Merdeka (?)
Olih: I Putu Supartika
 |
| Perang Kusamba Olih Mangku Muriati |
UNDAGAN 1
TANGGAL
17 AGUSTUS, SEMENGAN PISAN RING MARGINE SAMAR-SAMAR KADINGEHAN GENDINGAN MERAH
PUTIH SANE KAKAWI OLIH I GDE DHARNA. SUARAN GENDINGANE PUNIKA MIRIBAN SAKING
JUMAH ANAKE SANE NGIDUPANG TIP.
RI
KALA SUARAN GENDINGANE PUNIKA MANGALUN, RING MARGINE TALER NGELIWAT ANAK BUDUH
MABAJU BOLONG-BOLONG, MASANDAL SANGLIR MAKTA BENDERA MERAH PUTIH LAN TONGKAT.
Anak Buduh
(MAJALAN
SAMBILANGA NIMAN-NIMAN BENDERA MERAH PUTIH LAN PAJALAN BATISNE CARA TENTARA) Merdeka... Merdeka.... Merdeka... (TEGAS)
Merdeka.... Merdeka.... Merdeka (LOYO) Merdeka... Merdeka... Hahahahaha
Merdeka... (KEDEK) Merdeka??? (KEDEK NGERASANG RARIS NUNGGING NGEDENGANG
CELANANE BOLONG)
(NEGULANG
BENDERA MERAH PUTIH RING TONGKATE, RARIS KATANCEBANG RING TENGAH JALANE, TUR
HORMAT RING BENDERANE NIKA)
Suba
kudang tiban Indonesiane merdeka? Suba kudang tiban? To nguda nu liu di jalane
mabrarakan anak ngidih-ngidih? Nguda nu liu anak memaling ulian seduk? To nguda
nu liu ada pejabat ane buduh mamaling di kantoran? Apa ne madan merdeka?
(RARIS
ANAKE BUDUH NIKA NGAMBIL TUR AKELESANG SAKING TIANGE. BENDERANE PUNIKA LANTAS
KAANGGEN NUTUPIN SIRAHNE SAMBIL KENYEM-KENYEM) hahahaha... uduh semeton tiang
sareng sami sane mirengang munyin tiange hahahaha... sane kenken nika kabawos
merdeka? Niki-niki sane kabawos merdeka? (SAMBIL NGEDENGANG BAJUNE SANE
BOLONG-BOLONG)
SAGET
ULI DIJA KADEN TEKANE, JEG WENTEN ANAK RAME-RAME NGEPUNGIN ANAKE BUDUH NIKA
WENTEN SANE NGABA TALI, NGABA KAMPIL AN RANTE, ANAKE BUDUH KAKURUNG
Warga 1
Nah
to ya anake buduh.
Warga 2
Jalan
juk, da banga leb buin
Warga 3
Krangkeng,
tegul awakne
Warga 4
Cara
celengang tegen aba mulihne
Anak Buduh
Eh
cai manusa-manusa buduh, ngujang-ngujangin dini. Magedi cai, magedi. Do kai
urusa. Men cai dot, to pejabate ane korupsi malu juk, juk tangkep jeblosang ka
LP hahahahahahaha...
Komandan Warga
Serbu,
impus kampilin!!!
WARGANE
NGRANGSEK ANAKE BUDUH NIKA. ANAKE BUDUH NGELAWAN NGANGGEN TONGKATE. NANGING
KALAH. LANTAS ANAKE BUDUH KATEGUL TUR KAKAMPILIN. BENDERANE SANE ABANA TEKEN
ANAKE BUDUH PASANGA RING TONGKATE TUR TANCEBANGA RING TENGAH JALANE. CARA MAKTA
CELENG ANAKE BUDUH PUNIKA TEGENA. WARGANE SURYAK-SURYAK DI JALANE.
UNDAGAN 2
MURID-MURID
SD-NE SANE WAU RAWUH SAKING UPACARA BENDERA RAME-RAME NGELINTANG RING MARGINE.
RARIS IPUN MANGGIHIN WENTEN BENDERA MERAH PUTIH SANE MATANCEBANG RING TENGAH
MARGINE
Murid 1
Awas
ada bendera merah putih. Keramat. Hormati, hormati. Makejang dingehang aba-aba.
