Blagbag

Olih: Gedé Ariés Pidrawan

Sumber Gagambaran

Ulian sakitné Luh Sari, nyansan wai reramanné nyansan bingung. Apa buin sakitné Luh Sari sing ngidaang ngenehin. Sagét ngeling kraik-kraik, sagét kedék ngakak. To ngawinang Luh Sari jani mebelagbag. Makedadua limanné mategul. Batisné bareng mategul. Yén sing kéto, sinah Luh Sari lakar melaib sradak-sruduk. Dugasé maluan, dugasé Luh Sari kondén meblagbag, Sabilang sandikala Luh Sari melaib pati kaplug tulén bangkung paling. Sekancan ané tepukine di malunné terubuke. Tukad lan pangkung dalem-dalem ceburine.

Suba duang bulan jani Luh Sari ngaba penyakitné ento. Konyang pisaganné suba takonine, kenape pianakné bise kekéto. Ade pisagané ngoraang Luh Sari sakit ulian kéné bebai, ade ngorang penyakitné luh Sari ulian keguna-guna, ade masih pisagané ané ngoraang Luh Sari stress.  “Jani nak mule liu remajané defresi” Kéto pisagané nuturin. 

Pan Sari nyansan wai nyansan inguh. Ngoyong jumah, ningalin pianakné buke kéto sirahné merase baat, awakné ngetor. To ne ngawinang Pan Sari sabilang wai sing taén ngoyong jumah. Yén sing ka tajen, Pan Sari meceki, yén sing meaceki jeg pasti sube meangguran, negak-negak di perempatan jalané gedé metékin montor liwat. Miribang tajén lan cekiné sube anggone penyelimur manah tekén  Pan Sari.

Patuh ngajak semengané jani, Pan Sari sube meangguran di warungné Luh Rauh. Meli kopi, godoh, lan roko. Ningalin Pan Sari ané negak di malun warungné, iseng-iseng Luh Rauh metakon. “Bli, sube seger pianaké?.”

Mireng petakon Luh Rauh, Pan Sari metolihan, nyedengang nyiup kopi ané sube nénggél di malun bibihné. “Bih berat Luh.” Pan Sari mesaut bawak, lantas ngelanjutang nyiup kopi.

“Pan Sari, yén sing pelih ban tiang, tiang ngelah timpal kekéné masih sakitné. Ie ngidaang seger ulian meubad ke psikiater,” Luh Rauh nuturin Pan Sari apange Luh Sari énggal ngubadang pianakné ke dokter jiwa.

Ningeh tutur Luh Rauh Pan Sari kingeh-kingeh. Mirib ie sing je ngerti ajak arti psikiater. Égar Pan Sari mebalik nakonin. “Ape madan psikiater to Luh?.” Pan Sari metakon sambil kenyir-kenyir, miribang ie lek ati ban kebelogané.

“Psikiater to artiné dokter ané ngubadin anak ngelah keneh sing waras. Psikiater to ngubadin soroh jelema ané sakitné keraik-keraik, kedék ngakak, lan kenyem-kenyem sing beneh.” Luh Rauh lantas nuturang.

Ningeh kéto Pan Sari égar kenehné, miribang jani ie sube nemu jalan apang sakit pianakné énggal seger.

Pan Sari melaib mulih. Ngalih kurenané, seger sajan kenehné Pan Sari mulih, lakar nuturang unduk dokter ané ngidaang ngubadin penyakit pianakné. Tepukine Mén  Sari di umah metén sedeng meilih-ilih, minab Mén  Sari engkeb sajan suud ngisiiang liman pianakné  ané galak tur keraik-keraik.

“Méménné-méménné, jani jeg aluh sube, penyakit pianaké pasti énggal ilang,”. Mén Sari metolihan. Mén  Sari kesyab mireng munyin Pan Sari né sing karuan unduk. Mén  Sari lantas metakon.  “Bli, nden malu, adéng-adéngang abeté ngeraos, tiang sing ngerti apa né keraosang Bli to?”

