Pipis

Olih: Madé Suar-Timuhun

Sumber Gagambaran

Matanainé panes nyentak, pas tengai tepet jam roras. I Wayan Gabin negak di ambén umahné ané mara pragat. Kesiran angin cariké ngetisin awakné ané peluh pidit ulian mara sajan suud madedaaran ajaka somahné di paon.

“Bli Wayan kopi apa gaénang icang? Kopi pait apa manis?” Luh Satuh matakon uli paonné.

“Béh pilihanné kopi pait ajak manis, kadén kopi susu apa kopi luwak ya. Nah kopi manis gén sik luh, sing misi makelo nah!”

Tusing ada amenit saget teka somahné ngaba kopi. “Suba manis kopiné to Luh?”

“Suba manis gigis Bli. Sing dadi naar lan nginum ané manis-manis sajan, kena penyakit diabetes nyen.” Luh Satuh nyautin.

Sépanan I Wayan Gabin nyiup kopi gaénan somahné ané suba ajaka mapikuran sawetara duang dasa tiban.

Gerooos, “Né mara pas manisné, cara manis kenyeman Luhé.”

“Béh Bli eda ja misi gombal, kadén suba makelo i raga idup bareng-bareng. Adi tumbén beli ngomong kéto?”

“Bli tusing ja gombal, anak mula seken buka kéto Luh. Bli meled sajan apang idup i raga makulawarga tetep manis cara rasan kopin Luhé né, manis pajalan idupé kanti telah angkihan beliné.”

“Buka kéto masih pangaptin tiangé Bli, yadiapin Bli dadi petani tiang tusing elek tusing sebet. Boya ento ukuran tresnan tiangé tekén Bli.”

“Nah suksma pesan Luh, lega pesan bli ngelah kurenan buka I Luh. Sujatiné beli sanget madalem ragan Luhé. Beli sing taén nyidaang ngajak I Luh malali, tusing nyidayang meliang i luh baju baru, kanggoang nah Luh. Né aget pragat masih suba umahé, yadiastun ulian ngadep sampi.”

“Nah-nah Bli tiang tusing ja nyangetang né kéto, ané penting nyidayang madaar lan umahé suba tusing tuduhan, tiang suba bagia beli. Nyak tis bataran umahé jani Bli, tumbén ngelah umah makramik.”

“Idup di désa kanggoang Luh, kanggoang malu amonénan. Kanggoang tuah makramik, kajokan pipisé meli marmer. Nyén nawang mani puan suéca Sang Hyang Widhi, i raga icena amerta né lebihan. Ingetang gén selegang ngrastiti bakti. Jaman jani idupé kewéh, apa-apa perlu pipis, yén bas sanget kenehang énggal suba boké tipis, jantuké malengis.”

Sing karasa suba a jam ngorta kangin kauh ajaka dadua, saget galahé suba jam satu. Yadiastun idup di désa, sing melah cara anak sugih né di kota. Wayan Gabin lan Luh Satuh setata marasa bagia, apa buin pianakné ané kelihan suba kelas telu SMK, suba makéré tamat. Sinah lakar ada nulungin ngalih pipis anggon nyambung idupné mani puan. Apa buin pianakné ané madan I Gedé Gasa masekolah jurusan Pariwisata, suba taén training magaé di hotél, suba bisa magaé, suba cageranga di tamatné langsung maan gaé. Dueg reramané ngemaang adan Gasa, mirib uli patemon adan Gabin lan Satuh, apang nyak setata mabesikan.

Saget makeblés I Gede Gasa teka uli sekolahan. “Mé, Pa, baang tiang pipis anggo mayah ujian, buin duang minggu suba ujian akhir!”

Makesiab reramané ningeh tetagihan pianakne buka keto. “Mara ibi pipisné anggo mayah ongkos tukang lan mayah bonan di toko bangunan, saget jani suba buin ada tagihan. Sing suud-suud gaen pipise.” Kéto krimikan bapané.

“Nah negak-negak malu ning! Men kuda mayah uang ujian Ning?” Méméné nakonin.

“Tuah duang juta Mé, to suba biaya perpisahan pada.”

“Seken to Dé, ada suratné?”

“Né Mé,” I Gedé Gasa ngenjuhan selebaran surat ané suba misi rincian biaya laut ia nuju ka kamarné nganti baju.