Melahang mebaris. (MEMIMPIN BARISAN) siap grak. Lencang depan grak. Maju
jalan!!!
Murid makejang
Merdeka...
merdeka...merdeka
Murid 1
(DI
MALUN BENDERANE) Henti grak. Seluruhnya hormat grak....
Tegak
grakkk...
Murid 2
Adi
cara nak buduh?
Murid 3
Adi
cara anak buduh orahang cai? Cai inget sing apa ane orahina teken gurune di
sekolahan. Kita harus hormat pada bendera merah putih. Karena bendera merah
putih adalah kebanggaan Indonesia. (NGETOK SIRAHNE MURID 2)
Murid 4
Merdeka
Murid 5
Merdeka
juga... (GAYA BANCI)
Murid 1
Da
ngawag-ngawag mamunyi. Sing dadi mamunyi ngawag-awag di malun bendera merah
putihe. Haram hukumne. Bendera merah-putih keramat. Nyanan kualat cai ajak
makejang.
Murid 3
Nyen
ngorahang keto?
Murid 1
Gurune
di sekolahan.
Murid 2
Adi
gurune di sekolahan kapah tepukin hormat jak bendera merah putih. Ngujang
gurune di sekolahan nuturang selingkuhan di beten bendera merah-putihe ane
makibar?
Murid 1
Masak?
Murid 2
Ae,
ciussssss
Murid 1
Ah
baang dogen gurune apang kualat. Raga sebagai generasi muda sing dadi niru ane
keto-keto. Dosa nyanan, nawang cai apa to dosa?
Murid 2
Nawanglah
broooo, rugi melajah agama peteng lemah, jungklang-jungkling, tunggang-tungging
kanti engging yen sing nawang dosa.
Murid 3
Apa
to dosa?
Murid 2
Dosa
ialah seorang guru yang nuturang selingkuhan di bawah bendera merah putih yang
sedang berkibar.... hahahahaha beneh kan? Cocok kan maan ujian agama 100.
Murid 1
Kampret
cai, apane beneh? Nyen guru agamane ane ngajain keto? Demo ndasne pang mapecat.
Murid 2
Cai
tunyen ane ngorahang keto. Guru ane nuturang selingkuhan di beten bendera merah
putihe ane berkibar kone dosa.
Murid 1
Tolol
cai (NGETOK SIRAHNE MURID 2). Mani ker orahin guru agamane pang nol cai banga
ujian agama mara tawanga.
Murid 4
Ngujang-ngujangin
cai ajak makejang nuturang dosa jak selingkuh. Nu cerik suba bisa nuturang
selingkuhan. Berek nyanan gigin caine.
Murid 5
Merdeka
Murid 4
Apa
merdeka?
Murid 5
Sekali
merdeka tetap merdeka
Murid 4
Buduh!
ajak ke RSJ Bangli mara tawanga
Murid 5
Merdeka
Murid 3
Aduh
merdeka... bedik-bedik merdeka, apane ane merdeka. Di jumah nu naar sela
matambus, nasi sela, rerama semengan megonggang ulian tusing ada pipis anggon
meli baas jakan apa ento madan merdeka? Ento merdeka? Merdeka hanya mitos. Kita
diolok-olok oleh kata merdeka!!!
Murid 2
Merdeka
adalah hak
Murid 1
Merdeka
adalah anugrah
Murid 4
Merdeka
adalah bebas
Murid 5
Merdeka
adalah kemenangan
Murid 3
Merdeka
adalah sing ada baas jakan di jumah ane ngranayang meme bapane magonggang
sabilang wai.
Murid 1,2,4,5
Ah,
jelema buduh...
Murid 1
Kalain
dogen suba mulih
MAKEJANG
MURIDE MULIH. SANE MANGKIN TUAH MASISA MURID 3 MANTEN RING MALUN BENDERANE.
Murid 3
(SUJUD
RING BENDERA MERAH-PUTIHE) Duh merdeka, icenin napi pedekan duene jinah
akampil, mangda meme lan bapan tiange usan magonggang sabilng wai ulian nenten
wenten baas jakan. Duh merdeka ring dija nika ragane malinggih? Enahang gobane
duh merdeka? Abaang pedekan duene jinah akampil...
Merdeka,
ring dija nika meneng, tiang jagi merika, tiang jagi ngidih tulung mangda meme
bapan tiange nenten magonggang sabilang wai ulian nenten wenten baas jakan...
