Sugih

Olih: I Md Wiranatha Bhawa

"Balinese Ceremony" Gagambaran Men Sagan

Dugasé ento suba tengai. Matan ainé suba duur sirahé. Kebus karasa. Kadi kulité nagih puun baan menyahnyah. Majemuh. Kéto dogén sabilang wai. Munyin montoré ngrémpéng. Andus knalpotné malepuk. Nambakin pajalan dogén. Bonné jelék pesajan. Ngas. Bonné cara sera. Tiang nekep cunguh. Bon peluhé paling keras mebo. Yadiastun suba joh. Ulian bes liu anaké pasliwer mablanja. Ada matawahan. Majugjag. Saling sénggolin. Tua. Bajang. Anak cenik makejang ada. Ada masi ngajak nak cenik ngeling. Inguh sajan. Makejang iju ngaba déwék pedidi.

Menék suba ka bémoné. Di bemoné masih patuh panes. Di tengah tiang majepit. Kéné rasané. Kadén nak lén tekéning nongos di patongosan. Ortané liu sajan. Ada ngortaang anak sakit. Ada ngortaang kurenané plaibang timpal. Jeg tusing kakeneh. Tusing milu-milu. Nungkulang mireng orta ané boya-boya sinah suba lakar tusing maan apa. Tusing ada anak lakar sugih ulian ngortaang anak. Pelih pedidi tusing kena baan. Tungkulang nolih pajalan anak dogén.

Ipidan saja mula makejang ada. Nagih kéné, nagih kéto suba ada. Ngomong bedik suba ada ngabaang apa ané kadotang. Kadi raja idupé. Umah melah maprada. Setil Bali. Ukirané suba cara ané di Puri Gedé. Ané di Karangasem. Makejang sarwa imaluan tusing ada kena iusan cara janiné. Kayuné makejang suba mapilihin. Malakar baan kayu jati. Ento suba ada penyatus tibanan. Goét ngajak les ngenah malengis. Makenyit yén kena matan ai. Makejang melah yén tlektekang. Makejang ngajumang. Makejang dot ngelah umah cara tiang. Tongos ané resik. Tis buka jani. Paek tekén carik. Kedis liu manguci sabilang semeng mara endag matan ainé kelod kangin.

Di Banjar odalan gedé. Jani purnama kadasa. Galang pesan bulané ngenah masunaran. Melah sajan ngenah langité. Pamedeké sampun ramé rauh nangkil. Ada uli Karangasem. Ada uli Gianyar. Ada uli Tabanan. Ada uli Negara. Ada uli Badung. Ada uli Buléléng. Ada uli Klungkung. Makejang mabaju putih. Makejang maudeng putih. Kenehé masih apang putih. Keneh melah. Ané pula melah, sinah melah bakat alapin. Nah kéto anaké tua ngorahang. Mula tusing pati rungu. Tusing demen mirengang munyi. Ngomongé masi tusing demen liu. Nyanan bes liu. Liunan lakar pelihé ngenah. Sinah suba tusing nyidang lakar mamunyi ané beneh. Nyén lakar pelihang. Sinah déwéké lakar pelih.

Tiang enu nguntul nolih I Bulan. Galang sunarné. Melah sajan kenehé. Makejang rasayang tis. Anginé ngampehang. Bulun limané ngridip. Taén tiang makeneh ngoyong di bulan. Yén ngoyong di bulan sinah melah sajan. Ada suba widiadara widiadari ditu manongos. Tongosné melah. Sinah bersih. Tusing ada anak mapineh ané soléh. Anak ngorahang idup ento tuah sesolahan. Cara di sinétron. Pejalan satuané suba ada ané ngénter. Buka bébéké. Kemu laku apang kemu. Neng kangin apang kangin. Neng kauh apang kauh. Cara anak sing ngelah papineh ané tegteg.

Mémé lan bapantiangé mula kapah ngoyong jumah. Karasa aget abulan acepok matepuk. Taén orahanga reramantiangé magaé di luar negeri. Di tongos pemain bolané. Ento ané di Brasil. Tiang tusing seken nawang. Kanti tuuh tiangé suba ada limolas tiban. Kalingké ajaka kemu. Ngomong abedik lakar maan gapgapan munyi tiang tusing bani. Apa buin lakar nglawan. Tusing ada lén lakar pelih. Rumasa alpaka guru rupaka. Sinah di matiné tusing melah lakar tepukin. Panyaman tiangé suba makejang ngantén. Suba makejang joh pejalané. Ngelah jalanné pedidi-pedidi. Tusing ada matungkasan. Tiang pedidi col ngoyong jumah. Dadi pangijeng karang.