“Mimih Dewa Ratu, adi liu kéné mayah?”

“Kén silih Luh, tegarang beli maca!”

“Sajan duang juta sada mayah, sing dadi pabedikin apa mayah? Koné suba ada dana bos, apa ané kéné-kéné sing maan bantuan nah? Apa dana tuah baang bos-bos? Sing ngerti bana, sing madalem rakyat cenik.” Ngmigbig I Wayan Gabin, sing terima teken unduk.

“Sajan duang juta sada mayah, sing dadi pabedikin apa mayah? Koné suba ada dana bos, apa ané kéné-kéné sing maan bantuan nah? Apa dana tuah baang bos-bos? Sing ngerti bana, sing madalem rakyat cenik.” Ngmigbig I Wayan Gabin, sing terima teken unduk.

“Aa yén nyak tamat, kadén Luh suba nolih sawai-wai I Gedé sing taén malajah. HP-né dogén udika. Dadi sing beliang pulsa to, pulsané dadi sing bayah aji pipis? Budi welang, padalem pianak muani aukud. Sing nyak seleg cara adiné I Luh Uli.”

“Beli sing nawang jaman jani jaman canggih, sing ja uli buku dogén malajah, I Gedé nak malajah masih uli HP-né, uli internet apa adané to. Tugas-tugasné di sekolah nak liu masih apang ngaé liwat internet. Né aget suba sing nagih laptop, suba nyak ngerti tekén keadaan i ragané beli. Yén I Luh uli kan nu SD, mirib kondén perlu ané kéto. Tenang dogen Beli, I Gede pasti tamat, pasti lulus beli apang nyidang énggal ngalih gaé. Jani pipis ujiane malu urusang beli, eda ngurus ané tidong-tidong buin!”

“Yén saja kéto, dija men jani silihang pipis Luh? Mapan pipis adepan sampiné suba telah. Di carik jani nu ada godel gén aukud. Padalem yén to adep Luh.”

“Sing perlu sangsaya Bli, to tiang nu ngelah bunga jepun tuh duang kampil. Pipis adepan bunga pacah sawai-wai nak suba masih punduhang tiang Bli. Sisané yen kuangan kanggoang to céléngé adep aukud. Idup di désa yén sing ulian madepan dija men ngalih pipis beli. Aget masih suéca Widhiné ada né dadi adep. Né penting eda kanti ngadep tanah, ento warisan leluhur Bliné i pidan. Ento lakar terus tamiang baang pianak cucuné mani puan.”

“Nah yén suba ya kéto, bli lakar ka carik jani Luh mapan matanaine suba séndéh kauh. Kaukin ja I Gedé orahin madaar malu ka paon! Men adinné Luh Uli kija lakuna sing ada ngenah uli tuni? Kondén keluar uli sekolahan Luh?”

“Nah-nah Bli. Luh Uli tuni ngorahang mulih uli sekolahan langsung les ngigel koné ajak timpal-timpalné di Sanggar Putri Ayu Bli.”

“Nah yén kéto Bli lakar majalan ka carik jani Luh.” Wayan Gabin lantas nyemak capil lan arit laut majalan.

“Nah Bli, buin kejep tiang lakar ka carik masih ngalap bunga pacahé, mapan buin mani rahinan, nyén nawang nyak maal ajiné.”

“Dé madar malu ka paon, darang nasiné matekep di gerobagé, buin jep suud madar ingetang ngundebang gerobagé apang sing alih méong! Mémé lakar ka carik malu.”

“Nah Mé.” Tuah amonto pasaut I Gedé Gasa uli kamarné. Mirib ia nu seleg malajah. Mula kéto sawai-wai. Yén teka uli sekolah, neked jumah buin ia ngebit-ngebitang bukuné, ngaé tugas, lan ané lénan apa ya kaperluan sekolahné. Petengné apang nyidaang ia milu latihan magambel di banjar ajaka timpaltimpal pemuda di banjarne.

Sing karasa galah duang minggu becat sajan majalan. Bungan jepun lan celengné Luh Satuh suba dadi pipis. Kéto masih pipisné suba telah anggona mayah biaya ujian biaya sekolah pianakné. Hari senin, das lemah jam 4 semeng I Gedé Gasa suba bangun, mirib nyapnyap ia masaré lakar ujian. Ia lantas malajah di kamarné, apang nyidang nyawab soal-soal ujian binjepané. Jam 6 semeng ia suba rapi maseragam sekolah. Ia lantas ka paon ngojog méméné ané sedeng mapumpun nyakan.