Langit,
gumi paling, matan ai, cicing bengil, bintang, leak barak, dongkang bengkang,
ane jani cang matakon, dija umahne I Merdeka, diolas orahang, eda engkebanga.
Eh
iba kedis kuuk ane ngindang, lelipi gadang, bangkung beling, diolas orahin cang
kija benehne cang majalan pang tepuk i merdeka?
(RARIS
MURIDE NIKA NGELES BENDERANE ULI TIANGNE, RARIS BENDERANE PUNIKA TEGULANGA RING
SIRAHNE, RARIS IPUN MAJALAN MULIHNE PADIDIANA, NEKED DI JUMAHNE SAMPUN
DAPETANGA UMAHNE SANE TUDUHAN, BEDEG UMAHNE SAMPUN AMAH TETANI)
Murid 3
Merdeka,
diolas cingakin umah tiange. Diolas cingakin. Umah tiange tuduh, bedegne uwug,
reod dini ditu. Iriki, ring umah tiange nenten wenten jinah kampil-kampilan.
Nenten wenten motor utawi mobil. Nenten wenten emas mawadah lemari.
Duh
Merdeka, ring dija ja mangkin. Mangda pedas uning, tiang sabilang wai madaar
ulian ngetelang yeh mata. Mangda polih nasi asopan, reraman tiange sabilang
sanja miyegan. Magonggang duh merdeka. Rasane umah tange nenten wenten
kebagiaan. Masekolah tiang ngelawan-lawanin. Uang SPP tiang sesai nunggak. Ri
kala timpal tiange ka warung mabelanja, kanggeang tiang negak di kelas ngisep
dakin lima....
(NENTEN
WENTEN SANE MASAUT, NENTEN JOH MASELANG SAGET TEKA MEMENE)
Meme
Apa
gaen cai gelur-gelur cara nak buduh? Sampatang apa malu luune di natahe. Suba
gede sing ngelah gae, kaden cai aluh meme kemu-mai ngalih pipis anggon meyanin
cai masekolah? Gumi gerit cara jani, mapanting ngalih gae apang nyidaang maan
pipis. Cai aluh-aluhan teka uli sekolah gelar-gelur cara nak buduh. To apa
adane mategulang di sirahe? Kain barak misi putih cara lakar ngeleak. Buduh
cai?
Murid 3
Me,
niki bendera merah-putih (NGEDENGANG BENDERA), bendera kebanggan Indonesia.
Tiang boya ja buduh!
Meme
Apa
to bendera merah putih? Dija to Indonesia? Jani sing perlu cai ngitung kaketo!
Luungan tulungin meme lan i bapa megae apang enggal sugih. Apang sugih! Nawang
cai?
Murid 3
Nanging
me, bendera niki bendera sakral, keramat. Bendera sane wenten sangkaning
merdeka me. Ulian merdeka bendera niki wenten. Tiang percaya, bendera niki sane
jagi ngatehin tiang nemu merdeka.
Meme
Apa?
Merdeka? Apa tawang cai Tu? Apa merdeka to Tu? Yen suba sing ada pipis anggon
baas jakan mani apa i raga nu ngorahang merdeka?
Murid 3
Tiang
percaya me, tiang percaya yen merdeka jagi maktayang i raga jinah. I raga pasti
pacang sugih ulian i merdeka. Tiang percaya merdeka punika idup di gumine.
Meme
Kaden
cai merdeka to manusa? Kaden cai merdeka to idup? Merdeka ento tuah munyi.
Munyi ane orahanga teken anake ane munafik. Ane sok. Sok sugih, sok dueg, sok
berpendidikan Tu!
Murid 3
Ten
me! Tiang percaya wenten anak sane mawasta I merdeka. Ipun sane ngawi gumine
niki. Ipun sane ngranayang wenten panegara Indonesiane.
Meme
Cai
jelema waras apa jeleme buduh? Merdeka to munyi boya ja adan jelema!
Murid 3
Tiang
tusing percaya!
Meme
Buduh
cai
Murid 3
Bangayang
tiang buduh me, tiang percaya pasti tiang jagi nepukin merdeka nika
Meme
Pengkung
cai, luune malu sampatang di natahe!
