Kidung Pangetus Prana

Olih: Ki Jalu Nismara

Tumbal Kesuburan Gagambaran Ketut Susena

Puniki katuturan séket tiban lawas. Suryané mara pesan minggek kauh. Nyawan ngriung ngelébin kungkungan, magomplok-gomplok di wit punyan nangkané, makeber ngaja-nganginang.  Kupu-kupu kuning, matingga di parban balé danginé, jumah Ni Rukma. Mirib sipta leluhur rauh, mapag atman Nengah Cedar sedekan naneng di balé dangin.  Nampa jembung misi indrin. Makenyem tuara takut lampus. Lantas ia ngomong, “Nah nyama kekasihan ajak makejang, mbok adi, mémé-bapa, suud icang pangelingina. Mati mula bekel urip. Sahananing lekad keni cakraning Tri Kona. Restitiang pajalan icang ngupadi tanah wayah. Ampurayang kapelihan icangé, tondén nyidaang ngwales pitresnan rerama.

Nengah Cedar nayub indrin. Taméng tentarané pada sregep. Suba pindo indriné kasiup, I Cedar tondén masi bah. Bibihné madidih-didih, lingé pada pagerong. Sebet manggih nyama kasengsaran.

Nengah Cedar ngangsehang makruna, “Nyai Rukma mai paekin icang. Baang icang ngusud basang nyainé, icang ngidih pamamit tekén panak di tengah. Apang maan masih icang asesambat tekén pianak, diastun maraga manik.”

Ni Rukma ngansehang majalan maekin somahné sedeng megat angkihan. Kausuh-usuhin basang kurenanné, satmaka ngusudin duur pianakné. “Ning tuara sadia cening lekad, nu di belingan suba kalahin bapa mati. Patilesang ragané ngiasa di tengah garba, restitiang pajalan bapané mulih ka tanah wayah. Dumadak suéca Widhiné, sida lantang tuuh panumadian ceningé, uli kadituan bapa lakar ngrestiti...,” kéto Nengah Cedar manulamé tekén maniké di tengah basang.

Sawetara apenenga pakpakan basé, Nengah Cedar tondén masi engsap. Peluhné pacrétcét, bibihné madidih-didih. Nadak kupu-kupu kuningé ané matingga di duur parbané nambung ngaja kangin. Yén sipta apa kadén. Paningalan Nengah Cedar sayan lamur. “Mé..., dija mbok icangé, Wayan Rampih, alih ia, tundén mai, baang icang ngidih kidung apalet, satmaka pangetus prana icang ngalahin mati, matinggal uli kurungan awak. Suud ngeling, jani icang lakar mulih,” Nengah Cedar mamunyi megat-megat.

Tondén pragat raosné Nengah Cedar, Wayan Rampih saget teka sinambi sigsigan, tuara nyidaang nepuk kasengsaran adinné.

“Ratu Batara Kawitan, lugrayang puniki damuh Batara nunas pamargi, gelis cabut atman ipuné, mangda sampunang ipun kagela-gela nandang sengsara. Cai adin mbok, kénkén kadén tantun cainé numitis nepuk sengsara buka kéné, dija mirib tuna yasané nepuk baya buka jani. Nah ingetang ngranasika, jani mbok maang cai bekel, kidung pangetus prana.”

Ditu Wayan Rampih ngelut adinné, ngusudin pabahané, maekang bibih ka kuping adinné, ngendingang kidung rahasia pangetus prana saking tengahing hredaya. Ah ang mulih Sang Hyang Atma ka dalem sunia keling, manunggal maring Sang Hyang Amerta, alungguh ring jineng agung. Om purnam purnam purnam Om.

Prajani paninggal Nengah Cedar udep saha kenyem, kausud pabahanné matadah anget. Sang atma wus matinggal saking kurungan. Nengah Cedar buka masaré leplep, tuara maklisikan, kidung pangetus prana mahbahang atmané mulih ka kamulan agung. Matanainé ngeséng kauh, makada sakadi nyujur tilam sari, miik ngalub, arip tan paipian.

Nyama braya misan mindon manjusin watangan Nengah Cedar kater wirama prihan temen, mambuh, masisig, masekar arum. Sentana pianak cucu laut mapamit, nyakupang kara kalih di tangkah. Ni Rukma lemet tan pabayu, kenehné suung mamung katinggalin somah sedekan anggal. Sinambi ngusap-usap belingan Ni Rukma manulamé, “Bli Cedar alih tiang mai, tiang dot bareng mati, énggalin papag atman tiangé, diastun ngentasin tukad banyeh titi ugal-agil, tiang sadia nresnain bli.”

Ni Rampih mlekur Ni Rukma sedekan maguyang di balé dangin. “Nah suud amonto sebet, satiané makurenan tuara musti ambahin mati. Ento ada sentana nu makadut, benehang ngupapira, mani lekad anggon paglantingan keneh, satmaka I Cedar suba mulih. Sentana ento mulaning patitip kawitan. Pét mani lekad ponakan mboké, tutug ia salantang urip. Ngayahin raré maraga déwa patuh tekén bakti marep Batara Kawitan. Manut mbok belog ento madan satia,” kéto Ni Rampih nuturin ipahné. Nyaluk sandikala, majalan laut ka sétra, guminé sepi mamung, kuluké ngulun mangunang bulun kalong.

Kusa Agra, 1/5/2015  

NB:

• Prosa liris kakawian Ki Jalu Nismara sané mamurda “Kidung Pangetus Prana” puniki naanin kawedar ring Rubrik Médiaswari (Pos Bali) rahina Redité Paing, 3 Mei 2015.
• Manut gatra saking IDK Raka Kusuma, Ki Jalu Nismara puniki wantah I Wayan Wésta