa ratu sang hyang embang

kedeh titiang mangastiti

i ratu sang ngawiwenang

uripé sané asiki

mangkin meled titiang ngapti

mangda i ratu mapuwus

ledang bancut urip titiang

apan tan malih kasidi

mangda puput

utang titiang dadi jatma

cendek tembang dané

i sinoman wreda

nanging teges pinunas ipun

jakti singsal minab pupuhé

sangkaning tuwuhé nampekin sanja

nanging sira ugi jagi urati

mapidabdab indik tembang

ring ulu atiné

sané kalintang sungkawa

(béh, i guwak pasliwer gaok-gaok

mapi-mapi duta hyang yamadipati

mapengarah ring jagat sadaya

wénten manusa mapag pralaya)

Jakarta, Maret 2008