Murid 3
Pokokne
tiang jagi ngeruruh merdeka. Tiang lakar nunjukang merdeka to ada. Lakar alih
tiang kemu ka tongos ane joh. Bila perlu lakar alih tiang ka gedung DPR utawi
ka istana presiden.!
(TUNGKULA
MAJUGJAG, TUSING TAWANGA BAPANE TEKA MULIHNE)
Bapa
Selidan
magonggang! Apa lakar amah yen kakene sabilang wai!
Meme
Kenken
ne bli teka-tekaan adi jeg mamisuh? Sing tawang iyang mara teka uli ngajang
nyuh? Beli uli dija sing ada di jumah?
Bapa
Kenken
Luh? Beli uli dija? Sing tawang awak beline maong kakene uli dija? Beli uli
semengan nengala di carike Luh apang ada pipis buin mani lakar amah!
Meme
Kaden
beli tiang sing ngalih pipis apang ada amah bli?
Bapa
Bangsaaaattttt.
Murid 3
Merdeka,
tulungin tiang, tulungin tiang. Reraman tiange miyegan ulian baas jakan, abaang
tiang pipis meriki mangda reraman tiange nenten miyegan malih.
Meme
To
tingalin panak beline suba buduh jani. Ne ulian beli sing taen rungu teken
pianak.
Bapa
Iya
masih panak nyaine, nyai ane ngalekadang. Harusne nyai ane ngurus!
(RI
KALA MEME BAPANE MIYEGAN MURID 3 MAGEDI MAKTA BENDERA MERAH PUTIH)
RING
MARGINE MURID 3 NGERURUH ANAK SANE MAWASTA I MERDEKA
Murid 3
Pak,
ampura tiang mataken. Bapak uning nika ring dija umahne merdeka?
Warga
Merdeka?
Sira nika merdeka?
Murid 3
I
merdeka sane ngawi panegara Indonesiane degdeg.
Warga
I
merdeka? Tiang ten uning gus, yen gus mataken padi, carik, utawi carane najuk
bulih mara tiang uning.
Murid 3
Nggih
pak suksma.
(WARGANE
PUNIKA MAGEDI NGALAHIN IPUN)
Murid 3
Merdeka,
dija nika malinggih???
UNDAGAN 3
ANAKE
BUDUH SANE MAKRANGKENGIN NYIDAANG LEB DUANING IPUN ANAK BUDUH SANE DUWEG.
Anak Buduh
Jelema
belog. Jelema buduh! Anak waras kakene krangkenga hahahahahaha...
Kaden
dueg, naka belog. Kaden waras jeg buduh hahahaha....
Makejang
jelemane di gumine buduh. Pokokne buduh. Jelema selingkuh ulian buduh, anggota
DPR korupsi ulian buduh. Toris majemuh di sisin pasihe ulian buduh. Jelema
hormat teken bendera masih ulian buduh hahahahaha....
Guru
di sekolah masi buduh, to nguda panak pisaga ajain hahahaha.... luungan ngajain
panake jumah pang dueg. Yen panak pisaga ajain apa lakar maan. Yen panak
pisagane dueg tur dadi presiden apake gurune lakar maan jabatan empuk? Maan
cewek empuk? Masih sing hahahahaha, to suba madan buduh.
Dini
ditu anake gelar-gelur ngorahang merdeka ento ulian buduh hahahaha... apane
merdeka? Yen korupsi nu makacakan? Apane merdeka yen anake nu ngamah bangken
tuke sabilang semengan hahahahaha...
Diapin
kene-kene cang mantan calon anggota DPR. Cang mapilih ulian saingane nganggo
semboyan “MERDEKA” sakewala kayang jani sing ada bukti. Merdeka uli kemiskinan,
merdeka uli anak buduh, merdeka uli korupsi hahahaha... tusing ja korupsine ane
merdeka, nanging koruptore ane merdeka mara beneh hahahahaha...
Yen
saja cang dadi DPR gumine lakar gemah ripah loh jinawi... suba kudang pipis
baang pas kampanye pang nyak mamilih cang, suba kudang sembako salurang cang ka
daerah-daerah terpencil? Sakewala tusing masih ada ane mamilih.
Buduhhhhhhhhh.......
jelemane makejang buduh. Demokrasi buduh... peteng lemahe masih buduh... amah
buduh,,, buduhhh... buduhhhh...