Reraman tiangé bes getol nguber arta brana. Panak pedidi tusing karungu. Kalingké odalan di pura lakar mulih. Tampak batis tusing lakar ngenah. Tampak lima tusing lakar matués anggo  ngaturang ayah di pura. Sinah limané kedas tusing matampak apa. Nyén lakar tundén. Sing ada lén pedidi ané ngelakuang pejalané. Di jumah. Dadi pangijeng umah. Umah ané tongosin tiang ajak Mén Madé lan Pan Komang. Ada masih kuluk tiangé ané madan I Tragia. Ané sesai ngintil. Sesai nutug kija lakuna tiang nindakang batisé. Ipidan taén ilang. Kado tiang ngalihin. Jejeh nyanan ada anak ngantongin. Jejeh masih yén ada anak nagel aji kayu. Tusing lakar duga yén ia mati. Saget teka Pan Komang ajak I Tragia. Orahanga nutug ka umahné Mé Ririh. Mara liangan kenehé. Kuluk tiangé ento tusing ilang.

“Komang dija né? Mémén tiangé nélpun.”

“Tiang jumah. Payu mulih mémé? Buin mani ada odalan. Makejang suba pada mulih. Beli Putu mara sajan neked di jumah. Ngorahang leleh. Suud mejalan joh. Makejang penyaman mémé lan bapa mulih.”

“Mémé tusing nyidang mulih. Bapa masih kéto. Makejang pada ibuk ngurusang kéné. Ngurusang kéto. Tekedang ajak panyaman mémé lan bapa yéning mani tusing nyidang mulih.

Dikeneh tiang sebet. “Sabilang peteng sinah suba lakar ngetélang yéh mata. Odalan di kawitan tusing mulih. Sanggah nyén lakar katurin. Sanggah pisagané. Sing nyumbah pagelah anak. Sanggah pedidi kutang.” Kéto tiang ngrimik dikeneh. Pakasirsir anginé ngampehang. Ketélan sakebedik yéh peningalané ilang. Suba plaibanga jak anginé. Tiang bengong. Nyelélég di samping jendélané. Buin ento bakat kenehang. Tiang tusing dot dadi anak sugih. Tusing dot ngelah makejang. Tiang takut lakar engsap ajak panyaman. Engsap ajak kawitan. Nyama sodet tusing karungu.

Matiné lakar pupu neng mani. Apang ada matolihan. Apang ada ané mreténin. Yén suba tua nyén lakar acepang. Nyén lakar ané matulungan dadi pangayah. Tindakan batisé suba réyod. Pelih nindakang sinah lakar ketanjung. Sinah suba lakar ulung. Tusing nyak patuh. Tusing nyak tiang buka kéto. Takutin tusing ada ané lakar matolihan. Sinah liu nyengitang. Kasengkalén suba jalané. Baye lakar tepukin.

“Mémééééé......????” Tiang bangun makaukan. Ipiané jelék pesajan. Bangun. Magerés uli di pesaréan. Ngéncolang tiang matolihan. Saget suba jam roras ngepas. Anak kénkén né?  Ada apa né? Nguda kéné ipiané. Buin gagésonan. Éncol tiang mlaib mulihan. Kebérang tiang saputé. Buin tiang nyingkrung. Tuah ipian. Tusing lakar dadi apa. Takutin nyanan sakit ulian makeneh. Ulian liunan ané kenehang bisa ané soléh-soléh lakar tinggar. Ané soléh-soléh bakat jemak gaéné.

Buin semengané saget suba mabiayuhan ortané. Ada orta mémé lan bapan tiangé ngalain mati. Pesawat ané tumpangina lakar ka Bali ulung nabrak bukit. Ané kenehang tiang. Dugasé ento reraman tiangé ngorahang tusing lakar mulih. Enu ada urusan kema mai. Ané jani saget mulih. Belin tiangé prajanian bah. Awakné lélor. Prajani tusing ada bayu. Tiang milu nagih bah. Encol Pan Komang nungkulang ngisiang. Belin tiangé tusing nyidang ngomong. Apa buin tiang.

“Mang…?? Komangggggggg….?”

Ada munyi ané samar-samar ngaukin tiang. Nanging saru munyiné. Tusing pedas baan mirengang.

“Mémé dini! Dlokin mémé. Ajak Madé…”

“Mémé!” Mémé ento ané ngaukin.?” Kéto tiang nyautin petengé. Tusing masi rungu tiang ulian jelék pesajan bayuné. Makejang pelih. Makejang tusing karesep.

“Madé tongosin mémé, tongosin bapa. Mémé jak bapa dini pedidian.”

Tiang nolih I Tragia neléhtéh. Mesuang layah. Ngetélang pues. Tolih tiang ia makaukan. Sambilang kedék sada nyalung.

“Madé…??? Aaauuunnnggggg…”