Ningeh petakon kurenané ané nyujut buke kéto, Pan Sari lantas bengong. Mirib ie nu nginget-ngingetang isin reraosanné Luh Rauh. “Kéné meménné, Bli tunyan sube maan metakon ngajak Luh Rauh, ie ngoraang nawang tongos dokter ané dueg ngubadin penyakit anak keraik-keraik, kedék ngakak, lan penyakit anak ané kenyem-kenyem sing beneh.”

“Terus-terus?” Mén  Sari negak maekang.

“Dokteré né dueg ngubadin to kaadanin psikiater Luh”. Kéto pesautné Pan Sari.

Ningeh tutur kurenané buke kéto, Mén  Sari lantas bangun ke umah paon, ngalain Pan Sari di umah metén né kenyem-kenyem ningalin pianakné. Pan Sari lantas maekin pianakné ané mebelagbag. Paekine tekén bapanné, Luh Sari kenyem-kenyem puyung. Peliatné joh. Pan Sari lantas ngusap-usap bok Luh Sari né nyansan wai nyansan medikang. Awakné nyansan wai nyansan meragang. Muané pekos. Né nu mesisa tuah tulang ajak kulit dogén. “Sabar luh, jani bapa sube nemu ubadné. Sing je mekelo Luh lakar ngabe sakité ené.” Kéto Pan Sari nuturin pianakné. Nanging Luh Sari sing je rungu. Peliatné tetep joh.

“Meménné, mani laan bareng-bareng ngataang pianakké meubad,” Pan Sari ngomong, sambil mekipekan ke umah paon. Nanging sing ade pesaut. Mén  Sari nedeng sibuk ngupin sémprong. “Meménné, mani laan bareng-bareng ngataang pianakké meubad.” Pan Sari nyumunin ngomong, sada bangras.

Uli di bungut paoné Mén  Sari gelur-gelur nyautin pengajak kurenané. “Bli, naang té kenehang malu, kude bli ngelah pis sangkan agem sajan bli lakar ngubadang pianakké keme?”

Mireng petakon kurenané buke kéto, Pan Sari mekipekan. Paling.

“Kadén Bli mayah limang tali, selaé tali, séket tali. Maubad ka psikiater apang Bli nawang, paling bedik mayahné limang atus tali Bli. To mare acepok, ondén yén meubad ping lime, ping nem.” Mén  Sari nglanjutang raos sambil ngulak-ngulikang baa api. “Kalingké limangatus tali rupiah, duang tali rupiah sing taén misi di kantong belinné. Hasil pegaén beliné tuah anggon beli meliang-liang pedidi. Metajén, matuakan, lan meceki. Bli mulih sing sajan taén nyisaang pis. Jani, di nemu sengsarané buke kéné, mekejang biayané ben pipis Bli, tusing je ben munyi dogén.”

Mireng raos kurenanné buke kéto Pan Sari bengong. Ape buin mireng pemayah dokteré ané liu sajan, ilang semangatné Pan Sari lakar ngubadang pianakkné. Pan Sari sing je nawang yén pemayah ubade di psikiater liu kekéto. Né kadengangé tekén Pan Sari psikiater to patuh ngajak dokter-dokter né ade di Puskesmas, né dadi bayah ban pipis limang tali rupiah. Pan Sari mejujuk, lantas megedi sambilanga ngeremon.”Nah, pedidi sube nyai ngitungang. Jeleme luh liunan munyi.”

Di bungut paonné, diastun baa apiné sube ngilab, Mén  Sari nu iteh bungkut-bungkut ngupin sémprong. Yéh peningalané mekumbengan. Ngenehang pianakné né sedeng meblagbag tanpa daya. Yéh peningalan Mén  Sari ne sube mekumbengan ulung paketeltel.

Amlapura, Desember 2010

NB: Satua cutet sané mamurda “Blagbag” puniki kaambil saking blog Gema Sastra Kita