Cang
dogen sing buduh... cang ane waras dini, ane len buduh. Murid-muride buduh maca
buku, guru-gurune buduh ngajahin... sakewala cang sing buduh
Cang
waraaaaasssssssssss.............!!!!!!
Hihihihihi.....
hahahahaha.... hihihihihi....hahahahaha...
UNDAGAN 4
RING
MARGINE MURID 3 MATEMU SARENG ANAK SANE MADUWE NASIB PATUH TEKEN IPUN. ANAKE
PUNIKA PADA-PADA NGERURUH MERDEKA
(MURID
1, ANAK 1, ANAK 2 MATEMU NENTEN SENGAJA)
Murid 3
Bli,
tiang ngeruruh umahne i merdeka, ring dija nika umahne?
Anak 1
Kenapa
cai ngalih umahne I Merdeka?
Anak 2
Merdeka
to Cuma mitos!
Murid 3
Tiang
lakar ngidih tulung teken i merdeka, apang idup tiange nenten sengsara. Apang
tiang nyidaang mayah tunggakan SPP tiange. Tiang dot ngidih pipis teken i
merdeka.
Anak 1
Buduh
cai! Di gumine sing ada anak ane madan i merdeka. Merdeka tuah mitos. Yen cai
dot ngalih merdeka, jalan jani alih bareng-bareng apang tawang kasujatianne ane
ken madan merdeka!
Murid 3
Merdeka
boya ja adan manusa?
Anak 1
Merdeka
ento bebas!
Murid 3
Men
dija lakar tepuk merdekane ento?
Anak 2
Tusing
ja lakar tepuk. Manusa cara i raga tusing lakar taen nepukin merdeka!!
Anak 1
Mendep
cai, cai sing nawang apa. Yen dot ngalih merdeka, jalan jani i raga magedi kemu
ka Istana Presiden. Takonang dija i raga lakar maan merdeka.
Murid 3
Dija
tongos Istana Presidene?
Anak 2
Tolol,
istana presiden jeg pasti di jakarta. Cai sing taen malajah sejarah!
Murid 3
Dija
ambain kemu?
Anak 1
Mai
jeg milu dogen! Liunan munyi cai.
(ANAK
1, ANAK 2, LAN MURID 3 MAJALAN LAKAR KA ISTANA PRESIDEN NGERURUH SANE MAWASTA
MERDEKA)
UNDAGAN 5
RING
JUMAHNE MURID 3
Bapa
Mapugala
nyemak gae, selid sanja tusing masi sugih-sugih. Utang dini ditu makacakan.
Utang baas sing lunas-lunas. Biaya SPP panak tusing nyidaang mayah. Kadirasa
suba telah baan madaya apang nyidaang sugih. Sakewala kanti jani enu masih
sengsara. (NYIUP KOPI TUR KASEMPROTANG) Bangsat kopi pait gaenanga.
Luh....Luh...Luhhhhh,
mai pesu kesep, begbeg masekep di paon.
Meme
Kenapa
bli, semengan suba uyut.
Bapa
Ne
kopi apa adane gaenang nyai pait kakene?
Meme
Sing
ada gula, kenkenang lakar ngae kopi pang manis
Bapa
Sing
ada gula.... Sing bisa meli ka dagange?
Meme
Apa
lakar anggon meli?
Bapa
Pipis,
apa nyen anggon. Jeg dadi bibihe kajengitang di warung pisagane?
Meme
Pipis
sing ada, dija lakar ngalih?
Bapa
Ngutang
malu di warung pisagane lamun keto
Meme
Ngutang...
ngutang.... sabilang wai begbeg ngutang dogen gaene bin pidan ker bayah?
Bapa
Mani
lamun suba sugih lakar bayah!
Meme
Mani-mani,
men suba banga lakar ngutang sabilang wai?
Bapa
(NYIAM
KURENANE AJI KOPI) ne amah suba ditu kopine
Meme
(NYEMAK
GELASE TUR PANTIGANGA, LAN MAGEDI NGALAIN KURENANE) suba gaenang kopi misi
uyut!!!!
