Ngadep Tanah

Olih: Nyoman Sadwika

Sumber Gagambaran

Masila matimpuh ening

Ening negtegang manahé paling

Paling ulian kuangan daya lan papineh

Papinehé kalahang loba nyapa kadi aku

Aku paling aku...

Aku... yéning aku sira sané bani?

Baniné ulian mamaksa lan marikosa

Marikosa gelah leluhur

Leluhuré nyerit ngeling sigsigan

Sigsigan ulian sedih kinkin lan lek

Leké madasar antuk laksana putuné

Putuné ngadep tanah tegal carik maan pipis

Pipisé mapupul égar mabriak ngakak

Ngakak di café

Ngakak di tajen

Ngakak di tangkah anak eluh

Eluh sing enu luih

Luihé suba makecos ka langit

Langité panes nglablab manusané

Manusané sayan campah cumangkah

Campah cumangkah metu ulian jengah

Jengahé metu bani

Baniné metu siteng

Sitengé metu bobad

Bobadé metu laksana corah

Corahé metu rug

Rugé metu kasengsaran

Dija jani benehé?

NB: Puisi kakawian Nyoman Sadwika puniki naanin kamuat ring rubrik Bali Orti (Bali Post) rahina Redité Kliwon, 10 April 2016