“Mé, tiang majalan ka sekolah jani.”

“Adi tumbén semeng sajan ning? Bubuh méméné kondén lebeng. Apa men daar cening jani?’

“Jani kan tiang ujian Mé.”

“Yé saja, mémé engsap, suba pikun, suba mabok dadua. Né pipis bekelé apang ada beliang dedaaran di sekolah. Ingetang mabakti naké malu di sanggah apang selamet apang lancar bisa nyawab!”

“Nah Mé, tiang majalan jani,” Ia lantas ka sanggah ngaturang bakti nunas pasuécan Ida Betara apang selamet, ujiané apang sukses. Lantas ia majalan ka sekolah.

Diapin sing orahina tekén reramané, ia nak mula anteng mabakti di sanggahné, di purapura, kéto masih di padma sana sekolah.

Sing percuma ia sasai anteng malajah, diapin ia sing ja bas dueg. Ulian seleg pasti ngasilang. Kéto masih ia setata éling Hyang Widhi.

Buin duang mingguné saget suba acara pengumuman kelulusan. Murid-muridé ka sekolah nganggo busana adat madia. Luung sajan apang tusing ada corat-corét baju cara i pidan. Malén-lénan sebeng muridé ngantiang pengumumané. Ada né masebeng girang, mirib suba tawanga ragané pasti lakar lulus krana dueg. Murid ané lénan ané marasa belogan masebeng masem, jejeh yén kanti sing lulus. Kéto masih I Gede Gasa, tangkahné nrugtug.

Disubané bacaanga pengumuman olih Kepala Sekolahé, liang sajan keneh I Gedé Gasa krana ia lulus, patuh liangné cara timpaltimpalné lénan ané lulus.

Bagia pesan masih karasaang mémé bapané di subané I Gedé Gasa neked jumah lan nuturang déwékné lulus.

Nanging ada masih rasa jejeh, rasa sebet tusing nyidang lakar nglajutang pianakné kuliah. Sing ja lén pikobeté tuah di pipis. I Wayan Gabin anak suba pepes masih ningeh kabar di sisi unduk pakéweh ngalih gaé di jaman cara jani. Liu pianak pisagané ané suba tamat kuliah tusing maan gaé. Anak S-1 dogén liu naé nganggur. Men kudiang saingané liu. Ngalih gaé luung misi nombok. Masekolah suba maal-maal mayah, di tamatné kadén langsung maan gae. Di ngalih gaéné masih misi mayah. Apabuin I Gedé Gasa tuah tamatan SMK perhotélan, pasaingné lulusan kampuskampus pariwisata liu sajan. Saja hotélé di Bali ngliu-liunang, ané ngelahang liunan invéstor asing. Pengangkatan karyawan kéweh, paling aget makontrak.

“Cening Gedé Gasa, mapan suba lulus suba tamat, mani puan yén pét pradé cening sing maan maburuh di hotél wiadin réstoran anaké, eda nyen sebet nah! Saingané liu sajan. Bapa sing nyidaang nguliahang cening jani. Kanggoang nah Ning, bapa nu nutugang adin Ceningé apang nyidaang masih masekolah sabatak SMA/SMK cara Cening!”

“Nah Pa, tiang suba nawang unduké ento. Tiang sing ja sebet, tiang aget suba nyidaang masekolah kanti SMK Pa. Tiang madalem bapa lan mémé suba liu nelahang pipis miayain tiang. Tiang lakar nyoba muka warung Pa, kan suba bisa masak.”

“Nah lung yén keto Ning. Yadiastun di désa, né penting seleg mautsaha, seleg makuli, jaman jani tusing perlu géngsi, né penting ngasilang pipis ada daar sasai, dumogi suéca Hyang Widhi. Mirib kéné paduman idupé numitis, jani i raga apang setata optimis, magaé ngandelang lima lan batis, dumadak usaha dagangané lais, liu ngasilang pipis.”

NB: Satua cutet kakawian Madé Suar-Timuhun sané mamurda “Pipis” puniki naanin kawedar ring rubrik Médiaswari (Pos Bali) rahina Redité Kliwon, 15 Méi 2016.