Bapa
Wanen
gati ngelawan kurenan. Baang munyi misi ngalawan. Sing ngerti apa dadi anak
Luh. Ceraeang ndasne mara tawanga. Jele-jele kene kadenanga sing nyidaang
ngalih anak luh jegeg. Diapin maong, tetelu nyidaang ngantusin anak luh yen
atian. Masalah cewek jaman jani jeg suba gampang. Tinggal magedi ka jero balian
dogen jeg maan suba cewek jegeg cara Miyabi.
Panakne
ngambul sing runguanga. Jeg ngelekadang panak dogen bisane, sabilang peteng
nagih jatah, sakewala suba ada panak ngerunguang sing nyidaang.
Panakne
masi cara bos dogen misi ngambul. Depin ndasne apang amah leak di jalane, apang
sing ada tanggungan buin. Panak bantat kaketo sing dadi andelang
ngujang-ngujang. Bisane nyakitin rerama dogen. Ngaenang rerama susah. Sing
tawanga apa reramane mapanting ngalih gae di margane apang nyidaang
nyekolahang.
Semengan
bisane nagih pipis dogen. Sing bisa nulungin ngalih pipis.
(SAGET
ULI PAON PIRING MAKEBER)
Meme
(MAMUNYI
ULI DI PAON) semengan uyut. Sing lek teken pisagane. Sebilang wai uyut dogen
naene. Apa lakar tepuk. Bin pidan lakar nyidaang sugih cara munyine.
Bapa
Bangsattttt.....
(MACELUP KA PAON NGABA SAMPAT)
(RING
PAON SUARA ANAK MIYEGAN MABYAYUHAN, SUARAN PIRING, PANCI, SUARANE I BAPA UYUT
SAMBIL MAMISUH, SUARAN I MEME SANE JERIT-JERIT, LAN WENTEN MASIH PANCI LAN
PIRING SANE KADAGELANG ULI PAON)
I
MEME RARIS PESU ULI PAON, NGELING DI NATAHE MUANE BENGUL-BENGUL
Meme
Nasib-nasib
dadi jelema lacuuurrr. Sing taen mujur, mapanting nyemak gae sing taen maan
asil ane liu. Sabilang wai pragat miyegan. Semengan, tengai, sanja jeg miyegan
dogen gaene...
UNDAGAN 6
MURID
3, ANAK 1, ANAK 2 MAJALAN NUJU KA ISTANA PRESIDEN. DI TENGAH JALAN IPUN SARENG
SAMI MATEMU SARENG ANAK BUDUH
Anak buduh
Hahahahaha...
buduh buduhhhh.... hahahahaha manusane buduh jani. Kemu mai ngepungin pipis.
Uli semengan ngalih gae apang maan pipis, ento ciri jelema buduh hahahahaha...
Anak 1
Ampura
pak, dados tiang metaken ring dija nika margine ka istana presiden?
Anak buduh
Apa?
Anak 1
Ring
dija nika margine ka istana presiden?
Anak buduh
Istana
presiden? Hahahaha...
Anak 2
Nggih
pak istana presiden, dija nika margine?
Anak buduh
Buduh,
buduh.... nyak gumi buduh hahahaha... ngujang-ngujangin cai ka istana presiden?
Murid 3
Ngalih
merdeka!!!
Anak buduh
Merdeka...
merdeka.... merdekaaaaa... hahahaha merdeka? Apa to merdeka?
Anak 1
Merdeka
nika bebas
Anak buduh
Oooooo...
bebas? Hahahaha....
Anak 1
Nggih
bebas, kenapi?
Anak buduh
Adi
tawang di istana presiden ada merdeka?
Anak 1
Krana
irika pak presiden ngoyong
Anak buduh
Oh,
ditu umah presiden... hahahahaha... presidene nawang apa to merdeka?
Anak 2
Pasti
nawanglah
Murid 3
Jelema
buduh
Anak buduh
Apa
orahang cai? Jelema buduh? Cai ane buduh, cang waras ne, hahahaha...
Anak 1
Pak
tiang menggal-menggalan niki, diolas orahin dija jalane? Yen bapak nenten uning
tiang sareng tiga pacang ngeruruh jalane.
Anak buduh
Merdeka...
hahahahahaha.. merdeka... nu masih ada jelema ngomong merdeka dijamane jani
hahaahaha..
Cai
nawang merdeka suba tusing ada? (MAJALAN NGELINDERIN ANAKE SANE AJAKA TETELU)
merdeka jani tuah pemanis bibih, tuah munyi ane tusing maarti. Gembar-gembor di
margane ngorahang merdeka, sakewala apa buktine merdeka hahahaha...
Yen
saja merdeka, to nguda ada jelema mati makenta, to nguda ada anak pules di
kolong jembatane? To nguda ada jelema buduh ane negak di kantor DPR ngampilang
pipis rakyat tur penpena ka kantongne? Hahahahahaha...
Murid 3
Tiang
percaya, merdeka punika kari wenten... tiang pasti lakar molihang!!!
Anak buduh
(MAAKIN
MURID 3) merah putih, merah berani, putih suci hahahaha... (NGELESANG BENDERA
MERAH PUTIH SANE TEGULANGA RING SIRAHNE MURID 3)
Apa
dasar caine ngalih ane madan merdeka? Suba yakin cai teken merdeka ento apa?
Murid 3
Yakin,
tiang yakin... merdeka nika kantun wenten. Tiang dot ngasanin merdeka sane
sujati. Pasti mangkin meme bapan tiange kari nyantosang tiang ring jumah
ngabaang ipun sane mawasta merdeka. Tiang dot ngaput merdeka punika tur aban
tiang mulih. Tiang dot ngubuhin merdeka nika...
Anak buduh
Cai
cenik lamun cekuhe, hahahaha... hihihihihi... nanging cai dueg ngomong...
ngaput merdeka, ngubuhin merdeka hahahahaha... kaden cai merdekane to
bererong??
Anak 1
Merdeka
nika kantun wenten, tiang sareng tiga percaya..
Murid 3
Tiang
dot ngaenang meme lan bapan tiange merdeka saking kasengsaran
Anak 2
Tiang
dot dewek tiange suud dados pencopet. Med asane dewek tiange ngawi dosa. Tiang
dot merdeka saking penjajah. Penjajah lara sane ngawianang tiang dados pencopet
Anak 1
Tiang
dot, dewek tiange suud dados anak ngidih-idih. Tiang dot merdeka saking geginan
dados anak ngidih-idih. Lek tiang kedekin gumi krana tiang dados anak
ngidih-idih..
Murid 3
Jalan
alih merdeka sane sujati
Anak 1
Jalan
mejalan bareng-bareng ngeruruh merdeka
Anak 2
Jalan
majalan ka istana presiden, takonang teken pak presiden dija tongos merdekane
ento...
Anak buduh
Hahahahahahahahah....
hahahahahaha.... merdeka... merdeka... merdeka...
Hai
pak presiden, pak mentri, pak DPR, pak gubernur, pak bupati.... dija kone
merdekane ngoyong? Dija? Hahahahaha... mai abaang cang merdeka, cang waras...
waras cang warasss, makejang jelemane buduh, nanging cang sing buduh, sakewala
nguda anake ane buduh makejang gembar-gembor mamunyi merdeka, sakewala cang ane
waras sing nepukin merdeka... hahahahahahahaha... mai merdeka... maiiiii...
Anak 1
(NGAREBUT
BENDERA MERAH PUTIH ULI LIMAN ANAKE BUDUH TUR KATEGULANG RING PUNYAN KAYUNE)
Merdeka!!!
Anak 2
Merdeka!!!!
Murid 3
Merdeka!!!!
Anak buduh
Hahahahahaha
merdekaaaaaaaaaaaaaaaaaaaaaa...........!!!!!!!!!!!!
(LAGU
INDONESIA PUSAKA, SAMIAN MAJUJUK SAMBIL HORMAT RING BENDERA MERAH PUTIHE)
PERJUANGAN
IPUNE DURUNG PUPUT, MERDEKANE DURUNG KA PANGGIH, RING DIJA GENAHNE, NENTEN
WENTEN SANE UNING. NENTEN JA ANAK SANE WARAS KEMANTEN SANE NGERURUH MERDEKA,
SAKEWALA ANAK BUDUH TALER SARENG NGERURUH SANE MAWASTA MERDEKA. RING LANGITE
MERAH PUTIHE KANTUN MAKIBAR KATIUP SANG BAYU. RING BETEN, RAKYATE KANTUN
MAGABAG-GABAGAN NGERURUH SANE MAWASTA MERDEKA.
******PUPUT******
.jpg)
No comments